10th Oct2019

ຕໍາຫຼວດກິ່ງແຂວງ 12 ພັນນາ ມອບລົດຈັກໃຫ້ ປກສ ແຂວງອຸດົມໄຊ

by somchan

ພິທີມອບ-ຮັບການຊ່ວຍເຫຼືອລະຫວ່າງກອງບັນຊາການຕຳຫຼວດກິ່ງແຂວງສິບສອງພັນນາ ສປ ຈີນ ກັບກອງບັນຊາການ ປກສ ແຂວງອຸດົມໄຊ ສປປ ລາວໄດ້ຈັດຂື້ນໃນຕົ້ນເດືອນ ຕຸລາ 2019 ຢູ່ທີ່ດ່ານພູຫຼັກຄຳ ເມືອງນາໝໍ້ ແຂວງອຸດົມໄຊ ສປປ ລາວ; ການກ່າວມອບໂດຍ ພັອ ເຈິງສ້ຽວເພີງ ຮອງຫົວໜ້າກອງບັນຊາກການຕຳຫຼວດກິ່ງແຂວງສິບສອງພັນນາ ສປ ຈີນ ແລະ ກ່າວຮັບໂດຍ ພັທ ພອນສະຫວັດ ສຸລິຍະທຳ ຮອງກອງບັນຊາການ ປກສ ແຂວງອຸດົມໄຊ  ສປປ ລາວ ມີພະແນກກ່ຽວຂ້ອງທັງສອງຝ່າຍເຂົ້າຮ່ວມ.

ເຄື່ອງທີ່ນຳມາມອບ ໃນຄັ້ງນີ້ແມ່ນ ລົດຈັກ ຈຳນວນ 20 ຄັນ ລວມມູນຄ່າທັງໝົດ 200.000 ຢວນສະກຸນເງິນຈີນ ເພື່ອມອບໃຫ້ ກໍາລັງ ປກສ ແຂວງອຸດົມໄຊ ນຳໄປໝູນໃຊ້ເຂົ້າໃນການປະຕິບັດໜ້າທີ່ວິຊາສະເພາະໃຫ້ມີຄວາມສະດວກສະບາຍ ແລະ ທ່ວງທັນກັບສະພາບການຕົວຈິງ ນອກນັ້ນ ຍັງເປັນການຜູກແໜ້ນຄວາມສາມັກຄີຮັກແພງ,ຊ່ວຍເຫຼືອເຊິ່ງກັນ ແລະ ກັນໃນຖານປະເທດອ້າຍນ້ອງ,ເພື່ອນມິດຍຸດທະສາດໃຫ້ຍືນຍົງຕະຫຼອດການຂອງສອງປະເທດ,ເວົ້າສະເພາະແມ່ນກອງບັນຊາການຕໍາຫຼວດກິ່ງແຂວງ 12 ພັນນາ ແລະ ກອງບັນຊາການ ປກສ ແຂວງອຸດົມໄຊ ທີ່ມີຊາຍແດນຕິດຈອດ,ເຄີຍໄປມາຫາສູ່, ພົບປະແລກປຽ່ນບົດຮຽນ,ຮ່ວມມືແກ້ໄຂສະພາບການຮ່ວມກັນແນ່ໃສ່ຮັບປະກັນຄວາມສະຫງົບ,ຄວາມເປັນລະບຽບຮຽບຮ້ອຍ.

ໂອກາດນີ້ ພັທ ພອນສະຫວັດ ສຸລິຍະທຳ ຮອງກອງບັນຊາການ ປກສ ແຂວງອຸດົມໄຊ ກໍ່ໄດ້ກ່າວຄວາມຂອບໃຈ ແລະ ຮູ້ບຸນຄຸນຕໍ່ການຊ່ວຍເຫຼືອຄັ້ງນີ້ ແລະ ຈະນຳໄປປະກອບ,ບັນຈຸເຂົ້າໃນການປະຕິບັດໜ້າທີ່ວຽກງານໃຫ້ມີປະສິດທິຜົນ.

Comments are closed.