09th Sep2019

ຜົນກະທົບ ແລະ ການແກ້ໄຂຊ່ວຍເຫຼືອ ຜູ້ປະສົບໄພນ້ຳຖ້ວມ ຢູ່ແຂວງພາກກາງ ແລະ ພາກໃຕ້.

by somchan

ທ່ານ ວິໄລ ພົງສີສົມຫວັງ ວ່າການຫົວໜ້າກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ ໄດ້ຕາງໜ້າກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດຖະແຫຼງຂ່າວຜ່ານສື່ມວນຊົນ ກ່ຽວກັບສະພາບຜົນກະທົບ ແລະ ການແກ້ໄຂຊ່ວຍເຫຼືອສຸກເສີນຜູ້ປະສົບໄພນ້ຳຖ້ວມ ຢູ່ບັນດາແຂວງພາກກາງ ແລະ ໃຕ້ຂອງລາວ.

ໃນວັນທີ 8 ກັນຍານີ້ ເຊິ່ງທ່ານໄດ້ກ່າວວ່າ: ຕໍ່ກັບຜົນກະທົບຈາກອິດທິພົນຂອງລົມພະຍຸໜຸນເຂດຮ້ອນໂພດູ ແລະ ລົມພະຍຸດີເປຣຊັນ ທີ່ພັດຜ່ານເຂົ້າລາວໃນໄລຍະທ້າຍເດືອນສິງຫາຫາຕົ້ນເດືອນກັນຍາ 2019 ເຮັດໃຫ້ມີຝົນຕົກໜັກ ແລະ ເກີດນ້ຳຖ້ວມຢູ່ 6 ແຂວງຄື: ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ແຂວງອັດຕະປື, ສົ່ງຜົນກະທົບໂດຍກົງຕໍ່ປະຊາຊົນໃນ 37 ເມືອງ, 1,187 ບ້ານ, 122,892 ຄອບຄົວ, 224,604 ຄົນ ໃນນີ້ມີຜູ້ເສຍຊີວິດ 10 ຄົນ, ແຂວງສະຫວັນນະເຂດ 3 ຄົນ, ສາລະວັນ 2 ຄົນ ແລະ ຈຳປາສັກ 5 ຄົນ, ຍົກຍ້າຍ 7,559 ຄອບຄົວ, ບ້ານເຮືອນຂອງປະຊາຊົນຈຳນວນຫຼາຍຖືກນ້ຳຖ້ວມ, ເນື້ອທີ່ນາ 1 ແສນກວ່າເຮັກຕາ, ສວນ 251 ເຮັກຕາ, ໜອງປາ 1,922 ໜອງ ຖືກນ້ຳຖ້ວມ ແລະ ສັດລ້ຽງຫຼາຍກວ່າ 300 ໂຕຖືກຍ້າຍໄປຢູ່ບ່ອນທີ່ປອດໄພ, ຊົນລະປະທານ 33 ແຫ່ງ, ອ່າງເກັບນ້ຳ 43 ແຫ່ງ, ເສ້ັນທາງຄົມມະນາຄົມຖືກຕັດຂາດຫຼາຍກວ່າ 252 ກິໂລແມັດ, ຂົວ 12 ແຫ່ງ, ໂຮງຮຽນ 215 ແຫ່ງ, ໂຮງໝໍ ແລະ ສຸກສາລາ 10 ແຫ່ງ, ຕໍ່ກັບສະພາບຜົນກະທົບ ແລະ ຄວາມເສຍຫາຍຈາກເຫດການໄພນ້ຳຖ້ວມໃນຄັ້ງນີ້ ອຳນາດການປົກຄອງ ແລະ ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນທອງຖິ່ນໄດ້ປະຕິບັດໃຫ້ການຊ່ວຍເຫຼືອສຸກເສີນທັນທີ ໂດຍໄດ້ນຳກຳລັງແຮງຂອງພະນັັກງານ, ທະຫານ, ຕຳຫຼວດ ແລະ ປະຊາຊົນພາຍໃນບ້ານປະຕິບັດການຍົກຍ້າຍທັງຄົນ ແລະ ຊັບສິນໄປບ່ອນທີ່ປອດໄພ, ຈັດສັນສະຖານທີ່ພັກເຊົ່າຊົ່ວຄາວ ແລະ ສະໜອງບັນເທົາທຸກສຸກເສີນຂັ້ນພື້ນຖານດ້ານເຄື່ອງອຸປະໂພກ-ບໍລິໂພກເປັນຕົ້ນ ອາຫານ, ນ້ຳດື່ມ, ເຄື່ອງໃຊ້ຄົວເຮືອນ, ຢາປົວພະຍາດ ແລະ ອື່ນໆ.

Off

Comments are closed.