12th Oct2018

ຈັບຄາລົດຕູ້ໂດຍສານ ພ້ອມຢາບ້າ 12,000 ກວ່າເມັດ

by somchan

ໃນວັນທີ 11 ຕຸລາ 2018 ເຈົ້າໜ້າທີ່ກອງບັນຊາການ ປກສ ແຂວງອຸດົມໄຊ ໄດ້ຈັບຕົວພວກລັກລອບຂົນສົ່ງ-ຄ້າຂາຍຢາເສບຕິດໄດ້ 2 ຄົນ ພ້ອມຂອງການຢາເສບຕິດປະເພດຢາບ້າ ຈຳນວນ 12,000 ກວ່າເມັດ ຜູ້ຕ້ອງຫາທັງສອງຄົນຄື: ທ້າວ ລິວຫານ ອາຍຸ 20 ປີ ຢູ່ເມືອງຊາວຕົງ ແຂວງຫູນານ ແລະ ທ້າວ ນິງເວີນຊຽງ ອາຍຸ 25 ປີ ຢູ່ເມືອງຫູນານ ແລະ ແຂວງຫູນານ.

ເຈົ້າໜ້າທີ່ ປກສ ແຂວງອຸດົມໄຊ ເປີດເຜີຍໃຫ້ຮູ້ວ່າ: ໃນວັນທີ 10 ຕຸລາ 2018 ແມ່ນໄດ້ຈັດກຳລັງວິຊາສະເພາະລົງແກ້ໄຂສະພາບປະກົດການຫຍໍ້ທໍ້ທາງສັງຄົມ ດ້ວຍການຕັ້ງຈຸດກວດກາ ຢູ່ຫຼັກກິໂລແມັດທີ 4 ເສັ້ນທາງລະຫວ່າງເມືອງໄຊ – ເມືອງນາໝໍ້ ເພື່ອກວດກາເປົ້າໝາຍ ທີ່ມີການເຄື່ອນໄຫວ ລັກລອບຂົນສົ່ງສິ່ງທີ່ຜິດກົດໝາຍ ເປັນຕົ້ນແມ່ນ ເຄືອນໄຫວຄ້າ-ຂາຍຢາເສບຕິດ ຮອດເວລາ 2:30 ໂມງ ຂອງວັນທີ 11 ຕຸລາ 2018 ເຈົ້າໜ້າທີ່ໄດ້ກວດກາລົດຕູ້ໂດຍສານ ໝາຍເລກທະບຽນ ກກ 4052 ຫຼວງພະບາງ ຂັບຂີ່ໂດຍ ທ້າວ ເຈຍລືເລົາ ເຊິ່ງໃນລົດມີຜູ້ໂດຍສານຂີ່ມານຳ 2 ຄົນ. ຜ່ານການກວດກາພົບເຫັນຢາເສບຕິດ ປະເພດຢາບ້າ ຈຳນວນ 6 ມັດ ເທົ່າກັບ 12,000 ເມັດ ນ້ຳໜັກ 1,2 ກິໂລກຼາມ ຊຸກເຊື່ອງໄວ້ຢູ່ໃນຖົງເປ້ດຳຂອງ ທ້າວ ລິວຫານ ແລະ ໄດ້ກວດກາພົບເຫັນຢາບ້າ ອີກຈຳນວນ 28 ເມັດ ຊຸກເຊື່ອງໄວ້ຢູ່ໃນຖົງເສື້ອຂອງ ທ້າວ ນິງເວີນຊຽງ ນັ້ນ ເຈົ້າໜ້າທີ່ ປກສ ແຂວງອຸດົມໄຊ ຈຶ່ງໄດ້ກັກຕົວພວກກ່ຽວໄປດຳເນີນການສືບສວນ-ສອບສວນ.

ຜ່ານການສອບສວນພວກກ່ຽວສາລະພາບວ່າ: ຢາບ້າຈຳນວນດັ່ງກ່າວ ແມ່ນເປັນຂອງພວກກ່ຽວແທ້ ສ່ວນເຈົ້າຂອງລົດ ຊື່ທ້າວ ເຈຍລືເລົາ ແມ່ນບໍ່ມີສ່ວນກ່ຽວຂ້ອງໃດໆກັບພວກກ່ຽວ ແລະ ຢາບ້າຈຳນວນດັ່ງກ່າວ ປະຈຸບັນນີ້ເຈົ້າໜ້າທີ່ແມ່ນກຳລັງດຳເນີນການສືບສວນ-ສອບສວນ ຂະຫຍາຍຜົນຫາຜູ້ຮ່ວມຂະບວນການນຳກັນ ເພື່ອຕິດຕາມຈັບຕົວໄປດຳເນີນຄະດີ.

Off

Comments are closed.