22nd Nov2017

ບັນດາ​ຄະນະ​ຜູ້​ແທນອາ​ຊຽນເດີນທາງ​ຮອດ​ ນະຄອນຫຼວງ​ວຽງຈັນ ​ເພື່ອ​ເຂົ້າ​ຮ່ວມ​ກອງ​ປະຊຸມ ຫົວໜ້າ ຕມ ອາຊຽນ

by somchan

ບັນດາ​ຄະນະ​ຜູ້​ແທນຕຳຫຼວດ​ກວດ​ຄົນ​ເຂົ້າ-​ອອກ ​ເມືອງປະ​ເທດ​ໃນ​ອາ​ຊຽນ ​ໄດ້​ເດີນທາງ​ຮອດ ນະຄອນຫຼວງ​ວຽງ​ຈັນ ສປປ ລາວ ​ໃນ​ວັນ​ທີ 20 ພະຈິກ 2017 ​ເພື່ອ​ເຂົ້າ​ຮ່ວມ​ກອງ​ປະຊຸມ ​ຫົວໜ້າ​ກົມ​ຕຳຫຼວດ​ກວດ​ຄົນ​ເຂົ້າ-​ອອກ​ເມືອງ ​ແລະ ຫົວໜ້າ​ພະ​ແນ​ກກົມ​ກົງ​ສູນ​ກະຊວງ​ ການ​ຕ່າງປະ​ເທດ ອາ​ຊຽນ ຄັ້ງ​ທີ່ 21 ທີ່ ສປປ ລາວ ​ໄດ້​ຮັບ​ກຽດ​ເປັນ​ເຈົ້າພາບທີ່​ຈັດ​ຂື້ນ​ໃນ​ລະຫວ່າງ 20-25 ພະຈິກ 2017 ​ໂດຍ​ການ​ຕ້ອນຮັບ​ຂອງ ພັທ ສາຍ​ສະໜິງ ສີວິ​ໄລ ຫົວໜ້າ​ກົມ​ຕຳຫຼວດ​ກວດ​ຄົນ​ເຂົ້າ-​ອອກ​ເມືອງ, ກົມ​ໃຫ່ຍສັນຕິ​ບານ ກະຊວງ​ປ້ອງ​ກັນ​ຄວາມ​ສະຫງົບ ພ້ອມ​ດ້ວຍ​ຄະນະ ຢູ່​ໂຮງ​ແຮມ​ແລນ​ມາກ ​ແມ່​ຂອງຣີ​ເວີ​​ໄຊ.

ບັນດາ​ຄະນະ​ຜູ້​ແທນ ທີ່​ມາ​ຮອດ​ນະຄອນຫຼວງ​ວຽງ​ຈັນ ​ໃນ​ນີ້​ມີ ສສ ຫວຽດນາມ ນຳ​ໂດຍ ພົຈວ ​ເລ​ຊວນ​ວຽນ ຫົວໜ້າ​ກົມ​ຕຳຫຼວດ-​ກວດ​ຄົນ​ເຂົ້າ​ອອກ​ເມືອງ ກະຊວງ​ຕຳຫຼວດ ສສ ຫວຽດນາມ ຜູ້​ແທນຣາດສະ​ອານາຈັກ​ກຳປູ​ເຈຍ, ຄະນະ​ຜູ້​ແທນ​ປະ​ເທດ ບູ​ໄນ, ອິນ​ໂດ​ນີ​ເຊຍ, ມາ​ເລ​ເຊຍ, ມຽນມາ, ຟີ​ລິ​ປິ່ນ ​ແລະ ສິງກະ​ໂປ.

ພັທ ສາຍ​ສະໜິງ ສີວິ​ໄລ ​ໄດ້​ກ່າວ​ສະ​ແດງ​ຄວາມ​ຍິນ​ດີ​ຕ້ອນຮັບ​ບັນດາ​ຄະນະ​ຜູ້​ແທນ​ແຕ່ລະ​ປະ​ເທດ​ໃນ​ອາ​ຊຽນ ທີ່​ເດີນທາງ​ເຂົ້າ​ຮ່ວມ​ກອງ​ປະຊຸມ​ໃນ​ຄັ້ງ​ນີ້ ​ເຊິ່ງ​ໃນ​ກອງ​ປະຊຸມ ບັນດາ​ຄະນະ​ຜູ້​ແທນ​ຕຳຫຼວດ​ກວດ​ຄົນ​ເຂົ້າ-​ອອກ​ເມືອງ ​ແລະ ພະ​ແນ​ກກົມ​ກົງ​ສູນ​ກະຊວງ​ການ​ຕ່າງປະ​ເທດ​ອາ​ຊຽນ ຈະ​ໄດ້​ປຶກສາ​ຫາລື ການ​ກວດ​ຄົນ​ເຂົ້າ-​ອອກ​ເມືອງ, ການ​ສືບ​ຂ່າວ​ຕຳຫຼວດ​ກວດ​ຄົນ​ເຂົ້າ-​ອອກ​ເມືອງ​ອາ​ຊຽນ ​ແລະ ປຶກສາ​ຫາລື​ກ່ຽວ​ກັບ​ການ​ສຶກສາ​ຄວາມ​ເປັນ​ໄປ​ໄດ້​ຂອງ​ວີ​ຊາ​ລວມອາ​ຊຽນ.

Off

Comments are closed.