30th Jul2018

ນາຍົກລັດຖະມົນຕີ ເນັ້ນໃຫ້ເລັ່ງຄົ້ນຫາ ຜູ້ສູນຫາຍ ຢູ່ເມືອງສະໜາມໄຊ ໃຫ້ໄດ້ໄວທີ່ສຸດ

by somchan

ທ່ານ ທອງລຸນ ສີສຸລິດ ນາຍຍົກລັດຖະມົນຕີ ແຫ່ງ ສປປ ລາວ ໄດ້ລົງຢ້ຽມຢາມສູນຮັບການບໍລິຈາກເຄື່ອງ ຊ່ວຍເຫຼືອຜູ້ປະສົບໄພນ້ຳຖ້ວມ ແຂວງອັດຕະປື ຢູ່ສູນກະຊວງແຮງງານ ແລະ ສະຫວັດດີການສັງຄົມ ເຊິ່ງເປັນສູນໃຫ່ຍ ແລະ ເປັນສູນລວມຂອງການ ຮັບເຄື່ອງບໍລິຈາກຜູ້ປະສົບໄພນ້ຳຖ້ວມ. ໃນວັນທີ 29 ກໍລະກົດ ນີ້ ເຊິ່ງທ່ານໄດ້ສະແດງຄວາມຂອບໃຈຕໍ່ປະຊາຊົນລາວບັນດາເຜົ່າ ກໍ່ຄືເພືອນມິດຍຸດທະສາດ, ບັນດາປະເທດໃຫ້ຄຽງ ປະເທດຕ່າງໆທີ່ໃຫ້ການຊ່ວຍເຫຼືອປະຊາຊົນ ຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້.

ທ່ານ ທອງລຸນ ສີສຸລິດ ຍັງໄດ້ກ່າວຕື່ມອີກວ່າ: ວຽກງານຕໍ່ໜ້າໃນການກູ້ໄພໃນຄັ້ງນີ້ ແມ່ນຈະໄດ້ສຸມໃສ່ຊອກຄົ້ນຫາຜູ້ສູນຫາຍ ໃຫ້ໄດ້ໄວເທົ່າຈະໄວໄດ້, ສ່ວນທີ່ພົບເຫັນຜູ້ລອດຊີວິດຈະໄດ້ນຳມາຢູ່ຈຸດທີ່ປອດໄພ ແລະ ໃຫ້ການຊ່ວຍເຫຼືອໃຫ້ດີທີ່ສຸດ.

ເມື່ອລະດັບນ້ຳຫຼຸດລົງຄະນະຮັບຜິດຊອບ ຫຼື ບັນດາໜ່ວຍງານຕ່າງໆກໍ່ຈະໄດ້ຊ່ວຍປະຊາຊົນ ກັບຄືນສູ່ບ້ານເຮືອນທ້ອງຖິ່ນຂອງເຂົາເຈົ້າ ແລະ ຝືນຝູ່ເຮືອນຊານທີ່ຖືກເປ່ເພເສຍຫາຍ ໃຫ້ເຂົາເຈົ້າສາມາດດຳລົງຊີວິດຢ່າງປົກກະຕິ ແລະ ລັດຖະບານເອງກໍ່ຈະໄດ້ວາງແຜນຝືນຝູ່ ເມືອງສະໜາມໄຊ ທີ່ຖືກຜົນກະທົບນີ້ຢ່າງມີລະບົບ. ນອກຈາກນີ້ລັດຖະບານຍັງຈະໄດ້ຈັດຕັ້ງການສືບສວນ-ສອບສວນຢ່າງເຂັ້ມງວດຕໍ່ເຫດການທີ່ເກີດຂື້ນ ເພື່ອຊອກໃຫ້ເຫັນເຫດຜົນ ແລະ ສາເຫດເພື່ອຈະໄດ້ດຳເນີນການກວດກາ ບໍລິສັດອອກແບບ, ບໍລິສັດຮັບເໝົາກໍ່ສ້າງ, ບໍລິສັດທີ່ປຶກສາ ແລະ ກວດກາຄວາມຮັບຜິດຊອບ ຂອງເຈົ້າໜ້າທີ່ຢ່າງເຂັ້ມງວດ ແລະ ໂປ່ງໃສ ແລະ ຍຸດຕິທຳ.

Off

Comments are closed.