01st Aug2018

ທ່ານ​ຮອງ​ລັດຖະມົນຕີ ກະຊວງ ປກສ ຢ້ຽມຢາມ​ຢູ່​ພາກ​ສະໜາມ ການ​ກອບ​ກູ້​ໄພພິບັດ ​ເມືອງ​ສະໜາມ​ໄຊ ​ແຂວງ​ອັດ​ຕະປື

by somchan

​ໃນ​ຕອນ​ບ່າຍ ຂອງ​ວັນ​ທີ 30 ກໍ​ລະ​ກົດ 2018 ນີ້ ພົຕ ສິນ​ທະ​ວົງ ​ໄຊ​ຍະ​ກອນ ຮອງ​ລັດຖະມົນຕີ ກະຊວງ ປກສ ​ໄດ້​ລົງ​ພົບ​ປະ​ຢ້ຽມຢາມ ​ເຈົ້າ​ໜ້າ​ທີ່​ແຕ່ລະ​ໜ່ວຍ​ງານ ​ແລະ ປະຊາຊົນ ທີ່​ປະສົບ​ໄພພິບັດ​ນ້ຳ​ຖ້ວມ ຢູ່​ເມືອງ​ສະໜາມ​ໄຊ ​ແຂວງ​ອັດ​ຕະປື ​ໂດຍ​ມີ​ຄະນະ​ຮັບຜິດຊອບ ​ສູນ​ບັນຊາ​ການພາກ​ສະໜາມ ​ໃຫ້ການ​ຕ້ອນຮັບ.

ຄະນະ​ຮັບຜິດຊອບ​ແຕ່ລະ​ໜ້າ​ວຽກ ​ໃຫ້ການ​ຊ່ວຍ​ເຫຼືອ ​ແລະ ຊອກ​ຫາ​ຜູ້​ຖືກ​ເຄາະ​ຮ້າຍ ກໍ່​ໄດ້​ລາຍ​ງານ​ຜົນ​ຂອງ​ການ​ປະຕິບັດ​ໜ້າທີ່ວຽກ​ງານ​ຂອງ​ຕົນ ​ແລະ ສຳລັບ​ວຽກ​ງານ ປ້ອງ​ກັນ​ຄວາມ​ສະຫງົບ ພັທ ​ໂພ​ໄຊ ສຸ​ລິ​ວົງສາ ຮອງ​ຫົວໜ້າ​ກອງ​ບັນຊາ​ການ ປກສ ​ແຂວງ​ອັດ​ຕະປື ຜູ້​ຊີ້​ນຳ​ວຽກ​ງານ ປກສ ຢູ່​ພາກ​ສະໜາມ ​ເມືອງ​ສະໜາມ​ໄຊ ​ແຂວງ​ອັດ​ຕະປື ພ້ອມ​ດ້ວຍ​ຄະນະ ຮັບຜິດຊອບ​ວຽກ​ງານ ປກສ ​ໄດ້​ລາຍ​ງານ​ກ່ຽວ​ກັບ​ການຈັດ​ຕັ້ງ​ປະຕິບັດ​ໜ້າ​ທີ່ ​ໂດຍ​ສະ​ເພາະ ​ແມ່ນ​ການ​ປ້ອງ​ກັນ​ຮັກສາ​ຄວາມ​ປອດ​ໄພ ຕາມ​ຈຸດ​ພັກ​ເຊົາ​ຊົ່ວຄາວ​ຂອງ​ຜູ້​ປະສົບ​ໄພ, ການ​ອຳນວຍ​ຄວາມ​ສະດວກ​ທາງ​ດ້ານ​ການ​ສັນຈອນ, ການ​ປ້ອງ​ກັນ​ສຳນັກງານ, ຈຸດ​ທີ່​ພັກ​ຂອງ​ໜ່ວຍ​ກູ້​ໄພ​ພາກສ່ວນ​ຕ່າງໆ, ຈຸດ​ເກັບ​ມ້ຽນ​ເຄື່ອງ​ບໍລິຈາກຊ່ວຍ​ເຫຼືອ ​ແລະ ສົມທົບ​ກູ້​ໄພ​ຊ່ວຍ​ເຫຼືອ​ຜູ້​ຖືກ​ເຄາະ​ຮ້າຍ​ອີກ​ດ້ວຍ.

​ໃນ​ໂອກາດ​ດັ່ງກ່າວ ພົຕ ສິນ​ທະ​ວົງ ​ໄຊ​ຍະ​ກອນ ກໍ​ໄດ້​ກ່າວ​ຍ້ອງຍໍ​ຊົມ​ເຊີຍ​ຕໍ່​ເຈົ້າ​ໜ້າ​ທີ່ ​ແລະ ໜ່ວຍ​ງານ​ທີ່​ຊ່ວຍ​ເຫຼືອ​ທຸກ​ພາກສ່ວນ ທີ່​ໄດ້​ສຸມ​ໃສ່​ປະຕິບັດ​ໜ້າທີ່ວຽກ​ງານ​ຢ່າງ​ຕັ້ງໜ້າ ​ແລະ ​ເນັ້ນ​ໃຫ້​ທຸກ​ພາກສ່ວນ ​ເພີ່ມ​ທະວີ​ແຕ່ລະ​ໜ້າ​ວຽກ​ໃຫ້​ມີ​ຜົນສຳ​ເລັດ ພ້ອມ​ດຽວ​ກັນ​ນີ້ ທ່ານ​ລັດຖະມົນຕີ​ກໍ່​ໄດ້​ພົບ​ປະ​ຢ້ຽມຢາມ ​ເຈົ້າ​ໜ້າ​ທີ່​ປ້ອງ​ກັນ​ຕາມ​ຈຸດ​ຕ່າງໆ, ບັນດາ​ໜ່ວຍ​ກູ້​ໄພ​ຈາກ​ພາຍ​ໃນ ​ແລະ ຕ່າງປະ​ເທດ ພ້ອມ​ດ້ວຍ​ປະຊາຊົນ​ຜູ້​ຖືກ​ເຄາະ​ຮ້າຍ ​ເພື່ອ​ໃຫ້​ກຳລັງ​ໃຈ ​ແລະ ທ່ານ​ເຊື່ອ​ໜັ້ນວ່າ​ທຸກ​ຄົນ​ຈະ​ຕ້ອງ​ຜ່ານ​ພາ​ວິ​ກິດ​ໃນ​ຄັ້ງ​ນີ້​ໄປ​ພ້ອມ​ໆ​ກັນ.

Off

Comments are closed.