06th Nov2019

ບຸນນະມັດສະການພະທາດຫຼວງ ປະຈຳປີ 2019 ເລີ່ມຄົບງັນແຕ່ໃນວັນທີ 5-11 ພະຈິກ

by somchan

ພິທີເປີດບຸນນະມັດສະການພະທາດຫຼວງ ແລະ ງານວາງສະແດງສິນຄ້າ ປະຈຳປີ 2019 ໄດ້ເປີດຂຶ້ນຢ່າງເປັນທາງການ ໃນວັນທີ 5 ພະຈິກ 2019 ນີ້ ເປັນກຽດເຂົ້າຮ່ວມໂດຍ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ມີຕາງໜ້າການນຳພັກ-ລັດ, ຄອບຄົວການນຳຜູ້ສົງຄຸນນະວຸດທິ, ເພື່ອນມິດທູດ, ທູຕານຸທູດ, ນັກທຸລະກິດປະກອບການ, ແຂກທັງພາຍໃນ ແລະ ຕ່າງປະເທດເຂົ້າຮ່ວມ.

ທ່ານ ປອ ສິນລະວົງ ຄຸດໄພທູນ ເຈົ້າຄອງນະຄອນ ໄດ້ຂຶ້ນກ່າວເປີດບຸນນະມັດສະການພະທາດຫຼວງ ແລະ ງານວາງສະແດງສິນຄ້າ ປະຈຳປີ 2019 ຂຶ້ນຢ່າງເປັນທາງການ ເພື່ອຮັກສາ ແລະ ເສີມຂະຫຍາຍມູນເຊື້ອວັດທະນະທຳອັນດີງາມ ຂອງບຸນນະມັດສະການພະທາດຫຼວງ ເຊິ່ງຊາວລາວກໍ່ຄືຊາວນະຄອນຫຼວງວຽງຈັນ ເຄີຍສືບທອດກັນມາແຕ່ບູຮານນະການ ໃຫ້ດຳລົງຄົງຢູ່ຄຽງຄູ່ກັບຊາດລາວຕະຫຼອດໄປ. ທັງເປັນການສ້າງໂອກາດ ແລະ ຊຸກຍູ້ສົ່ງເສີມການທ່ອງທ່ຽວ ສົ່ງເສີມການຄ້າ ໜຶ່ງເມືອງ ໜຶ່ງຜະລິດຕະພັນ ສິນຄ້າຄອບຄົວຕົວແບບ ທີ່ຈະກ້າວໄປສູ່ສິນຄ້າໂອດ໋ອບ ທີ່ໄດ້ກາໝາຍຮອງຮັບລະດັບຊາດ ແລະ ສິນຄ້າຂອງບັນດາວິສະຫະກິດຂະໜາດນ້ອຍ ແລະ ຂະໜາດກາງ ແລະ ການວາງສະແດງ, ຈຳໜ່າຍສິນຄ້າພາຍໃນ ແລະ ຕ່າງປະເທດ. ເພື່ອໃຫ້ຜູ້ທີ່ມາທ່ຽວຊົມໃນງານບຸນ ກໍ່ຄືຊາວລາວທົ່ວປະເທດ ແລະ ແຂກຕ່າງປະເທດ ໄດ້ເຫັນ ແລະ ໄດ້ຊົມໃຊ້ສິນຄ້າ, ພ້ອມທັງເປັນການແລກປ່ຽນບົດຮຽນ ແລະ ປະສົບການຕ່າງໆ ຂອງບັນດາຫົວໜ່ວຍທຸລະກິດດ້ວຍກັນ.

ການຈັດງານວາງສະແດງສິນຄ້າ ແລະ ງານບຸນນະມັດສະການພະທາດຫຼວງ ປະຈຳປີ 2019 ໄດ້ກຳນົດງານວາງສະແດງສິນຄ້າ ຢູ່ 2 ສະຖານທີ່ເປັນຫຼັກ ຄື: ເດີນພະທາດຫຼວງ ເລີ່ມແຕ່ວັນທີ 5-11 ພະຈິກ 2019 ແລະ ສູນການຄ້າ ລາວ-ໄອເຕັກ ເລີ່ມແຕ່ວັນທີ 6-17 ພະຈິກ 2019.

ສຳລັບກິດຈະກຳທີ່ກ່ຽວຂ້ອງກັບຮີດຄອງ ວັດທະນະທຳ ປະເພນີ ແມ່ນ:

  • ໃນວັນທີ 9 ພະຈິກ 2019 ເວລາ 16:00 ໂມງ ມີພິທີສູດປະລິຕະມຸງຄຸນທີ່ພະທາດຫຼວງ
  • ວັນທີ 10 ພະຈິກ 2019 ເວລາ 13:00 ໂມງ ມີພິທີແຫ່ພະສາດເຜີ້ງ
  • ວັນທີ 11 ພະຈິກ 2019 ເວລາ 7:00 ໂມງ ມີພິທີໃສ່ບາດຖະຫວາຍສັງຂະທານ,
  • ເວລາ 13:00 ໂມງ ມີພິທີແຫ່ລູກຄີ ແລະ ການແຂ່ງຂັນກິລາພື້ນບ້ານຕີຄີ.
  • ເວລາ 19:00 ໂມງ ມີພິທີວຽນທຽນ ແລະ ຈູດທູດທຽນ ບັ້ງໄຟສັກກະລະບູຊາອົງພະທາດ.

ໃນໂອກາດນີ້, ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ກໍ່ໄດ້ ລັນຄ້ອງ 9 ບາດ ເປີດງານຢ່າງເປັນທາງການ ແລະ ຢ້ຽມຊົມບັນດາຮ້ານວາງສະແດງສິນຄ້າພາຍໃນງານອີກດ້ວຍ.

Off

Comments are closed.