01st Aug2018

ບົດລາຍງານຄວາມຄືບໜ້າ ການກອບກູ້ ໄພພິບັດນ້ຳຖ້ວມ ເມືອງສະໜາມໄຊ ແຂວງອັດຕະປື ປະຈຳວັນທີ 1 ສິງຫາ 2018

by somchan

ການປະຕິບັດໜ້າທີ່ກອບກູ້ໄພພິບັດນ້ຳຖ້ວມ ເມືອງສະໜາມໄຊ ແຂວງອັດຕະປື ນັບແຕ່ວັນທີ 23 ກໍລະກົດ ຈົນມາຮອດປະຈຸບັນນີ້ ແມ່ນຍັງດຳເນີນໄປຢ່າງຮີບດ່ວນ ພ້ອມທັງເພີ່ມທະວີໃນການຊອກຄົ້ນຫາ ແລະ ຊ່ວຍເຫຼືອຕະຫຼອດ 24 ຊົ່ວໂມງ. ກຳລັງປ້ອງກັນຊາດ-ປ້ອງກັນຄວາມສະຫງົບ ແລະ ກຳລັງຈາກໜ່ວຍກູ້ໄພມູນລະນິທິຕ່າງໆ ທັງພາຍໃນ ແລະ ຕ່າງປະເທດ ໄດ້ສົມທົບກັນຈັດຕັ້ງປະຕິບັດແຜນຕ່າງໆ ຢ່າງລະອຽດຖີ່ຖ້ວນ. ມາຮອດປະຈຸບັນ ພົບສົບຜູ້ເສຍຊີວິດ 12 ສົບ, ແລະ ຍັງມີຜູ້ສູນຫາຍອີກ 119 ຄົນ ຕາມການແຈ້ງຂອງຄອບຄົວ ແລະ ອຳນາດການປົກຄອງບ້ານ ທີ່ໄດ້ຮັບຜົນກະທົບ. ສູນບັນຊາການກອບກູ້ໄພພິບັດ ໄດ້ມີການກຳນົດແຜນງານ ເພີ່ມພື້ນທີ່ໃນການຄົ້ນຫາໃຫ້ເປັນບໍລິເວນກວ້າງກວ່າເກົ່າ ນອກຈາກລົງກວດກາໃນພຶ້ນທີ່ໄດ້ຮັບໄພພິບັດ ແລະ ຍັງມີການຂະຫຍາຍກຳລັງຄົ້ນຫາລົງພື້ນທີ່ຕາມເຂດອ້ອມຂ້າງຂອງແຂວງອັດຕະປື ບໍ່ວ່າຈະເປັນເຊກອງ, ສາລະວັນ, ຈຳປະສັກ ແລະ ປະສານງານກັບເຈົ້າໜ້າທີ່ປະເທດກຳປູເຈຍຕື່ມອີກໃນການຄົ້ນຫາ, ເພາະ 1 ໃນ 11 ສົບທີ່ພົບເຫັນ ແມ່ນຢູ່ແຂວງກະແຈ ປະເທດກຳປູເຈຍ ຊຶ່ງຄາດວ່າອາດຍ້ອນກະແສນ້ຳທີ່ພັດແຮງ ເຮັດໃຫ້ສົບຖືກນ້ຳພັດໄຫຼໄປເຖິງຈຸດດັ່ງກ່າວ.

ສຳລັບພື້ນທີ່ໃນການຄົ້ນຫາ ແມ່ນຍັງມີຄວາມຫຍຸ້ງຍາກລຳບາກຫຼາຍພໍສົມຄວນ ເຖິງແມ່ນວ່າບັນດາບ້ານທີ່ໄດ້ຮັບຜົນກະທົບນັ້ນ ຈະມີການບົກແຫ້ງຫຼາຍແລ້ວ ແຕ່ສະພາບການທັບຖົມຂອງຂີ້ຕົມຍັງຢູ່ໃນລະດັບສູງ ສະເລ່ຍປະມານ 70 ຊັງຕີແມັດ, ບາງບ່ອນກໍ່ສູງກວ່າລະດັບແອວ, ສ່ວນບັນດາຫ້ວຍຮ່ອງແມ່ນ້ຳລຳເຊທີ່ຢູ່ພຶ້ນທີ່ປະສົບໄພ ໂດຍສະເພາະແມ່ນສາຍນ້ຳເຊປຽນແມ່ນຍັງໄຫຼ່ແຮງພໍສົມຄວນ ເຮັດໃຫ້ຫຍຸ້ງຍາກໃນການຄົ້ນຫາ ແລະ ຊ່ວຍເຫຼືອ, ບາງພື້ນທີ່ຕ້ອງໄດ້ເລືອຄານໄປຕາມຂີ້ຕົມ, ລອດຕາມຟຸ່ມໄມ້, ກວດຕາມແມ່ນ້ຳລຳເຊທີ່ມີກະແສນ້ຳທີ່ໄຫຼ່ແຮງ.

ສຳລັບຜູ້ປະສົບໄພທີ່ພົບເຫັນໃນຈຳນວນ 7 ພັນກວ່າຄົນ, ທາງຄະນະຮັບຜິດຊອບກອບກູ້ໄພພິບັດ ໄດ້ມີການຈັດແບ່ງສະຖານທີ່ໃຫ້ພັກເຊົາຊົວຄາວເປັນທີ່ຮຽບຮ້ອຍແລ້ວ. ພ້ອມທັງ, ມີການຈັດແບ່ງອຸປະກອນການກິນການນອນໃຫ້ຢ່າງຄົບຖ້ວນ ເພື່ອອຳນວຍຄວາມສະດວກໃຫ້ນຳໃຊ້ເບື່ອງຕົ້ນໄປກ່ອນ ສ່ວນອາຫານການກິນໃນແຕ່ລະຈຸດພັກເຊົາຊົ່ວຄາວ ແມ່ນຈະມີໜ່ວຍງານຊ່ວຍເຫຼືອຈາກພາກສ່ວນຄະນະຮັບຜິດຊອບຊ່ວຍເຫຼືອໄພພິບັດ ແລະ ຈາກມູນລະນິທິຕ່າງໆ ຕອບສະໜອງອາຫານການກິນໃຫ້, ສ່ວນບຸກຄົນໃດທີ່ສຸຂະພາບບໍ່ແຂງແຮງ, ມີການເຈັບປ່ວຍ ກໍ່ມີໜ່ວຍແພດປະຈຳສະໜາມ ຊ່ວຍໃນການຟື້ນຟູສຸຂະພາບ ແລະ ປິ່ນປົວ. ທ່ານ ພັອ ດຣ ນາງ ວັັັັນເພັງ ພວງສາວະດີ ຮອງຫົວໜ້າກົມເສນາຮັກ ກົມໃຫຍ່ພະລາທິການກອງທັບ ກະຊວງປ້ອງກັນປະເທດ ທັງຮັບຜິດຊອບຊີ້ນຳວຽກງານປິ່ນປົວຜູ້ປະສົບໄພພິບັດໃນຄັ້ງນີ້.

ສ່ວນເສັ້ນທາງຈາກເທດສະບານແຂວງອັດຕະປື ມາຫາເມືອງສະໜາມໄຊ ແມ່ນໄດ້ຮັບການສ້ອງແປງຊົ່ວຄາວ ເພື່ອອຳນວຍຄວາມສະດວກໃຫ້ແກ່ຜູ້ຈະເດີນທາງມາປະຕິບັດໜ້າທີ່ຊ່ວຍເຫຼືອ ແລະ ໃຫ້ກຳລັງໃຈຜູ້ປະສົບໄພ, ທ່ານ ທະວີໄຊ ພິຈັດ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງສະໜາມໄຊ ແຂວງອັດຕະປື ໃຫ້ສຳພາດວ່າ: ທາງພາກສ່ວນໂຍທາທິການ ແລະ ຂົນສົ່ງ ໄດ້ສົມທົບກັບບັນດາບໍລິສັດຂົວທາງຈຳນວນໜຶ່ງ ໃນການສ້ອມແປງຖະໜົນຫົນທາງ ຈຸດທີ່ມີການເປ່ເພ ເປັນຕົ້ນແມ່ນ, ຈາກເທດສະບານຂອງແຂວງອັດຕະປື ຮອດຕົວເມືອງສະໜາມໄຊ ແລະ ຈາກຕົວເມືອງສະໜາມໄຊໄປຫາ ບ້ານທີ່ປະສົບໄພພິບັດ ເພື່ອອຳນວຍຄວາມສະດວກໃຫ້ພາກສ່ວນຕ່າງໆ ທີ່ຈະມາປະຕິບັດໜ້າທີ່ຢູ່ແຕ່ລະຈຸດກູ້ໄພ.

ສຳລັບແຜນງານໃນຂັ້ນຕໍ່ໄປ ແມ່ນຈະເພີ່ມທະວີໃນການຊອກຄົ້ນຫາ ໃຫ້ເປັນບໍລິເວນກວ້າງ ທັງພາກພື້ນດິນ ແລະ ອາກາດ, ທັງຈຸດບ້ານທີ່ປະສົບໄພ ແລະ ບໍລິເວນອ້ອມຂ້າງ ທີ່ເລວນ້ຳພັດໄປ. ສ່ວນຜູ້ປະສົບໄພທີ່ໄດ້ຮັບການຊ່ວຍເຫຼືອມາຈຸດພັກເຊົາແລ້ວ ກໍ່ແມ່ນສືບຕໍ່ໃນການຊ່ວຍເຫຼືອທາງດ້ານຊີວິດການເປັນຢູ່ໃຫ້ໄດ້ໂດຍພື້ນຖານ.

Off

Comments are closed.