30th Jul2019

ຈັບກຸ່ມແກ້ງຄ້າຢາເສບຕິດປະເພດຢາບ້າ ພ້ອມຂອງກາງ ຢາບ້າ 80,000 ເມັດ

by somchan

ເຈົ້າໜ້າທີຕຳຫຼວດສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງວຽງຈັນ ໄດ້ລົງແກ້ໄຂບັນຫາການເຄື່ອນໄຫວ ຊື້ຂາຍຢາເສບຕິດ ປະເພດຢາບ້າຢູ່ເຂດເມືອງຊະນະຄາມ ແຂວງວຽງຈັນ ໃນວັນທີ 13 ກໍລະກົດ 2019 ນີ້ ສາມາດຈັບຕົວເປົ້າໝາຍ ພ້ອມດ້ວຍຂອງກາງຢາເສບຕິດປະເພດຢາບ້າ 80,000 ເມັດ ຜູ້ຕ້ອງຫາທັງໝົດ 4 ຄົນ ຄື: ທ້າວ ຄຳເມີງ ອາຍຸ 63 ປີ ຢູ່ບ້ານນາກາງ, ທ້າວ ຄຳມ່ວນ ອາຍຸ 62 ປີ ຢູ່ບ້ານແສນຈະເລີນ, ທ້າວ ເຢີວ່າງ ອາຍຸ 30 ປີ ຢູ່ບ້ານນາກາງ ພວກກ່ຽວທັງ 3 ແມ່ນຢູ່ເມືອງຊະນະຄາມ ແຂວງ ວຽງຈັນ ສ່ວນ ທ້າວສົມຫ້ວງ ອາຍຸ 62 ປີ ຢູ່ບ້ານນາງ່າ ເມືອງນາຊາຍທອງ ນະຄອນຫຼວງວຽງຈັນ

ຜ່ານການສືບສວນ-ສອບສວນ ຂອງເຈົ້າໜ້າທີຕຳຫຼວດ ພວກກ່ຽວໄດ້ຮັບສາລະພາບວ່າ ຢາບ້າຈຳນວນດັ່ງກ່າວແມ່ນຂອງພວກກ່ຽວແທ້ ເຊີ່ງໄດ້ສັ່ງຊື້ ແລະ ຈະນຳໄປສົ່ງໃຫ້ພວກຮ່ວມຂະບວນການດຽວກັນ ຢູ່ຈຸດນັດພົບເສ້ນທາງ ບ້ານນາສັກ ເມືອງຊະນະຄາມ ພໍເດີນທາງໄປຮອດຈຸດນັດໝາຍ ຈື່ງຖືກເຈັົ້າໜ້າທີຕຳຫຼວດ ສະກັດກັ້ນ ແລະ ຕ້ານຢາເສບຕິດ ປກສ ແຂວງ ວຽງຈັນຈັບຕົວ ພ້ອມຂອງກາງຢາບ້າຈຳນວນ 40 ມັດ ເທົ່າກັບ 80,000 ເມັດ

ປະຈຸບັນເຈົ້າໜ້າທີກຳລັງດຳເນີນ ການສືບສວນ-ສອບສວນ ເພື່ອຂະຫຍາຍຜົນຫາກຸ່ມແກງຜູ້ຮ່ວມຂະບວນການມາລົງໂທດຕາມກົດໝາຍ.

ໃນໄລຍະດຽວກັນນີ້ ເຈົ້າໜ້າທີຕຳຫຼວດແຂວງສະຫວັນນະເຂດ ກໍ່ສາມາດຈັບຕົວ ທ້າວ ລ້ານຄຳ ປະຊາຊົນຢູ່ບ້ານນາຈານ ເມືອງໄຊພູທອງ ແຂວງສະຫວັນນະເຂດ ພ້ອມຂອງກາງຢາບ້າ 10 ມັດ ເທົ່າກັບ 20,000 ເມັດ.

Off

Comments are closed.