12th Jul2019

ທ່ານ ຮອງນາຍົກລັດຖະມົນຕີ ຢ້ຽມຢາມ ແລະ ເຮັດວຽກຢູ່ແຂວງ ໄຊຍະບູລີ

by somchan

ໃນວັນທີ 12 ກໍລະກົດ ນີ້ ທ່ານ ປອ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ ໄດ້ລົງຢ້ຽມຢາມ ແລະ ເຮັດວຽກຢູ່ແຂວງ ໄຊຍະບູລີ, ໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ, ມີບັນບັນດາເຈົ້າເມືອງ 11 ເມືອງ, ມີຫົວໜ້າ, ຮອງຫົວໜ້າພະແນກການ, ກົມກອງອ້ອມຂ້າງແຂວງ ໃຫ້ການຕ້ອນຮັບ.

ທ່ານ ພົງສະຫວັນ ສິດທະວົງ, ເຈົ້າແຂວງ ໄຊຍະບູລີ ໄດ້ລາຍງາຍສະພາບການພັດທະນາເສດຖະກິດ-ສັງຄົມຂອງແຂວງ ໄຊຍະບູລີໃຫ້ ທ່ານຮອງນາຍົກລັດຖະມົນຕີຊາບໂດຍໄດ້ກ່າວວ່າ: ພາຍໃຕ້ການຊີ້ນໍາ-ນໍາພາ ໂດຍກົງຂອງຄະນະພັກ, ອົງການປົກຄອງຂັ້ນຕ່າງໆ ຢູ່ພາຍໃນແຂວງ ໄຊຍະບູລີ ແມ່ນສາມາດບຸກບືນຜ່ານຜ່າ ແລະ ມີຜົນສໍາເລັດຫຼາຍດ້ານ ເປັນຕົ້ນຮັບປະກັນທາງດ້ານສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ມີຄວາມເປັນລະບຽບຮຽຍຮ້ອຍໂດຍພື້ນຖານ, ເສດຖະກິດ, ການຜະລິດຂອງປະຊາຊົນ ໄດ້ຮັບການເສີມຂະຫຍາຍຢ່າງແຂງແຮງ ແຕ່ກໍ່ປາສະຈາກບໍ່ໄດ້ໃນບາງດ້ານໂດຍສະເພາະແມ່ນກະທົບຈາກໄພແຫ້ງແລ້ງແກ່ຍາວ ແລະ ສັດຕູພືດ ທໍາລາຍຜົນລະປູກຂອງປະຊາຊົນ ເປັນບໍລິເວນກວ້າງ, ຄາດວ່າ ການເຕີບໂຕເສດຖະກິດຂອງແຂວງ ຈະບໍ່ບັນລຸຄາດໝາຍວາງໄວ້, ທ່ານເຈົ້າແຂວງຍັງໄດ້ກ່າວຕື່ມອີກວ່າ: ບັນຫາທີ່ໜ້າເປັນຮ່ວງໃນປະຈຸບັນແມ່ນ ສະພາບໄພແຫ້ງແລ້ງ, ປີນີ້ ເຫັນວ່າຮ້າຍແຮງກວ່າທຸກໆປີຜ່ານມາ, ມາຮອດປະຈຸບັນການປັກດໍາເຂົ້ານາປີແມ່ນສໍາເລັດພຽງ 42,09% ຂອງເນື້ອທີ່ນາທັງໝົດ, ເນື້ອທີ່ໆໄດ້ປັກດໍາສ່ວນໃຫຍ່ແມ່ນເນື້ອທີ່ໄດ້ຮັບນໍ້າຊົນລະປະທານ, ຍ້ອນຝົນບໍ່ຕົກແກ່ຍາວຫຼາຍວັນ ແລະ ອີກບັນຫາແມ່ນການລະບາດຂອງບົ້ງຝູງ ທໍາລາຍຕົ້ນສາລີຢ່າງຮ້າຍແຮງ ແລະ ເປັນບໍລິເວນກວ້າງເກີດຂຶ້ນໝົດທຸກໆເມືອງໃນທົ່ວແຂວງ, ຈາກນັ້ນ ທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ ກໍ່ໄດ້ໃຫ້ກຽດໂອ້ລົມຕໍ່ການນໍາຂອງແຂວງ, ກ່ອນອື່ທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ແຂວງຍາດມາໄດ້ ແລະ ໄດ້ຮຽກຮ້ອງມາຍັງການນໍາແຂວງທຸກພາກສ່ວນ, ເອົາໃຈໃສ່ໃນການສ້າງເສດຖະກິດຂອງແຂວງໃຫ້ບັນລຸຕາມເປົ້າໝາຍທີ່ວາງໄວ້, ສືບຕໍ່ແກ້ໄຂ ແລະ ຊ່ວຍເຫຼືອປະຊາຊົນທີ່ຖືກຜົນກະທົບຈາກໄພພິບັດທາງທໍາມະຊາດເປັນຕົ້ນແມ່ນ: ໄພແຫ້ງແລ້ງ, ຝຸງບົ້ງທໍາລາຍພືດ, ການລະບາດຂອງພະຍາດໄຂຍຸງລາຍ, ສືບຕໍ່ຊຸກຍູ້ຂະບວນການຜະລິດລະດູຝົນ,ສົ່ງເສີມໃຫ້ປະຊາຊົນປູກໄມ້ອຸດສາຫະກຳ ແລະ ພືດເປັນສິນຄ້າ, ແກ້ໄຂບັນຫາໄມ້ຕົກຄ້າງຢູ່ຕາມໂຮງຈັກ, ໂຮງງານແຫ່ງຕ່າງໆ, ພ້ອມນີ້ກໍ່ເປັນເຈົ້າການແກ້ໄຂບັນຫາປະກົດການຫຍໍ້ທໍ້ໃນສັງຄົມເປັນຕົ້ນແມ່ນ, ຕ້ານ ແລະ ສະກັດກັ້ນຂະບວນການຄ້າມະນຸດ, ການສໍ້ລາດບັງຫຼວງບັນຫາຢາເສບຕິດ ແລະ ອື່ນໆ.

Comments are closed.