11th Oct2019

ຖະແຫຼງກ່ຽວກັບການຈັດຕັ້ງປະຕິບັດວຽກງານ ສະກັດກັ້ນແລະຕ້ານຢາເສບຕິດ

by somchan

ພົຕ ປອ ສົມຫັວງ ທຳມະສິດ ຮອງລັດຖະມົນຕີ, ຮອງປະທານ ຜູ້ປະຈຳການຄະນະກຳມະການແຫ່ງຊາດເພື່ອກວດກາ ແລະ ຄວບຄຸມຢາເສບຕິດ, ຫົວໜ້າຄະນະຊີ້ນຳວຽກງານກວດກາ ແລະ ຄວບຄຸມຢາເສບຕິດ ກະຊວງປ້ອງກັນຄວາມສະຫົງບ ໄດ້ຖະແຫຼງການຈັດຕັ້ງປະຕິບັດສະກັດກັ້ນ ແລະ ຕ້ານຢາເສບຕິດ ໃນໄລຍະຜ່ານມາ ເນື່ອງໃນວັນແຫ່ງຊາດຕ້ານຢາເສບຕິດ ຄົບຮອບ 18 ປີ ຄື: ວັນທີ 12 ຕຸລາ 2001- 12 ຕຸລາ 2019,

ເຊີ່ງທ່ານໄດ້ກ່າວວ່າ: ບັນຫາຢາເສບຕິດແມ່ນບັນຫາກວມລວມຂອງໂລກ ທີ່ເປັນໄພອັນຕະລາຍຢ່າງຮ້າຍແຮງຕໍ່ມວນມະນຸດ, ເປັນອຸປະສັກກົດໜ່ວງທ່ວງດຶງໃນການສ້າງສາພັດທະນາເສດຖະກິດ-ສັງຄົມຂອງໂລກ, ເປັນບໍ່ເກີດແຫ່ງການກໍ່ອາຊະຍາກຳ, ການສໍ້ລາດບັງຫຼວງທັງຍັງໄດ້ນຳເອົາຄວາມຫາຍະນະມາສູ່ຊີວິດ ແລະ ຄອບຄົວ ຜູ້ຕົກເປັນທາດຂອງມັນ, ຍ້ອນແນວນັ້ນ ໃນໄລຍະຫຼາຍປີຜ່ານມາພັກ ແລະ ລັດຖະບານ ກໍ່ຄືກຳລັງປ້ອງກັນຄວາມສະຫົງບ ໄດ້ຖືເອົາວຽກງານສະກັດກັ້ນ, ຕ້ານ ແລະ ແກ້ໄຂ ບັນຫາຢາເສບຕິດ ເປັນວຽກງານບູລິມະສິດໜື່ງທີ່ສຳຄັນ ແລະໄດ້ນຳພາ-ຊີ້ນຳການຈັດຕັ້ງປະຕິບັດວຽກງານດັ່ງກ່າວຢ່າງຈິງຈັງຕະຫຼອດມາ. ໄລຍະຜ່ານມາໄດ້ລົງສຳຫຼວດເນື້ອທີ່ລັກລອບປູກຝິ່ນປີ 2018 ມີ 4,925 ຮຕ, ທຳລາຍຖີ້ມ 486 ຮຕ, ປະຈຸບັນສູນບຳບັດປິ່ນປົວຜູ້ຕິດຢາເສບຕິດມີ 17 ແຫ່ງ, ເປີດໃຫ້ບໍລິການແລ້ວ 14 ແຫ່ງ, ມີຜູ້ເຂົ້າບຳບັດປິ່ນປົວ 2,380 ເທື່ອຄົນ, ມີໂຮງຮຽນປອດຢາເສບຕິດ 1.276 ແຫ່ງ, ບ້ານປອດຢາເສບຕິດ 5,781 ບ້ານ. ໄດ້ຕັ້ງໜ້າປະຕິບັດມາດຕະການດ້ານກົດໝາຍຕໍ່ຜູ້ກະທຳຜິດໃນການຄ້າຂາຍ, ຂົນສົ່ງຢາເສບຕິດ, ໃນໄລຍະ 9 ເດືອນ ປີ 2019 ທົ່ວປະເທດສາມາດມ້າງຄະດີໄດ້ 2,899 ເລື່ອງ, ມີຜູ້ຖືກຫາ 4,220 ຄົນ, ຄົນຕ່າງປະເທດ 76 ຄົນ, ສາມາດຢຶດຢາເສບຕິດປະເພດຢາບ້າໄດ້ 15 ລ້ານກ່ວາເມັດ, ເຮໂລອິນ 139 ກິໂລກລາມ, ຢາໄອ 3. 869 ກິໂລກະລາມ, ຝິ່ນ 36 ກິໂລກລາມ ແລະ ອື່ນໆ ໃນໄລຍະ1 ປີ ແຕ່ ເດືອນຕຸລາ 2018- ຕຸລາ 2019 ສານຕັດສິນຄະດີຢາເສບຕິດໄດ້ 2.069 ເລື່ອງ, ນັກໂທດ 2.842 ຄົນ, ຄົນຕ່າງປະເທດ 45 ຄົນ, ຢາເສບຕິດທີ່ສານຕັດສິນແລ້ວປະເພດຕ່າງໆ ມີ: ຢາບ້າ ເກືອບ 3 ລ້ານເມັດ, ເຮໂລອິນ 132 ກິໂລກະລາມ, ຢາໄອ 106 ກິໂລກະລາມ, ຝິ່ນ 82 ກິໂລກະລາມ, ຄັນຊາແຫ້ງ 433 ກິໂລກລາມ ແລະ ອື່ນໆ.

ທ່ານຍັງກ່າວຕື່ມວ່າ ເພື່ອຄວບຄຸມ ສະກັດກັ້ນ ແລະ ຕ້ານບໍ່ໃຫ້ບັນຫາຢາເສບຕິດທີ່ເປັນສາຍເຫດກໍ່ໃຫ້ເກີດມີປະກົດການຫຍໍ້ທໍ້ໃນສັງຄົມ ໄດ້ແຜ່ລະບາດອອກສູ່ວົງກ້ວາງ ແລະ ເພີ່ມທະວີຄວາມຮຸນແຮງຂຶ້ນຕື່ມນັ້ນ ໃນຕໍ່ໜ້າຮຽກຮ້ອງມາຍັງກະຊວງ, ອົງການຈັດຕັ້ງ, ທ້ອງຖິ່ນ ແລະ ກຳລັງປ້ອງກັນຄວາມສະຫົງບຂັ້ນຕ່າງໆ ຈົ່ງໄດ້ໃຫ້ຄວາມຮ່ວມມື ແລະ ຊ່ວຍເຫຼືອເອົາໃຈໃສ່ໃນການສະກັດກັ້ນ ແລະ ຕ້ານຢາເສບຕິດ ໃຫ້ເປັນພັນທະ ແລະ ໜ້າທີ່ຂອງໝົດທຸກຄົນ.

Comments are closed.