25th Jun2018

ນາຍົກລັດຖະມົນຕີ ແຫ່ງ ສປປ ລາວ ຕ້ອນຮັບການເຂົ້າຢ້ຽມຂ່ຳນັບຂອງ ຮອງປະທານປະເທດ ແຫ່ງ ສສ ຫວຽດນາມ.

by somchan

ໃນວັນທ 19 ມິຖຸນາ 2018 ທີ່ສຳນັກງານນາຍົກ ລັດຖະມົນຕີ, ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ສະຫາຍ ນາງ ດັ້ງ ຖິ ຫງ໋ອກ ທິ້ງ ກຳມະການຄະນະ ບໍລິຫານງານສູນກາງພັກກອມມູນິດ ຫວຽດນາມ, ຮອງປະທານປະເທດ ແຫ່ງ ສສ ຫວຽດນາມ.

ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີທີ່ໄດ້ຕ້ອນຮັບ ສະຫາຍ ນາງ ດັ້ງ ຖິ ຫງ໋ອກ ທິ້ງ, ເຊິ່ງການຢ້ຽມຢາມໃນຄັ້ງນີ້, ເປັນການເພີ່ມພູນຄູນສ້າງໄມຕີຈິດມິດຕະພາບອັນດູດດຶ່ມ ແຫ່ງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ມີມາແຕ່ດົນນານແລ້ວນັ້ນ ໃຫ້ແໜ້ນແຟ້ນຍິ່ງຂຶ້ນ, ທັງເປັນການກະຕຸກຊຸກຍູ້ການຮ່ວມມືລະຫວ່າງ ສອງປະເທດ ລາວ-ຫວຽດນາມ ໃຫ້ເກີດໝາກຜົນຕົວຈິງ. ພ້ອມກັນນັ້ນ, ສອງຝ່າຍຍັງໄດ້ປຶກສາຫາລື ກ່ຽວກັບການພົວພັນຮ່ວມມື ທາງດ້ານເສດຖະກິດ, ວັດທະນະທຳ, ວິທະຍາສາດ-ເຕັກນິກ, ການຄ້າ ແລະ ການລົງທຶນ ຂອງສອງປະເທດໃນໄລຍະຜ່ານມາ. ສອງຝ່າຍລ້ວນແຕ່ມີຄວາມພະຍາຍາມ ຈັດຕັ້ງຜັນຂະຫຍາຍບັນດາຂໍ້ຕົກຂອງສອງກົມການເມືອງ ກໍ່ຄືສອງລັດຖະບານ ຊຶ່ງມີຫຼາຍກິດຈະກຳ ທີ່ໄດ້ຮັບຜົນສຳເລັດຕາມຄາດໝາຍ. ອັນສຳຄັນແມ່ນໄດ້ມີນັກທຸລະກິດ ແລະ ບັນດາຫົວໜ່ວຍທຸລະກິດ ຂອງຫວຽດນາມ ໄດ້ມີຄວາມສົນໃຈ ແລະ ໄດ້ມາລົງທຶນຢູ່ ສປປ ລາວ ຫຼາຍຂຶ້ນ, ເປັນຕົ້ນແມ່ນ: ດ້ານອຸດສາຫະກຳ, ປູກຝັງ-ລ້ຽງສັດ ແລະ ດ້ານອື່ນໆອີກ. ສິ່ງເຫຼົ່ານີ້ ໄດ້ຊ່ວຍສ້າງທາງອອກໃຫ້ແກ່ປະຊາຊົນລາວ ໃນການທຳມາຫາກິນ ແລະ ຫຼຸດຜ່ອນຄວາມທຸກຍາກຢູ່ທ້ອງຖິ່ນຕ່າງໆ ບ່ອນທີ່ມີໂຄງການລົງທຶນຂອງຫວຽດນາມ ແລະ ສອງຝ່າຍຈະສືບຕໍ່ຊຸກຍູ້ ບັນດາໂຄງການທີ່ໄດ້ລົງທຶນເພື່ອສຳເລັດຕາມລະດັບຄາດໝາຍທີ່ວາງໄວ້.

Off

Comments are closed.