02nd Aug2018

ນາຍົກລັດຖະມົນຕີ ພ້ອມຄະນະ ລົງພື້ນທີ່ພາກສະໜາມກູ້ໄພພິບັດນ້ຳຖ້ວມ ຢູ່ເມືອງສະໜາມໄຊ

by somchan

ໃນວັນທີ 1 ສິງຫາ 2018 ນີ້ ການນຳພັກ-ລັດ ນຳໂດຍ ພະນະທ່ານ ທອງລຸນ ສີສຸລິດ ນາຍຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍທ່ານ ພົທ ຈັນສະໜອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ທ່ານ ເລັດ ໄຊຍະພອນ ເຈົ້າແຂວງໆອັດຕະປື ແລະ ຄະນະ ໄດ້ລົງຕິດຕາມ, ກວດກາ ແລະ ພົບປະໂອ້ລົມ ຄະນະຮັບຜິດຊອບວຽກງານກູ້ໄພພິບັດນ້ຳຖ້ວມ ຢູ່ເມືອງສະໜາມໄຊ ແຂວງອັດຕະປື.

 

ການພົບປະໂອ້ລົມໃນຄັ້ງນີ້ ກໍ່ເພື່ອຕິດຕາມກວດກາຕົວຈິງ ຜົນເສຍຫາຍ ແລະ ຜົນກະທົບໄພພິບັດໃນຄັ້ງນີ້. ທ່ານ ພົຕ ຄຳລຽງ ອຸທະໄກສອນ ຮອງຫົວໜ້າກົມໃຫ່ຍເສນາທິການ ກອງທັບ ກະຊວງປ້ອງກັນປະເທດ ທັງເປັນຜູ້ຊີ້ນຳ ສູນບັນຊາການກອບກູ້ໄພພິບັດນ້ຳຖ້ວມຢູ່ ເມືອງສະໜາມໄຊ ແຂວງອັດຕະປື ໄດ້ລາຍງານຜົນຂອງການຈັດຕັ້ງປະຕິບັດການຄົ້ນຫາ ແລະ ຊ່ວຍເຫຼືອ ຜູ້ໄດ້ຮັບຜົນກະທົບຈາກໄພພິບັດໃນຄັ້ງນີ້ ໃຫ້ທ່ານນາຍົກລັດຖະມົນຕີ ແລະ ຄະນະຮັບຊາບ.

 

ໃນໂອກາດດັ່ງກ່າວ ທ່ານນາຍົກລັດຖະມົນຕີ ກໍ່ໄດ້ກ່າວຍ້ອງຍໍຊົມເຊີຍຕໍ່ການສຸມໃສ່ປະຕິບັດ ການຄົ້ນຫາ ແລະ ຊ່ວຍເຫຼືອຜູ້ປະສົບໄພ ຂອງເຈົ້າໜ້າທີ່ແຕ່ລະໜ່ວຍງານ ທີ່ໄດ້ເສຍສະຫຼະເຫຼື່ອແຮງ ເຮັດໜ້າທີ່ຢ່າງຕັ້ງໜ້າ ພ້ອມທັງໄດ້ເນັ້ນໜັກໃຫ້ທຸກພາກສ່ວນຈົ່ງເພີ່ມທະວີ ແລະ ໃຊ້ທຸກວິທີທາງ ເພື່ອກອບກູ້ເອົາຜູ້ທີ່ຍັງສູນຫາຍກັບຄືນສູ່ອ້ອມອົກ ຍາດຕິພີ່ນ້ອງຂອງຜູ້ປະສົບໄພ.

ໃນໂອກາດດຽວກັນນີ້ ທ່ານນາຍົກລັດຖະມົນຕີ ຍັງໄດ້ລົງຢ້ຽມຢາມພົບປະ ບັນດາພະນັກງານ ໜ່ວຍກູ້ໄພຂອງແຕ່ລະພາກສ່ວນ ແລະ ປະຊາຊົນ ຜູ້ປະສົບໄພພິບັດ ເພື່ອໃຫ້ກຳລັງໃຈ ພ້ອມທັງໃຫ້ຄຳໜັ້ນສັນຍາວ່າ ລັດຖະບານລາວຈະໃຫ້ການຊ່ວຍເຫຼືອຢ່າງສຸດຄວາມສາມາດ ເພື່ອຟຶ້ນຟູຊີວິດການເປັນຢູ່ໃຫ້ຜູ້ປະສົບໄພໃນຄັ້ງນີ້.

Off

Comments are closed.