05th Sep2017

ຈັບພວກ ຄ້າຂາຍ ຢາເສບຕິດ ໄດ້ 7 ຄົນ ພ້ອມຂອງກາງ ຢາບ້າ 1 ແສນ ກວ່າເມັດ.

by somchan

ໃນວັນທີ 30 ສິງຫາ 2017 ທີ່ຜ່ານມາ, ເຈົ້າໜ້າທີ່ຕຳຫຼວດ ສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ຈັບຕົວພວກຄ້າຂາຍ ຢາເສບຕິດ ປະເພດ ຢາບ້າໄດ້ 7 ຄົນ ພ້ອມຂອງກາງ ຢາບ້າ 53 ມັດ, ກັບ 460 ເມັດ ເທົ່າກັບ 106,460 ເມັດ, ໜັກ 12,2 ກິໂລກຣາມ, ລົດໃຫຍ່ 4 ຄັນ ແລະ ເງິນຈຳນວນໜຶ່ງ ຢູ່ໂຮງແຮມແຫ່ງໜຶ່ງ ເຂດບ້ານດົງນາທອງ ເມືອງສີໂຄດຕະບອງ ນະຄອນຫຼວງວຽງຈັນ. ຜູ້ຖືກຫາທັງ 7 ຄົນ ມີ ທ້າວ ສົມມະນີ ອາຍຸ 50 ປີ, ນາງພອນ ອາຍຸ 45 ປີ ທັງສອງບ້ານຫຼັກຫີນ, ທ້າວ ລ້ານ ອາຍຸ 37 ປີ ຢູ່ບ້ານໂພສີ ທັງສາມຢູ່ ເມືອງສີໂຄດຕະບອງ ນະຄອນຫຼວງວຽງຈັນ, ທ້າວ ອຸດົມ ອາຍຸ 31 ປີ, ທ້າວ ໄຊ ອາຍຸ 28 ປີ, ທ້າວລ້ຽງ ອາຍຸ 43 ປີ ທັງສາມ ຢູ່ບ້ານສຳພັນນາ ເມືອງສັງທອງ ນະຄອນຫຼວງວຽງຈັນ ແລະ ທ້າວ ນ້ອຍ ຫຼື ເພັດ ອາຍຸ 40 ປີ ຢູ່ບ້ານທ່າຂີ້ເຫຼັກ ເມືອງທ່າຂີ້ເຫຼັກ ປະເທດມຽນມາ. ຜ່ານການສືບສວນ – ສອບສວນ ຂອງເຈົ້າໜ້າທີ່ ພວກກ່ຽວ ຮັບສາລະພາບວ່າ: ຢາບ້ າຈຳນວນດັ່ງກ່າວ ແມ່ນຂອງພວກກ່ຽວແທ້ ເຊິ່ງໄດ້ຊື້ມາຈາກຊາຍ ບໍ່ຮູ້ຊື່ ແລະ ທີ່ຢູ່, ເພື່ອຈະເອົາໄປຂາຍ ໃຫ້ຜູ້ຮ່ວມຂະບວນການ ຢູ່ທີ່ຈຸດນັດໝາຍ ແຕ່ບໍໍທັນໄດ້ຂາຍ ຖືກເຈົ້າໜ້າທີ່ຈັບຕົວ ມາດຳເນີນຄະດີ.

ຂ່າວ​ໃຫ້​ຮູ້​ຕື່ມ​ອີກ​ວ່າ ​ໃນ​​ໄລຍະ​ດຽວ​ກັນ​ນີ້ ​ເຈົ້າ​ໜ້າ​ທີ່​ຕຳຫຼວດ​ພະ​ແນ​ກສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ປກສ ​ແຂວງ​ວຽງ​ຈັນ ​ໄດ້​ສົມທົບ​ກັບ​ເຈົ້າ​ໜ້າ​ທີ່​ກົມ​ຕຳຫຼວດ​ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ຈັບ​ຕົວ​ເປົ້າ​ໝາຍ​ຄ້າຂາຍ​ຢາ​ເສບ​ຕິດ 1 ຄົນ ພ້ອມ​ດ້ວຍ​ຂອງ​ກາງ​ຢາ​ເ​ສບຕິດ​ປະ​ເພດ ຢາ​ບ້າ 13,000 ​ເມັດ, ຝິ່ນ 900 g ​ແລະ ​ແປ້ງ​ຝຸ່ນ​ສີຂາວ 4 kg ທີ່​ຊຸກ​​ເຊື່ອງ​ຢູ່​ໃນ​ເບ​າະລົດ ຜູ້​ຕ້ອງ​ຫາ​ຊື່ ທ້າວ ​ແອ​ວ່າງ ອາຍຸ 30 ປີ ບ້ານ​ໜອງ​ພະຍາ ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ.

ຜ່ານ​ການ​ສືບສວນ-​ສອບ​ສວນ​ຂອງ​ເຈົ້າ​ໜ້າ​ທີ່ ທ້າວ ​ແອ​ວ່າງ ​ໃຫ້ການ​ວ່າ: ​ໃນ​ວັນ​ທີ 24 ສິງຫາ 2017 ​ໄດ້​ຕິດ​ຕໍ່​ພົວພັນ​ກັບ​ຜູ້​ຮ່ວມ​ຂະ​ບວນການ ຢູ່​​ແຂວງ​ອຸດົມ​ໄຊ ​ເພື່ອ​ຕິດ​ຕໍ່​ຊື້-​ຂາຍ​ຢາ​ເສບ​ຕິດ ພາຍຫຼັງ​ທີ່​ທັງ​ສອງ​ຕົກລົງ​ກັນ​ແລ້ວ ຈຶ່ງ​ໄດ້​ຝາກ​ຢາ​ເສບ​ຕິດ​ຫຼາຍ​ລາຍ​ການ ​ເຊິ່ງຫຸ້ມ​ຫໍ່​ດ້ວຍ​ແກັດ​ມາ​ນຳ​ລົດ​ໂດຍສານ ​ໃຫ້ ທ້າວ ​ແອ​ວ່າງ ​ເມື່ອ​ໄດ້​ຢາ​ເສບ​ຕິດ​ຈຳນວນ​ດັ່ງກ່າວ​ແລ້ວ ຜູ້ກ່ຽວ​ກໍ່​ເອົາ​ໄປ​ຊຸກ​ເຊື່ອງ​ໄວ້​ຢູ່ເຮືອນ ມາ​ຮອດ​ວັນ​ທີ 27 ສິງຫາ 2017 ​ໄດ້​ມີ​ຜູ້​ຮ່ວມ​ຂະ​ບວນການ​ສັ່ງ​ຊື້​ຢາ​ບ້າ​ນຳ ທ້າວ ​ແອ​ວ່າງ ຈຳນວນ 27 ມັດ ດັ່ງ​ນັ້ນ​ຜູ້ກ່ຽວ​ຈຶ່ງ​ເອົາ​ຢາ​ບ້າ​ຈຳນວນ 6 ມັດ ​ໄປ​ສົ່ງ​ໃຫ້​ກ່ອນ​ຕາມ​ຈຸດນັດໝາຍ ພໍ​ເດີນທາງ​ຮອດ ບ້ານ​ໂພນ​ແກ້ວ ​ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ຖືກ​ເຈົ້າ​ໜ້າ​ທີ່​ຕຳຫຼວ​ດຈັບ​ຕົວ​ກ່ອນ ພ້ອມ​ດ້ວຍ​ຂອງ​ກາງ​ຢາ​ເສບ​ຕິດ ຈຳນວນ​ດັ່ງກ່າວ.

 

Off

Comments are closed.