22nd Jun2018

ຖອດຖອນບົດຮຽນການຫັນລົງກໍ່ສ້າງ ຮາກຖານການເມືອງຕິດພັນກັບການ ຈັດສັນຄວາມບໍ່ເປັນລະບຽບຮຽບຮ້ອຍ ຢູ່ໃນນະຄອນຫຼວງວຽງຈັນ

by somchan

ອົງການປົກຄອງນະຄອນຫຼວງວຽງຈັນ ຮ່ວມກັບກະຊວງ ປກສ ໄດ້ຈັດກອງປະຊຸມ ສະຫຼຸບຖອດຖອນບົດຮຽນການຫັນລົງກໍ່ສ້າງ ຮາກຖານການເມືອງຕິດພັນກັບການຈັດສັນ ຄວາມບໍ່ເປັນລະບຽບຮຽບຮ້ອຍ ຢູ່ໃນນະຄອນຫຼວງວຽງຈັນ ໄລຍະ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2018. ໃນວັນທີ 19 ມິຖຸນາ 2018 ນີ້, ໂດຍການເຂົ້າຮ່ວມຂອງ ປອ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ຫົວໜ້າຮັບຜິດຊອບວຽກງານຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງຂອງຄອນຫຼວງວຽງຈັນ, ມີຄະນະພັກກະຊວງ ປກສ, ຫົວໜ້າກົມ, ກອງບັນຊາການ, ພະແນກການອ້ອມຂ້າງ, ພ້ອມດ້ວຍພະນັກງານກໍ່ສ້າງຮາກຖານເຂົ້າຮ່ວມ.

ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ຮອງຫົວໜ້າຄະນະຮັບຜິດຊອບວຽກງານຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງຂອງນະຄອນຫຼວງວຽງຈັນ, ໄດ້ສະຫຼຸບການປະຕິບັດວຽກງານ 3 ຫຼຸດ 3 ເພີ່ມ, ຕິດພັນກັບການຈັດສັນຄວາມບໍ່ເປັນລະບຽບຮ້ອບຮຽບໃນຕົວເມືອງນະຄອນຫຼວງວຽງຈັນ, ຄະນະຮັບຜິດຊອບ ໄດ້ສົມທົບກັບພາກສ່ວນທີ່ກ່ຽວຂ້ອງລົງເກັບກຳຂໍ້ມູນ ແລະ ຈັດສັນຄວາມບໍ່ເປັນລະບຽບຮຽບຮ້ອຍຕາມເສັ້ນທາງຕ່າງໆ ໃນນະຄອນຫຼວງວຽງຈັນເຊັ່ນ: ຖະໜົນສຸພານຸວົງ, ຖະໜົນລ້ານຊ້າງ ແລະ ທາດຫຼວງເປັນຕົ້ນ, ໄດ້ລົງແກ້ໄຂບັນດາປ້າຍໂຄສະນາ, ຮົ້ວ, ກຳແພງ, ເທີບ ແລະ ອື່ນໆ. ທີ່ຕິດຕັ້ງບໍ່ຖືກຕ້ອງ ແລະ ກີດຂວາງທາງຍ່າງ, ເສັ້ນທາງການສັນຈອນຂອງລົດ. ນອກນີ້ຍັງໄດ້ລົງຈັດສັນບັນດາຮ້ານຂາຍເຄື່ອງແຄມທາງ, ຕະຫຼາດ ໃຫ້ມີຄວາມເປັນລະບຽບຮຽບຮ້ອຍ, ສະອາດງາມຕາ.

ພ້ອມນີ້ ພັນເອກ ຄຳພອນ ເທບພະວົງ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ຄະນະຮັບຜິດຊອບຊີ້ນຳວຽກງານກໍ່ສ້າງຮາກຖານການເມືອງໃນນະຄອນຫຼວງວຽງຈັນ, ກໍ່ໄດ້ສະຫຼຸບລາຍງານການຈັດຕັ້ງປະຕິບັດການກໍ່ສ້າງຮາກຖານການເມືອງ, ການແກ້ໄຂບັນຫາຕ່າງໆຢູ່ໃນຕົວເມືອງ ແລະ ຊານເມືອງໂດຍໄດ້ສົບທົບກັບພາກສ່ວນທີ່ກ່ຽວຂ້ອງ ລົງໂຄສະນາເຜີຍແຜ່ ຄຳສັ່ງແນະນຳ ຂອງກົມການເມືອງສູນກາງພັກ ວ່າດ້ວຍການເພີ່ມທະວີວຽກງານປ້ອງກັນຄວາມສະຫງົບ, ການສະກັດກັ້ນ ແລະ ຕ້ານອັກຄີໄພ ແລະ ບັນຫາປະກົດການຫຍໍ້ທໍ້ໃນສັງຄົມ ໃຫ້ພະນັກງານ-ນັກຮົບ, ປະຊາຊົນບັນດາເຜົ່າ ໃຫ້ມີຄວາມຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ, ກົດໝາຍຂອງລັດ ໃຫ້ມີສະຕິລະວັງຕົວ ຕໍ່ກົນອຸບາຍຂອງກຸ່ມຄົນບໍ່ດີ, ເອົາໃຈໃສ່ສຶກສາອົບຮົມລູກຫຼານບໍ່ໃຫ້ໄປພົວພັນກັບສິ່ງເສບຕິດ ແລະ ກຸ່ມຄົນບໍ່ດີ, ເອົາໃສ່ປະຕິບັດກົດໝາຍຢ່າງເຂັ້ມງວດ ເປັນເຈົ້າການປົກປັກຮັກສາຄວາມສະຫງົບ ຄວາມບໍ່ເປັນລະບຽບຮຽບຮ້ອຍຂອງສັງຄົມ.

Off

Comments are closed.