03rd May2019

ຍ່າງເພື່ອສຸຂະພາບ ເນື່ອງໃນໂອກາດ ວັນກຳມະກອນສາກົນ ຄົບຮອບ 133 ປີ

by somchan

ສູນກາງສະຫະພັນກຳມະບານລາວ ຮ່ວມກັບສະຫະພັນກຳມະບານກະຊວງ, ອົງການອ້ອມຂ້າງສູນກາງ ແລະ ນະຄອນຫຼວງ ຈັດຂະບວນການຍ່າງເພື່ອສຸຂະພາບ ເນື່ອງໃນໂອກາດວັນກຳມະກອນສາກົນ ຄົບຮອບ 133 ປີ ໃນຕອນເຊົ້າວັນທີ 1 ພຶດສະພາ 2019 ນີ້ ທີ່ປະຕູໄຊ ນະຄອນຫຼວງວຽງຈັນ ເປັນກຽດເຂົ້າຮ່ວມໂດຍ ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານແນວລາວສ້າງຊາດ

ມີບັນດາການນຳພັກ-ລັດ, ຄະນະບໍລິຫານງານສູນກາງສະຫະພັນກຳມະບານລາວ ຕະຫຼອດຮອດສະມາຊິກກຳມະບານ, ກຳມະກອນ, ຊາວຜູ້ອອກແຮງງານ ແລະ ປະຊາຊົນເຂົ້າຮ່ວມ.ໃນການສ້າງຂະບວນການຍ່າງເພື່ອສຸຂະພາບໃນຄັ້ງນີ້ ກໍ່ເພື່ອເປັນການສະເຫຼີມສະຫຼອງວັນກຳມະກອນສາກົນ ວັນທີ 1 ພຶດສະພາ ຄົບຮອບ 133 ປີ ແລະ ທັງເພື່ອເປັນການພົບປະສ້າງຄວາມສາມັກຄີ ແລະ ອອກກຳລັງກາຍເພື່ອສຸຂະພາບຂອງບັນດາກຳມະກອນຊາວຜູ້ອອກແຮງງານ ແລະ ເປັນການລະນຶກເຖິງວັນດັ່ງກ່າວ ເຊິ່ງກ່ອນໜ້ານີ້ 133 ປີ ກໍ່ຄືວັນທີ 1 ພຶດສະພາ ປີ 1886 ແມ່ນວັນທີ່ມີຄວາມໝາຍສຳຄັນຍິ່ງ.

ສຳລັບຊົນຊັ້ນກຳມະກອນ ແລະ ຊາວຜູ້ອອກແຮງງານໃນທົ່ວໂລກ, ເປັນວັນທີ່ຊົນຊັ້ນກຳມະກອນໄດ້ເຕົ້າໂຮມຄວາມສາມັກຄີກັນລຸກຮືຂື້ນຕໍ່ສູ້ຕ້ານການກົດຂີ່ຂູດຮີດຂອງພວກນາຍທຶນເພື່ອທວງເອົາສິດທິພື້ນຖານຂອງພົນລະເມືອງ ແລະ ຜົນປະໂຫຍດອັນຊອບທຳຂອຊົນຊັ້ນກຳມະກອນ, ເພື່ອປົກປ້ອງສິດຜົນປະໂຫຍດຂອງຕົນ ແລະ ເພື່ອນຳພາກຳມະກອນຕໍ່ສູ້ຕ້ານພວກນາຍທຶນ, ກຳມະກອນໃນປະເທດອັງກິດ ຈື່ງໄດ້ສ້າງອົງການກຳມະບານຂື້ນ, ເພື່ອເປັນຕົວແທນໃຫ້ແກ່ຊົນຊັ້ນຂອງຕົນ, ຈາກນັ້ນການຕໍ່ສູ້ຂອງຊົນຊັ້ນກຳມະກອນ, ຊາວຜູ້ອອກແຮງານ ນັບມື້ມີການເຕີບໃຫ່ຍຂະຫຍາຍຕົວຢ່າງບໍ່ຢຸດຢັ້ງ, ມາຮອດວັນທີ 1 ພຶດສະພາ 1886 ກຳມະກອນ ແລະ ຊາວຜູ້ອອກແຮງງານ ຢູ່ເມືອງຊີກາໂກ ປະເທດສະຫະລັດອາເມລິກາ ໄດ້ມີຂະບວນການຕໍ່ສູ້ຂອງກຳມະກອນຫຼາຍພັນຄົນ ຮຽກຮ້ອງໃຫ້ພວກນາຍທືນຕ້ອງປະຕິບັດຕາມການສະເໜີຂອງກຳມະກອນວ່າ: ແຕ່ນີ້ໄປບໍ່ໃຫ້ກຳມະກອນຜູ້ໃດເຮັກວຽກເກີນ 8 ຊົ່ວໂມງຕໍ່ມື້, 8 ຊົ່ວໂມງພັກຜ່ອນ ແລະ 8 ຊົ່ວໂມງຮ່ຳຮຽນ, ຈາກເຫດການຂອງວັນທີ 1 ພຶດສະພາ 1886 ມັນໄດ້ສ້າງກະແສຟອງອັນໃຫ່ຍຫຼວງ ແລະ ແຂງແຮງເຖິງຂະບວນການກຳມະກອນຢູ່ທະວີບເອີລົບ ແລະ ອາເມລິກາ ເປັນກຳລັງໃຈໃຫ້ຂະບວນການຕໍ່ສູ້ຂອງກຳມະກອນທັງເປັນບາດກ້າວແຫ່ງໄຊຊະນະ, ເປັນວັນທີ່ມີຄວາມໝາຍອັນສຳຄັນໃຫ່ຍຫຼວງຂອງຊົນຊັ້ນກຳມະກອນໃນທົ່ວໂລກ ໃນຂະບວນການຕໍ່ສູ້ເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງຕົນ.

Off

Comments are closed.