10th Jul2019

ທ່ານຮອງລັດຖະມົນຕີ ຕ້ອນຮັບຄະນະຈາກ ກະຊວງຕຳຫຼວດຫວຽດນາມ.

by somchan

ວັນທີ 9 ກໍລະກົດ 2019 ນີ້ ພົນຕີ ປອ ສົມຫວັງ ທຳມະສິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ພັນເອກ ວູ ກວັກ ຖັງ ຮອງຫົວໜ້າຫ້ອງການອົງການຕຳຫຼວດສືບສວນ-ສອບສວນ ກະຊວງຕຳຫຼວດຫວຽດນາມ ພ້ອມຄະນະ. ໃນໂອກາດທີ່ທ່ານໄດ້ມາເຂົ້າຮ່ວມກອງປະຊຸມຮ່ວມມືສະກັດກັ້ນ ແລະ ຕ້ານອາຊະຍາກຳ ລະຫວ່າງກຳລັງຕຳຫຼວດລາວ ແລະ ກຳລັງຕຳຫຼວດຫວຽດນາມຄັ້ງທີ 10.

ໂອກາດນີ້ ພົນຕີ ປອ ສົມຫວັງ ທຳມະສິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ສະແດງຄວາມຕ້ອນຮັບຢ່າງອົບອຸ່ນ ຕໍ່ການເຂົ້າຢ້ຽມຂ່ຳນັບຄັ້ງນີ້, ພ້ອມກັນນີ້ ພັນເອກ ວູ ກວັກ ຖັງ ຮອງຫົວໜ້າຫ້ອງການອົງການຕຳຫຼວດສືບສອນ-ສອບສວນ ກະຊວງຕຳຫຼວດຫວຽດນາມ ໄດ້ລາຍງານການເຂົ້າຮ່ວມກອງປະຊຸມຮ່ວມມືສະກັດກັ້ນ ແລະ ຕ້ານອາຊະຍາກຳ ລະຫວ່າງກຳລັງຕຳຫຼວດລາວ ແລະ ກຳລັງຕຳຫຼວດຫວຽດນາມ ຄັ້ງທີ 10 ໃຫ້ທ່ານຮອງລັດຖະມົນຕີຮັບຊາບ ເຊິ່ງທັງສອງຝ່າຍໄດ້ປຶກສາຫາລືກັນ ແລກປ່ຽນກັນສະພາບການຈັດຕັ້ງປະຕິບັດຮ່ວມມືກັນໃນໄລຍະຜ່ານມາ ແລະ ຄົ້ນຄວ້າທິດທາງການແກ້ໄຂບັນຫາອາຊະຍາກຳຕ່າງໆຮ່ວມກັນໃນຕໍ່ໜ້າ. ເປັນຕົ້ນ ແມ່ນການຮ່ວມມືແລກປ່ຽນຂໍ້ມູນຂ່າວສານໃນຂອບເຂດວຽກງານຕຳຫຼວດ, ບັນຫາການລັກລອບຄ້າຂາຍຢາເສບຕິດ, ການຄ້າມະນຸດ, ການກະທຳຜິດທາງດ້ານເສດຖະກິດ ແລະ ວຽກງານອື່ນໆມີຜົນສຳເລັດຕາມລະດັບຄາດໝາຍ.

ໂອກາດດຽວກັນ ທ່ານຮອງລັດຖະມົນຕີ ກໍ່ໄດ້ຕີລາຄາສູງຕໍ່ຜົນສຳເລັດຂອງກອງປະຊຸມ ເຊິ່ງທັງສອງຝ່າຍໄດ້ຮ່ວມມືກັນສະກັດກັ້ນ ແລະ ຕ້ານອາຊະຍາກຳຕ່າງໆ ພ້ອມທັງເນັ້ນໜັກໃຫ້ທັງສອງຝ່າຍສືບຕໍ່ຮ່ວມມືກັນ ໃນການແກ້ໄຂບັນຫາອາຊະຍາກຳ ໂດຍສະເພາະແມ່ນບັນຫາຄ້າຂາຍຢາເສບຕິດຕາມຊາຍແດນ ເພື່ອເຮັດໃຫ້ບັນດາແຂວງທີ່ມີຊາຍແດນຕິດຈອດກັນ ເປັນຊາຍແດນທີ່ສະຫງົບ ແລະ ປາສະຈາກບັນຫາອາຊະຍາກຳດ້ານຕ່າງໆ ແລະ ເພື່ອຮັບປະກັນໃຫ້ທັງສອງປະເທດ ມີຄວາມສະຫງົບ ຄວາມເປັນລະບຽບຮ້ອຍຮຽບໃນສັງຄົມ.

Comments are closed.