22nd Aug2018

ນາຍົກລັດຖະມົນຕີລົງຕິດຕາມຊຸກຍູ້ ແລະ ໃຫ້ກຳລັງໃຈປະຊາຊົນທີ່ປະສົບໄພນ້ຳຖ້ວມ

by somchan

ໃນວັນທີ 20 ສິງຫາ ນີ້ ທ່ານ ທອງລຸນ ສີສຸລິດ ນາຍຍົກລັດຖະມົນຕີ ພ້ອມດ້ວຍຄະນະ ໄດ້ລົງຕິດຕາມ ລະດັບນ້ຳ ຢູ່ແຄມຂອງ ສວນເຈົ້າອານຸວົງ ເນື່ອງຈາກປະລິມານນ້ຳຂອງ ໄດ້ເພີ່ມຂື້ນສູງ ເນື່ອງຈາກໄດ້ຮັບ ຜົນກະທົບ ຈາກ ອິດທິພົນ ຂອງພາຍຸເບບິນກາ ແລະ ໄດ້ສົ່ງຜົນເຮັດໃຫ້ ນ້ຳໄດ້ໄຫຼເຂົ້າຖ້ວມຕະຫຼາດນັດ ແລະ ເຮືອນປະຊາຊົນ ທີ່ອາໄສຢູ່ລຽບຕົມ ແຄມນ້ຳຂອງ ເພື່ອເປັນການຊຸກຍູ້ ແລະ ໃຫ້ກຳລັງໃຈປະຊາຊົນ ທີ່ໄດ້ຮັບຜົນກະທົບ ຈາກໄພນ້ຳ ຖ້ວມ ເຊິ່ງພາກສ່ວນທີ່ກ່ຽວຂ້ອງ ກໍ່ໄດ້ມີການກຽມພ້ອມ ແລະ ແຈ້ງເຕືອນ ປະຊາຊົນທີ່ຢູ່ລຽບແຄມ ແມ່ນ້ຳຂອງ ໃຫ້ມີສະຕິເຝົ້າລະວັງນ້ຳຖ້ວມ ກະທັນຫັນ ພ້ອມທັງມີການຈັດຕັ້ງເວນຍາມ ຕະຫຼອດ 24 ຊົ່ວໂມງ, ຈາກນັ້ນ ທ່ານ ນາຍຍົກລັດຖະມົນຕີ ຍັງໄດ້ລົງຕິດຕາມ ສະພາບການນ້ຳຖ້ວມ ແລະ ຊຸກຍູ້ໃຫ້ກຳລັງໃຈປະຊາຊົນ ຢູ່ບ້ານໜອງດາ ເມືອງສີໂຄດຕະບອງ ທີ່ໄດ້ຮັບຜົນກະທົບ ຈາກໄພນ້ຳຖ້ວມ ເນື່ອງປະລິມານນ້ຳຂອງໄດ້ໄຫຼລົ້ນຕາຝັ່ງ ເຂົ້າ ຖ້ວມບ້ານເຮືອນ ແລະ ໄຮ່ນາຮົ້ວສວນຂອງປະຊາຊົນ ເຮັດໃຫ້ມີເຄື່ອງປູກຂອງຝັງ, ສັດລ້ຽງ ແລະ ວັດຖຸຊັບສິນຂອງປະຊາຊົນມີຄວາມເສຍຫາຍເປັນຈຳນວນຫຼາຍ.

ໂອກາດດຽວກັນນີ້ ທ່ານນາຍຍົກລັດຖະມົນຕີ ຍັງໄດ້ເນັ້ນໜັກໃຫ້ບັນດາກະຊວງ, ອົງການຈັດຕັ້ງທີ່ກ່ຽວຂ້ອງ ໂດຍສະເພາະຄະນະກຳມະການຕ້ານ ແລະ ຄວບຄຸມໄພພິບັດຂັ້ນນະຄອນຫຼວງວຽງຈັນ ເອົາໃຈໃສ່ກຽມພ້ອມຮັບມື ກັບໄພນ້ຳຖ້ວມ ເປັນຕົ້ນແມ່ນຢູ່ບັນດາເມືອງ, ບ້ານຕ່າງໆທີ່ຢູ່ຕິດກັບແມ່ນ້ຳຂອງ ແລະ ສາຂາແມ່ນ້ຳອື່ນໆ ໃຫ້ກະກຽມພາຫະນະພ້ອມທັງຂົນສົ່ງລຳລຽງຊາຍ ສຳລັບເຮັດຄູກັ້ນນ້ຳ ຕາມຈຸດຕ່າງໆ ແລະ ແຈ້ງເຕືອນ, ແຈ້ງຂໍ້ ມູນຂ່າວສານກ່ຽວກັບສະພາບການຂອງນ້ຳຖ້ວມເປັນປົກກະຕິ ແລະ ທົ່ວເຖິງ ເພື່ອໃຫ້ປະຊາຊົນຮັບຮູ້  ແລະ ມີສະຕິປ້ອງກັນບັນຫາຈາກໄພນ້ຳຖ້ວມ.

Off

Comments are closed.