11th Oct2019

ດ່ານສາກົນຂົວມິດຕະພາບລາວ-ໄທ 1 ປະກາດການຈັດຕັ້ງຄະນະຄຸ້ມຄອງດ່ານ

by somchan

ດ່ານສາກົນຂົວມິດຕະພາບລາວ-ໄທ 1 ປະກາດການຈັດຕັ້ງຄະນະຄຸ້ມຄອງດ່ານໃນ ວັນທີ 10 ຕຸລາ 2019 ນີ້ ໂດຍການເປັນກຽດເຂົ້າຮ່ວມຂອງ ທ່ານ ຄຳມູນ ວິພົງໄຊ ຮອງລັດຖະມົນຕີກະຊວງພາຍໃນ ຜູ້ຊີ້ນຳວຽກງານປັບປຸງ ອົງການຈັດຕັ້ງ ມີ ພົຕ ວັນທອງ ກອງມະນີ ຫົວໜ້າກົມໃຫຍ່ການເມືອງ ປ້ອງກັນຄວາມສະຫງົບ. ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍພະແນກການທີ່ກ່ຽວຂ້ອງ ແຂກຖືກເຊີນ ແລະ ພະນັກງານຂັ້ນນຳພາບັນຊາເຂົ້າຮ່ວມ.

ທ່ານ ບຸນໜາ ຜາທຸມມະວົງ ຫົວຫນ້າພະແນກພາຍໃນ ນະຄອນຫລວງວຽງຈັນ ໄດ້ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນ ວ່າດ້ວຍການແຕ່ງຕັ້ງນາຍຕຳຫຼວດທີ່ຂື້ນກັບກອງບັນຊາການ ປກສ ນະຄອນຫຼວງວຽງຈັນ ໃນນີ້ແຕ່ງຕັ້ງ ພັອ ປອ ຄຳພອນ ເທບພະວົງ ຮອງກອງບັນຊາ ປກສ ນ.ວ ເປັນຫົວຫນ້າຄະນະຄຸ້ມຄອງດ່ານສາກົນຂົວມິດຕະພາບລາວ-ໄທ 1. ຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ວ່າດ້ວຍ ການແຕ່ງຕັ້ງ ທ່ານ ວິໄຊ ມະນີແສງ ຮອງຫົວໜ້າຫ້ອງຄຸ້ມຄອງ ແລະ ບໍລິການດ່ານສາກົນຂົວມິດຕະພາບລາວ-ໄທ 1 ເປັນຮອງຫົວໜ້າຄະນະຄຸ້ມຄອງ ແລະ ເປັນຫົວໜ້າຫ້ອງການບໍລິຫານ ຂອງຄະນະຄຸ້ມຄອງດ່ານສາກົນ ຂົວມິດຕະພາບລາວ-ໄທ 1. ຂໍ້ຕົກລົງຂອງລັດຖະມົນຕີກະຊວງການເງີນ ວ່າການແຕ່ງຕັ້ງຫົວໜ້າາດ່ານພາສີ ຈຳນວນ 24 ດ່ານ. ຂໍ້ຕົກລົງຂອງລັດຖະມົນຕີ ກະຊວງກະສິກຳ ແລະ ປ່າໄມ້ ວ່າດ້ວຍການແຕ່ງຕັ້ງ ທ່ານ ດາວທຽມ ຈັນທະລັງສີ ຫົວໜ້າວຽກງານກັກກັນພຶດ ແລະ ສັດ ເປັນຜູ້ຕາງໜ້າຮັບຜິດຊອບວຽກງານກັກກັນພຶດ ແລະ ສັດ, ອາຫານ ແລະ ຢາ ແລະ ຄວບຄຸມພະຍາດຕິດຕໍ່ ເຂົ້າໃນຄະນະຄຸ້ມຄອງດ່ານຊາຍແດນ ຂົວມິດຕະພາບລາວ-ໄທ 1 ຂໍ້ຕົກລົງຂອງ ລັດຖະມົນຕີກະຊວງການຕ່າງປະເທດ ວ່າດ້ວຍການແຕ່ງຕັ້ງ ທ່ານ ສົມໃຈ ປຣະພາສີຣິ ຫົວຫນ້າພະແນກເປັນຄະນະຄຸ້ມຄອງ ດ່ານສາກົນຂົວມິດຕະພາບລາວ-ໄທ 1 ຮັບຜິດຊອບດ້ານວຽກງານກົງສູນ.

ທັງນີ້ກໍ່ເພື່ອເປັນການປັບປຸງກົງຈັກການຈັດຕັ້ງຂອງດ່ານສາກົນຢູ່ແຕ່ລະຂັ້ນ ໃຫ້ມີຄວາມໜັກແໜ້ນທາງດ້ານການເມືອງ ແນວຄິດ ເຂັ້ມແຂງທາງດ້ານການຈັດຕັ້ງ ແລະ ສາມາດຕອບສະໜອງກັບຄວາມຮຽກຮ້ອງ ຕ້ອງການຂອງຫນ້າທີ່ການເມືອງໃນໄລຍະໃຫມ່.

Comments are closed.