08th May2018

ທ່ານຮອງລັດຖະມົນຕີ ກະຊວງ ປກສ ລົງພົບປະ ແລະ ຊີ້ນຳວຽກງານກໍ່ສ້າງ ຮາກຖານການເມືອງຢູ່ເມືອງ ສີໂຄດຕະບອງ

by somchan

ພົນຕີ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ທັງເປັນຫົວໜ້າ ຄະນະຮັບຜິດຊອບ ຊີ້ນຳວຽກງານກໍ່ສ້າງຮາກຖານການເມືອງ ຢູ່ນະຄອນຫຼວງວຽງຈັນ ໄດ້ລົງຊີ້ນຳວຽກງານ ແລະ ພົບປະໂອ້ລົມພະນັກງານກໍ່ສ້າງຮາກຖານການເມືອງ ຢູ່ເມືອງສີໂຄດຕະບອງ ນະຄອນຫຼວງວຽງຈັນ ຕົ້ນເດືອນພຶດສະພານີ້ ມີບັນດາຄະນະຮັບຜິດຊອບວຽກງານກໍ່ສ້າງຮາກຖານການເມືອງ ປກສ ກຸ່ມ ແລະ ພະນັກງານກໍ່ຮາກຖານເຂົ້າຮ່ວມ.

ພັທ ຄຳສິງ ນານມຸນຕີ ຫົວໜ້າກອງບັນຊາການ ປກສ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ສະຫຼຸບລາຍງານວຽກງານຕ່າງໆ ໃນການລົງກໍ່ສ້າງຮາກຖານການເມືອງ ຢູ່ເມືອງສີໂຄດຕະບອງ ນະຄອນຫຼວງວຽງຈັນ ໃນ 1 ເດືອນຜ່ານມາ ໃຫ້ທ່ານຮອງລັດຖະມົນຕີ ໄດ້ຮັບຊາບ ເປັນຕົ້ນ ການຈັດຕັ້ງປະຕິບັດວຽກງານ ວິຊາສະເພາະ ໃນການປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ, ການສະກັດກັ້ນ ແລະ ແກ້ໄຂປະກົດການຫຍໍ້ທໍ້, ການເກັບກຳສະພາບ, ການຂຶ້ນທະບຽນອອກປື້ມສຳມະໂນຄົວ ແລະ ອື່ນໆ.

ຜ່ານການຈັດຕັ້ງປະຕີບັດວຽກງານຕົວຈິງ ໃນ 1 ເດືອນ ທົ່ວເມືອງມີສະພາບປະກົດການຫຍໍ້ທໍ້ເກີດຂຶ້ນ 22 ເລື່ອງ ຈັບຕົວຜູ້ກະທຳຜິດມາດຳເນີນຄະດີໄດ້ 24 ຄົນ ແລະ ໃນນີ້ແກ້ໄຂສຳເລັດແລ້ວ 22 ເລື່ອງ ປະກົດການຫຍໍ້ທໍ້ທີ່ເກີດຂຶ້ນ ທຽບໃສ່ເດືອນຜ່ານມາແມ່ນຫຼຸດລົງ 10 ເລື່ອງ, ຄະດີທີ່ເກີດຂຶ້ນຫຼາຍແມ່ນລັກຊັບພົນລະເມືອງ, ເປັນຕົ້ນແມ່ນລັກລົດຈັກເຊິ່ງມີ ລົດຈັກເສຍ 17 ຄັນ, ຄຳຮູບປະພັນ 20 ບາດ ແລະ ອື່ນໆ. ຄະດີຢາເສບຕິດ 8 ເລື່ອງ, ຈັບຕົວຜູ້ກະທຳຜິດມາດຳເນີນຄະດີໄດ້ 36 ຄົນ, ຢຶດຢາເສບຕິດປະເພດຢາບ້າໄດ້ 940 ເມັດ ແລະ ອື່ນໆ. ປັດຈຸບັນການປະຕິບັດວຽກງານກໍ່ສ້າງຮາກຖານການເມືອງ ຢູ່ເມືອງສີໂຄຕະບອງ ສາມາດເຮັດສຳເລັດແລ້ວ 17 ບ້ານ ໃນ 60 ບ້ານ.

ໃນໂອກາດນີ້ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ. ທັງເປັນຫົວໜ້າຄະນະຮັບຜິດຊອບ ຊີ້ນຳວຽກງານກໍ່ສ້າງຮາກຖານການເມືອງ ຢູ່ນະຄອນຫຼວງຈັນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງຄະນະພັກ-ຄະນະບັນຊາຮອງກໍ່ສ້າງຮາກຖານຢູ່ເມືອງສີໂຄດຕະບອງ ພ້ອມທັງໄດ້ມີຄຳເຫັນຊີ້ນຳໃຫ້ຄະນະພັກ- ຄະນະຮັບຜິດຊອບ ແລະ ພະນັກງານກໍ່ສ້າງຮາກຖານຕ້ອງໄດ້ສືບຕໍ່ເອັາໃຈໃສ່ເປັນຕົນ ສືບຕໍຈັດຕັ້ງປະຕິບັດຕາມແຜນການ ໂຄງການເຊັ່ນ: ວຽກງານຫັນກຳສະພາບ ວຽກງານຄຸ້ມຄອງຄົນຕ່າງປະເທດ, ການຂຶ້ນທະບຽນສຳມະໂນຄົວ ການອອກບັດປະຈຳຕົວໃຫ້ປະຊາຊົນ ແລະ ວຽກງານອື່ນໆ.

Off

Comments are closed.