22nd Jun2018

ຈັບພວກຄ້າຂາຍຢາເສບຕິດ 3 ຄົນ ພ້ອມຂອງກາງຫຼາຍລາຍການ

by somchan

ໃນວັນທີ 10 ມິຖຸນາ 2018 ນີ້, ໜ່ວຍງານຕຳຫຼວດ ສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ເມືອງໃຫມ່ ແຂວງຜົ້ງສາລີ ໄດ້ນຳກຳລັງ ເຈົ້າໜ້າທີ່ ປິດລ້ອມຈັບພວກຄ້າຂາຍຢາເສບຕິດ ຢູ່ເຂດບ້ານຫ້ວຍຫວ່າງເກົ່າ ເມືອງໃຫມ່ ແຂວງ ຜົ້ງສາລີ ສາມາດຈັບຜູ້ກະທຳຜິດພ້ອມຂອງກາງ ເຮໂຣອິນ 7 ແທ່ງ ຢາບ້າ 30.000 ກວ່າເມັດ, ​ຝິ່ນດຳ 2 ກ້ອນ ແລະ ອາວຸດບືນລູກອັດ 1 ກະບອກ, ປືນແກັບ 1 ກະບອກ.

ເຈົ້າໜ້າທີ່ ປກສ ເມືອງໃຫມ່ ເປີດແຜ່ໃຫ້ຮູ້ວ່າ: ພາຍຫຼັງໄດ້ສືບຮູ້ວ່າໄດ້ມີການເຄື່ອນໄຫວຊື້-ຂາຍຢາເສບຕິດ ໂດຍນັດໝາຍກັນຢູ່ເຂດບ້ານຫ້ວຍຫວ່າງເກົ່າ ເມືອງໃຫມ່ ຈິ່ງໄດ້ນຳກຳລັງລົງຕິດຕາມ ຮອດວັນທີ 10 ມິຖຸນາ 2018 ເຫັນເປົ້າໝາຍຢູ່ສະຖານທີ່ດັ່ງກ່າວ ຈິ່ງເຂົ້າກວດຄົ້ນພົບເຫັນຢາເສບຕິດຈຳນວນດັ່ງກ່າວ.

ເຊິ່ງຜູ້ກະທຳຜິດທັງສາມຄົນມີ: ທ້າວເສືອຍ ອາຍຸ 34 ປີ, ນາງນຸ້ຍ ອາຍຸ 30 ປີ ທັງສອງເປັນຜົວເມຍກັນ ຢູ່ບ້ານຫ້ວຍຫວ່າງເກົ່າ ແລະ ນາງເຢັນ ອາຍຸ 24 ປີ ຢູ່ບ້ານຫ້ວຍເຮ່ຍ ເມືອງໃຫມ່ ແຂວງຜົ້ງສາລີ.

ຜ່ານການສຶບສວນ-ສອບສວນພວກກ່ຽວສາລະພາບວ່າ: ຢາເສບຕິດຈຳນວນດັ່ງກ່າວ ແມ່ນຂອງພວກກ່ຽວແທ້ ໂດຍຈະນຳໄປສົງໃຫ້ຜູ້ສັ່ງຊື້ ເຊິ່ງຈຸດນັດແມ່່ນຖຽງນາ ແຕ່ຖືກເຈົ້າໜ້າທີ່ຈັບຕົວໄດ້ກ່ອນ.

ຄະດີດັ່ງກ່າວ ພວມຢູ່ໃນຂັ້ນຕອນການສຶບສວນ-ສອບສວນ ຂະຫຍາຍຜົນຫາຜູ້ຮ່ວມຂະບວນການໄປດຳເນີນຄະດີຕາມກົດໝາຍ.

Off

Comments are closed.