29th Jun2015

ທ່ານນາຍົກເນັ້ນ 7 ບັນຫາເພື່ອສະກັດກັ້ນຢາເສບຕິດ

by somchan

ດັ່ງທີ່ຮູ້ນຳກັນແລ້ວວ່າຢາເສບຕິດແມ່ນບັນຫາ ທີ່ເປັນໄພອັນຕະລາຍຢ່າງຮ້າຍແຮງຕໍ່ມວນມະນຸດ, ເປັນການກົດໜ່ວງຖ່ວງດຶງການສ້າງສາພັດທະນາ ແຕ່ລະປະເທດ, ເປັນບໍ່ເກີດຂອງການກໍ່ອາຊະຍາກຳ, ສໍ້ລາດບັງຫຼວງ ແລະຍັງໄດ້ນຳເອົາຄວາມເສື່ອມເສຍມາສູ່ຊີວິດ ຊັບສິນ ແລະຄອບຄົວຂອງຜູ້ທີ່ພົວພັນກັບຢາ ເສບຕິດ, ຕໍ່ສະພາບການດັ່ງກ່າວທ່ານນາຍົກລັດຖະ ມົນຕີມີຄວາມເປັນຫວງເປັນໃຍຕໍ່ລູກຫຼານທີ່ເປັນອະນາຄົດຂອງຊາດ ທ່ານຈຶ່ງໄດ້ເນັ້ນໃຫ້ທຸກພາກສ່ວນໃນສັງຄົມຮ່ວມປະຕິບັດ 7 ບັນຫາສຳຄັນ ເພື່ອສະກັດກັ້ນບັນຫາຢາເສບຕິດບໍ່ໃຫ້ແຜ່ອອກສູ່ວົງກ້ວາງ.

ທ່ານທອງສິງ ທຳມະວົງ ນາຍົກລັດຖະມົນຕີໄດ້ມີສານໃນໂອກາດສະເຫຼີມສະຫຼອງວັນສາກົນຕ້ານຢາເສບຕິດຄົບຮອບ 28 ປີ( 26 ມິຖຸນາ) ລະບຸບາງເນື້ອໃນວ່າ: ຍ້ອນຢາເສບຕິດເປັນບັນຫາຮ້າຍແຮງຕໍ່ມວນມະນຸດ ພັກ ແລະລັດ ຈຶ່ງໄດ້ຖືເອົາການສະກັດກັ້ນ ແລະ ແກ້ໄຂຢາເສບຕິດເປັນໜ້າທີ່ສຳຄັນ ແລະ ຈຳເປັນ ໂດຍການຊີ້ນຳ-ນຳພາທຸກພາກສ່ວນໃນສັງຄົມເອົາໃຈໃສ່ສະກັດກັ້ນແລະແກ້ໄຂບັນຫານີ້ຢ່າງຈິງຈັງຕະຫຼອດມາ ກ່ຽວກັບມາດຕະການແກ້ໄຂ້ບັນຫາດັ່ງກ່າວ ພວກເຮົາໄດ້ເອົາໃຈໃສ່ສຶກສາອົບຮົມປະຊາຊົນ ໂດຍສະເພາະແມ່ນຊາວໜຸ່ມ-ເຍົາວະຊົນ ໃຫ້ຮັບຮູ້ເຂົ້າໃຈກ່ຽວກັບພິດໄພ ແລະຜົນຮ້າຍຂອງຢາເສບຕິດ ດ້ວຍການໂຄສະນາເຜີຍແຜ່ແນວທາງນະໂຍບາຍ, ລະບຽບກົດໝາຍ, ມະຕິຄຳສັ່ງຕ່າງໆ ກ່ຽວກັບບັນຫາຢາເສບຕິດ ພ້ອມກັນນັ້ນກໍ່ໄດ້ຊ່ວຍເຫຼືອ ແລະ ສ້າງເງື່ອນໄຂໃຫ້ປະຊາຊົນຜູ້ທີ່ຢູ່ເຂດພູດອຍຫ່າງໄກສອກຫຼີກ ໄດ້ມີຊີວິດການເປັນຢູ່ດີຂຶ້ນ ດ້ວຍການຫັນໄປປະກອບອາຊີບທີ່ໜັ້ນຄົງແທນການປູກຝິ່ນ, ຟືນຟູສຸຂະພາບ ຝືກວີຊາຊີບຜູ້ຖືກເຄາະຮ້າຍຈາກຢາເສບຕິດໃນແຕ່ລະປີເປັນຈຳນວນຫຼາຍສົມຄວນ; ສຳລັບການປະຕິບັດມາດຕະການທາງດ້ານກົດໝາຍ ຫຼາຍທ້ອງຖິ່ນກໍເຮັດໄດ້ດີ ເປັນຕົ້ນແມ່ນເຈົ້າໜ້າທີ່ໄດ້ມ້າງຄະດີ ແລະຈັບກຸມຜູ້ລະເມີດກົດຫໝາຍດ້ວຍການຢຶດຢາເສບຕິດປະເພດຕ່າງໆໄດ້ເປັນຈຳນວນຫຼາຍ. ການປະຕິບັດວຽກງານ 3 ສ້າງເປັນຕົ້ນແມ່ນການສ້າງບ້ານແລະໂຮງຮຽນປອດຢາເສບຕິດໃນແຕ່ລະທ້ອງຖິ່ນກໍໄດ້ເຮັດຢ່າງເປັນຂະບວນ ແລະເກິດມີຄອບຄົວຕົວແບບປອດຢາເສບຕິດຢູ່ຫຼາຍທ້ອງຖິ່ນ  ນອກຈາກນັ້ນກໍໄດ້ເອົາໃຈໃສ່ປະຕິບັດພັນທະ ແລະ ສົນສັນຍາທີ່ ສປປລາວເປັນພາຄີ ນີ້ແມ່ນໝາກຜົນຂອງການປະກອບສ່ວນຂອງທຸກພາກສ່ວນໃນສັງຄົມ ກໍຄືການຮ່ວມມືຊ່ວຍເຫຼືອຂອງບັນດາປະເທດເພື່ອນມິດແລະອົງການຈັດຕັ້ງສາກົນຕ່າງໆຢ່າງມີໝາກຜົນຕົວຈິງ.

ທ່ານນາຍົກກ່າວວ່າ: ການຜະລິດແລະຄ້າຂາຍຢາເສບຕິດໄດ້ກາຍເປັນຂະບວນການຂ້າມຊາດ, ເຖິ່ງວ່າຫຼາຍປະເທດໄດ້ເພີ່ມທະວີມາດຕະການ ແລະ ຄວາມພະຍາຍາມໃນການປ້ອງກັນແລະ ແກ້ໄຂບັນຫານີ້ປານໃດກໍຕາມ ແຕ່ການເຄື່ອນໄຫວກ່ຽວກັບບັນຫາດັ່ງກ່າວ ກໍມີທ່າອ່ຽງຂະຫຍາຍຕົວ ແລະເພີ່ມທະວີຄວາມຮຸນແຮງຢ່າງໜ້າເປັນຫ່ວງ.

ສຳລັບ ສປປລາວ ການຄ້າຂາຍຢາເສບຕິດກໍໄດ້ແຜ່ລາມຈາກຕົວເມືອງໄປສູ່ຊົນນະບົດຫ່າງໄກສອກຫຼີກຢ່າງໄວວາເຊິ່ງໄດ້ມີຊາວໜຸ່ມ,ນັກຮຽນ-ນັກສຶກສາແລະກຳມະກອນຈຳນວນບໍ່ໜ້ອຍກໍໄດ້ຕົກເປັນທາດຂອງຢາເສບຕິດຊຶ່ງຜູ້ໄດ້ຮັບເຄາະຮ້າຍເຫຼົ່ານີ້ໄດ້ສ້າງບັນຫາໃຫ້ແກ່ສັງຄົມແລະຄອບຄົວຕົນເອງ ຮັດໃຫ້ເກີດມີປະກົດການຫຍໍ້ທໍ້ໃນສັງຄົມ ເປັນແມ່ນການຂີ້ລັກງັດແງະ, ປຸ້ນຈີ້ ຊີງຊັບ, ອຸປະຕິເຫດທາງທ້ອງຖະໜົນ, ການກໍອາລະວາຕີກັນແລະອື່ນໆ.

ດັ່ງນັ້ນເພື່ອບໍ່ໃຫ້ບັນຫາຢາເສບຕິດແຜ່ລະບາດອອກສູ່ວົງກ້ວາງ ແລະເພີ່ມທະວີຄວາມຮຸນແຮງຂຶ້ນຕື່ມທຸກພາກສ່ວນໃນສັງຄົມຈົ່ງເອົາໃຈໃສ່ 7 ບັນຫາຕົ້ນຕໍດັ່ງນີ້:

ສືບຕໍ່ການສຶກສາອົບຮົມ-ໂຄສະນາເຜີຍແຜ່ຢ່າງກ້ວາງຂວາງດ້ວຍຫຼາຍຮູບການ ໂດຍຜ່ານສື່ມວນຊົນລວມທັງກອງປະຊຸມ-ສຳມະນາ ການສ້າງຂະບວນການກິລາ ການສະແດງສິນລະປະວັນນະຄະດີ ແລະ ການສ້າງຂະບວນການອື່ນໆ. ເພື່ອສ້າງຈິດສຳນຶກໃຫ້ທຸກຄົນເຫັນໄດ້ພິດໄພແລະຜົນຮ້າຍຂອງຢາເສບຕິດ ທັງປຸກລະດົມໃຫ້ເຂົາຕື່ນຕົວ ແລະສະໝັກໃຈເຂົ້າຮ່ວມຂະບວນການແກ້ໄຂຢາເສບຕິດຢ່າງຕັ້ງໜ້າ.

ເອົາໃຈໃສ່ກວດກາສຶກສາອົບຮົມ ແລະຊ່ວຍເຫຼືອປະຊາຊົນທີ່ໄດ້ຢຸດເຊົາການປູກຝິ່ນແລ້ວນັ້ນ ໃຫ້ມີເງື່ອນປະກອບອາຊີບອື່ນທີ່ໝັ້ນຄົງ ພ້ອມກັນນັ້ນກໍຕ້ອງໄດ້ຕິດຕາມຢ່າງໃກ້ຊິດເພື່ອບໍ່ໃຫ້ເຂົາເຈົ້າກັບຄືນໄປປູກຝິ່ນອີກ.

ສຶບຕໍ່ເອົາໃຈໃສ່ການບຳບັດປິ່ນປົ່ວຟືນຟູສຸຂະພາບ ແລະຝຶກວິຊາຊີບໃຫ້ຜູ້ທີ່ຖືກເຄາະຮ້າຍຈາກຢາເສບຕິດປະເພດຕ່າງໆໃຫ້ກັບຄືນສູ່ສະພາບປົກກະຕິ, ຄືນສູ່ສັງຄົມມີວຽ   ກເຮັດງານທຳແລະ ກາຍເປັນພົນລະເມືອງດີຂອງຊາດ ຄ່ຽງຄູ່ກັນນັ້ນກໍຕ້ອງໄດ້ປັບປຸງ ແລະ ຍົກລະດັບບັນດາສູນປິ່ນປົ່ວທີ່ມີຢູ່ແລ້ວໃຫ້ໄດ້ມາດຕະຖານເພື່ອບໍລິການຮັບໃຊ້ສັງຄົມໃຫ້ດີກ່ວາເກົ່າ.

ຖືເອົາການແກ້ໄຂບັນຫາຢາເສບຕິດເປັນວຽກງານຈຸດສຸມໃນວຽກງານການກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ຢູ່ຂັ້ນບ້ານ ແລະ ກຸມບ້ານ ພ້ອມກັນນີ້ກໍໃຫ້ສຶບຕໍ່ຂຶ້ນບັນຊີບັນດາເປົ້າໝາຍທີ່ພົວພັນກັບບັນຫາຢາເສບຕິດເພື່ອຫາວິທີແກ້ໄຂຢ່າງທັນການ, ສຳລັບຄ້າຂາຍຢາເສບຕິດກໍຕ້ອງດຳເນີນຄະດີຕາມລະບຽບກົດໝາຍຢ່າງເດັດຂາດເຂັ້ມງວດ.

ໃຫ້ແຕ່ລະແຂວງຄົ້ນຄ້ວາເພື່ອສ້າງຕັ້ງກອງທຶນຕ້ານຢາເສບຕິດ ດ້ວຍແຫຼ່ງທຶນຕ່າງໆຕາມເງື່ອນໄຂ ແລະຄວາມສມາດຕົວຈິງ.

ສຶບຕໍ່ປັບປຸງກົງຈັກການຈັດຕັ້ງຂອງອົງການກວດກາ ແລະຄວບຄຸມຢາເສບຕິດ ໃຫ້ມີຄວາມເຂັ້ມແຂງສາມາດເປັນບັນນາທິການໃຫ້ແກ່ພັກ-ລັດ ໃນການແກ້ໄຂບັນຫາຢາເສບຕິດ.

ເພິ່ມທະວີການພົວພັນ ແລະ ຮ່ວມມືກັບບັນດາປະເທດເພື່ອມິດ ແລະ ອົງການຈັດຕັ້ງສາກົນຕ່າງໆໃຫ້ຫຼາຍຂຶ້ນກ່ວາເກົ່າ ເພື່ອພ້ອມກັນແກ້ໄຂການລັກລອບ ການຄ້າຂາຍ ແລະລຳລຽງ ຂົນສົ່ງຢາເສບຕິດໄດ້ຢ່າງທັນການ.

Off

Comments are closed.