06th May2019

ຊຸດຝຶກອົບຮົມການຜະລິດສື່ໂຄສະນາຕ້ານ ການຄ້າມະນຸດ ແລະ ການລັກລອບເຄື່ອນ ຍ້າຍແຮງງານຂ້າມແດນ

by somchan

ວັນທີ 6 ພຶດສະພາ 2019 ນີ້ ຢູ່ທີ່ໂຮງແຮມລາວພາຊາ ນະຄອນຫຼວງວຽງຈັນ ກອງເລຂາຄະນະກຳມະການຕ້ານການຄ້າມະນຸດລະດັບຊາດ ຮ່ວມກັບອົງການຄວບຄຸມຢາເສບຕິດ ແລະ ອາຊະຍາກຳ ອົງການສະຫະປະຊາຊາດ ໄດ້ຈັດຝຶກອົບຮົມການຜະລິດສື່ໂຄສະນາຕ້ານການຄ້າມະນຸດ ແລະ ການລັກລອບເຄື່ອນຍ້າຍແຮງງານຂ້າມແດນ. ໂດຍການໃຫ້ກຽດເຂົ້າຮ່ວມຂອງ ພັນເອກ ນາງ ລີວົງ ລາວລີ ຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ທັງເປັນຫົວໜ້າຫ້ອງການກອງເລຂາຄະນະກຳມະການຕ້ານການຄ້າມະນຸດລະດັບຊາດ, ມີຜູ້ປະຈຳການອົງການຄວບຄຸມຢາເສບຕິດ ແລະ ອາຊະຍາກຳອົງການສະຫະປະຊາຊາດ ປະຈຳ ສປປ ລາວ ພ້ອມດ້ວຍວິທະຍາກອນ ແລະ ສຳມະກອນທີ່ເຮັດວຽກງານໂຄສະນາຕ້ານການຄ້າມະນຸດ ອ້ອມຂ້າງສູນກາງເຂົ້າຮ່ວມ.

ພັນເອກ ນາງ ລີວົງ ລາວລີ ຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ຫົວໜ້າຫ້ອງການກອງເລຂາຄະນະກຳມະການຕ້ານການຄ້າມະນຸດລະດັບຊາດ ໄດ້ກ່າວວ່າ: ວຽກງານສື່ມວນຊົນແມ່ນວຽກງານໜຶ່ງມີຄວາມສຳຄັນຕໍ່ວຽກງານສະກັດກັ້ນ ແລະ ຕ້ານການຄ້າມະນຸດ. ເພາະຖ້າເຮັດວຽກງານໂຄສະນາວຽກງານສະກັດກັ້ນ ແລະ ຕ້ານການຄ້າມະນຸດໃຫ້ທົ່ວເຖິງແມ່ນເປັນປັດໃຈໃນການສ້າງສະຕິຄວາມຮັບຮູ້, ຄວາມເຂົ້າໃຈໃຫ້ກັບທຸກຄົນໃນສັງຄົມ ຕໍ່ກັບບັນຫາດັ່ງກ່າວ, ເພື່ອຕອບຕ້ານຄືນກົນອຸບາຍຂອງກຸ່ມຄົນທີ່ບໍ່ດີ ກໍ່ຄືຂະບວນການເຄືອຂ່າຍຂອງພວກຄ້າມະນຸດ, ຊຸດຝຶກອົບຮົມໃນຄັ້ງນີ້ຈະເປັນການເພີ່ມຄວາມອາດສາມາດໃຫ້ແກ່ສື່ມວນຊົນໃນການເຮັດໜ້າທີ່ວິຊາສະເພາະຢ່າງມີປະສິດທິຜົນ.

ສຳລັບບົດຮຽນທີ່ນຳມາຝຶກອົບຮົມໃນຄັ້ງນີ້ປະກອບມີ: ການສ້າງຄວາມເຂົ້າໃຈຕໍ່ການຄ້າມະນຸດ ແລະ ການເຄື່ອນຍ້າຍແຮງງານຂ້າມແດນ, ການເກັບກຳຂໍ້ມູນຂຽນບົດຂຽນຂ່າວ, ການຖ່າຍທຳວີດີໂອ, ການຕັດຕໍ່, ການລົງສື່ໂຄສະນາຕ່າງໆ ພ້ອມທັງການນຳໃຊ້ໂທລະສັບມືຖືສະມາດໂຟນໃນການໂຄສະນາອີກດ້ວຍ, ການຝຶກອົບຮົມແມ່ນດຳເນີນໄປເປັນເວລາ 10 ວັນຈຶ່ງສຳເລັດ.

Off

Comments are closed.