06th Dec2018

ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ ຢ້ຽມຢາມ ສປປ ລາວ

by somchan

ໂດຍຕອບສະໜອງຕາມຄຳເຊີນຂອງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ສົມເດັດ ອັກຄະ ມະຫາເສນາບໍດີ ເຕໂຈ ຮຸນແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 5-6 ທັນວາ 2018.

ພິທີຕ້ອນຮັບ ສົມເດັດ ອັກຄະ ມະຫາເສນາບໍດີ ເຕໂຈ ຮຸນແຊນ ພ້ອມດ້ວຍຄະນະຜູ້ແທນຂັ້ນສູງ ແຫ່ງ ຣາຊະອານາຈັກ ກຳປູເຈຍ ຢ່າງເປັນທາງການ ໄດ້ຈັດຂື້ນຢ່າງສົມກຽດ ທີ່ສຳນັກງານນາຍົກລັດຖະມົນຕີ ໃນວັນທີ 5 ທັນວາ 2018, ພະນະທ່ານ ທອງລຸນ ສີສຸລິດ ໄດ້ນຳພາ ສົມເດັດ ອັກຄະ ມະຫາເສນາບໍດີ ເຕໂຈ ຮຸນແຊນ ໄປຍັງແທ່ນກຽດຕິຍົດ ເພື່ອເຄົາລົບທຸງຊາດກຳປູເຈຍ, ລາວ ພ້ອມທັງໄດ້ຍ່າງກວດແຖວທະຫານກອງກຽດຕິຍົດກອງທັບປະຊາຊົນລາວ ຈາກນັ້ນທັງສອງນາຍົກ ໄດ້ນຳພາຄະນະຜູ້ແທນຂັ້ນສູງເຂົ້າຮ່ວມກອງປະຊຸມພົບປະສອງຝ່າຍ.

ພະນະທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ ສົມເດັດ ນາຍົກລັດຖະມົນຕີ ຮຸນ ແຊນ ພ້ອມດ້ວຍຄະນະຜູ້ແທນຂັ້ນສູງ ແຫ່ງ ຣາຊະອານາຈັກ ກຳປູເຈຍ ທີ່ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນຄັ້ງນີ້ ພ້ອມທັງໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດ ຂອງການເລືອກຕັ້ງສະມາຊິກສະພາແຫ່ງຊາດ ຊຸດທີ 6 ຂອງຣາຊະອານາຈັກ ກຳປູເຈຍ ທີ່ຜ່ານມາ ແລະ ຊົມເຊີຍ ສົມເດັດ ເຕໂຈ ຮຸນ ແຊນ ທີ່ໄດ້ຖືກແຕ່ງຕັ້ງເປັນນາຍົກລັດຖະມົນຕີອີກຄັ້ງ ຊຶ່ງເປັນການຢືນຢັນເຖິງຄວາມປີຊາສາມາດ ໃນການຊີ້ນຳນຳພາຂອງສົມເດັດ ຕະຫຼອດໄລຍະຜ່ານມາ ໃນໂອກາດດັ່ງກ່າວ ທັງສອງຝ່າຍຍັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງປະເທດທີ່ໄດ້ຮັບການພັດທະນາ ແລະ ຂະຫຍາຍຕົວຂື້ນເລື້ອຍໆ, ເຊິ່ງເຫັນໄດ້ຈາກການແລກປ່ຽນການຢ້ຽມຢາມຂອງການນຳຂັ້ນສູງ ລະຫວ່າງສອງປະເທດຢ່າງປົກກະຕິ ສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບການທີ່ພົ້ນເດັ່ນຂອງສອງປະເທດ ພ້ອມທັງທົບທວນຄືນການຮ່ວມມືສອງຝ່າຍໃນໄລຍຜ່ານມາ ແລະ ປຶກສາຫາລືທິດທາງການຮ່ວມມືໃນຕໍ່ໜ້າ ສອງຝ່າຍຍັງໄດ້ປຶກສາຫາລືກັນ ກ່ຽວກັບການຮ່ວມມືສອງຝ່າຍໃນດ້ານຕ່າງໆຕື່ມອີກເຊັ່ນ: ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ດ້ານກົງສູນ, ດ້ານໂຍທາທິການ ແລະ ຂົນສົ່ງ, ດ້ານວັດທະນະທໍາ ແລະ ທ່ອງທ່ຽວ, ດ້ານການຄ້າ ແລະ ການລົງທືນ, ບັນຫາຊາຍແດນ ແລະ ການຮ່ວມມືໃນຂອບວຽກງານດ້ານເສດຖະກິດພູມິພາກ ຫຼື ເຂດສາມຫລ່ຽມເສດຖະກິດ CLV ພ້ອມນັ້ນ ສອງຝ່າຍຍັງໄດ້ແລກປ່ຽນຄຳຄິດຄຳເຫັນຕໍ່ບັນຫາພາກພື້ນ ແລະ ສາກົນ ທີ່ຕ່າງຝ່າຍມີຄວາມສົນໃຈຮ່ວມກັນ. ພາຍຫຼັງສຳເລັດການພົບປະສອງຝ່າຍ, ໄດ້ມີຖະແຫຼງການຮ່ວມ ຊຶ່ງທັງສອງຝ່າຍຕ່າງກໍໄດ້ຢືນຢັນຄືນເຖິງຄວາມມຸ້ງໜ້າ ໃນການສືບຕໍ່ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ທີ່ເປັນມູນເຊື້ອ ແລະ ການຮ່ວມມືທີ່ດີ ທີ່ມີມາແຕ່ດົນນານລະຫວ່າງສອງປະເທດ ກໍຄືສອງລັດຖະບານ ໃຫ້ນັບມື້ແໜ້ນແຟ້ນຍິ່ງໆຂື້ນ ບົນພື້ນຖານເຄົາລົບອະທິປະໄຕ, ຄວາມສະເໜີພາບ ຕ່າງຝ່າຍຕ່າງມີຜົນປະໂຫຍດຮ່ວມກັນ ສອງຝ່າຍໄດ້ເຫັນດີໃຫ້ບັນດາກະຊວງ ແລະ ຂະແໜງການກ່ຽວຂ້ອງ ສືບຕໍ່ຈັດຕັ້ງປະຕິບັດຕາມເນື້ອໃນສັນຍາ  ແລະ ຂໍ້ຕົກລົງຕ່າງໆ ທີ່ສອງຝ່າຍໄດ້ເຊັນກັນຜ່ານມາໃຫ້ນັບມື້ແຕກດອກອອກຜົນຫລາຍຂື້ນ. ຈາກນັ້ນທັງສອງຝ່າຍກໍ່ໄດ້ເຫັນດີ ໃຫ້ຮັກສາສະຖານະພາບເດີມໃນບໍລິເວນຊາຍແດນທີ່ຍັງຄົງຄ້າງ ໂດຍປາສະຈາກສິ່ງປຸກສ້າງຕ່າງໆທີ່ພາໃຫ້ມີການປ່ຽນແປງສະພາບບໍລິເວນດັ່ງກ່າວ ຈົນກວ່າສອງຝ່າຍຈະສຳເລັດການສຳຫຼວດ ແລະ ປັກຫຼັກໝາຍຊາຍແດນ.

ສອງນາຍົກລັດຖະມົນຕີໄດ້ເຂົ້າຮ່ວມເປັນສັກຂີພິຍານໃນການລົງນາມເອກະສານ 4 ສະບັບຄື: ບົດບັນທຶກຄວາມເຂົ້າໃຈລະຫວ່າງ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານແຫ່ງ ຣາຊະອານາຈັກ ກຳປູເຈຍ ວ່າດ້ວຍການຮ່ວມມືດ້ານວັດທະນະທຳ ແລະ ສິລະປະກຳ ສັນຍາລະຫວ່າງ ກະຊວງສຶກສາທິການ ແລະ ກິລາ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງສຶກສາ, ຊາວໜຸ່ມ ແລະ ກິລາ ແຫ່ງ ຣາຊະອານາຈັກ ກຳປູເຈຍ ວ່າດ້ວຍການຮ່ວມມືດ້ານການສຶກສາ , ບົດບັນທຶກຄວາມເຂົ້າໃຈ ລະຫວ່າງກະຊວງກະສິກຳ ແລະ ປ່າໄມ້ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງກະສິກຳ, ປ່າໄມ້ ແລະ ການປະມົງ ຣາຊະອານາຈັກ ກຳປູເຈຍ ວ່າດ້ວຍການສົ່ງຊ້າງລ້ຽງໄປສະແດງສິລະປະ ແລະ ແລກປ່ຽນວັດທະນະທຳ ທີ່ສວນສັດຊາຟາຣີ ນະຄອນຫຼວງພະນົມເປັນ ຣາຊະອານາຈັກ ກຳປູເຈຍ ແລະ ບົດບັນທຶກຄວາມເຂົ້າໃຈລະຫວ່າງ ລັດວິສາຫະກິດໄຟ້າລາວ ແລະ ໄຟ້າກຳປູເຈຍ ກ່ຽວກັບສັນຍາຊື້ຂາຍໄຟ້າແຮງສູງຂະໜາດ 230 KV ແລະ 500 KV ຈາກສະຖານີໄຟຟ້າບ້ານຫາດ, ສປປ ລາວ ຫາ ສະຖານີໄຟ້າສະຕຣອງ ແຕຣງ, ກຳປູເຈຍ.

Comments are closed.