24th Jan2018

ກອງປະຊຸມຮ່ວມມືສອງຝ່າຍລະຫວ່າງກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງພາຍໃນ ຣາຊະອານາຈັກດຳປູເຈຍ

by somchan

ກອງປະຊຸມຮ່ວມມືສອງຝ່າຍລະຫວ່າງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງຣາສະອານາຈັກກຳປູເຈຍ ປະຈຳປີ 2018 ໄດ້ຈັດໃນວັນ 17 ມັງກອນ 2018 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງ ພົຕ ສົມແກ້ວ ສີລາວົງ ລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ສົມເດັດ ກຼໍ່ລາໂຮມ ຊໍ ເຄັງ ຮອງນາຍົກລັດຖະມົນຕີ ລັດຖະມົນຕີກະຊວງພາຍໃນ ແຫ່ງຣາຊະອານາຈັກກຳປູເຈຍ, ມີຄະນະຜູ້ແທນສອງຝ່າຍເຂົ້າຮ່ວມຮ່ວມ.

ກອງປະຊຸມຄັ້ງນີ້, ຄະນະຜູ້ແທນທັງສອງຝ່າຍໄດ້ຜັດປ່ຽນກັນແຈ້ງສະພາບ ແລະ ທົບທວນຄືນຜົນການຈັດຕັ້ງປະຕິບັດບົດບັນທືກການຮ່ວມມື ລະຫ່ວາງກະຊວງ ປະຈຳປີ 2017 ທີ່ຜ່ານມາ ແລະ ພ້ອມກັນປືກສາຫາລືແລກປ່ຽນຄຳຄິດຄຳເຫັນເຊີ່ງກັນ ແລະ ກັນຢ່າງກົງໄປກົງມາໃນຫຼາຍດ້ານ ເປັນຕົ້ນແມ່ນ: ການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມສາຍແດນ, ການຮ່ວມມືໃນການກວດກາ ແລະ ຄວບຄຸມຢາເສບຕິດ, ການຮ່ວມມືດ້ານວຽກງານການຄ້າມະນຸດ, ການຮ່ວມມືອຳນວຍຄວາມສະດວກ ແລະ ຄວາມເປັນລະບຽບຮຽບຮ້ອຍໃນການເຂົ້າ-ອອກເມືອງ, ການຮ່ວມມືແລກປ່ຽນຢ້ຽມຢາມຄະນະຜູ້ແທນເຊີງກັນ ແລະ ກັນ, ການຮ່ວມມືດ້ານການກໍ່ສ້າງກຳລັງ ແລະ ການຮ່ວມມືດ້ານອື່ນໆ. ສຳລັບການຮ່ວມມືໃນການກວດກາ ແລະ ຄວບຄຸມຢາເສບຕິດໃນໄລຍະຜ່ານມາໜ່ວຍງານທີ່ກ່ຽວຂ້ອງທັງສອງຝ່າຍທັງລະດັບສູນກາງ ແລະ ທ້ອງຖີ່ນໄດ້ພ້ອມກັນຈັດຕັ້ງປະຕິບັດຕາມບົດບັນທືກວ່າດ້ວຍການຮ່ວມມືໃນການກວດກາ ແລະ ຄວບຄຸມຢາເສບຕິດທີ່ສອງຝ່າຍໄດ້ລົງນາມຮ່ວມກັນໄດ້ດີພໍສົມຄວນ, ເຈົ້າໜ້າທີ່ປາບປາມຢາເສບຕິດລະດັບແຂວງ ແລະ ເມືອງກໍ່ໄດ້ມີການແລກປ່ຽນຂໍ້ມູນຂ່າວສານ, ປະສານງານ ແລະ ຮ່ວມມືກັນໃນການປ້ອງກັນສະກັດກັ້ນກຸ່ມຄົນບໍ່ດີທີ່ເຄື່ອນໄຫວຂົນສົ່ງ ແລະ ຄ້າຂາຍຢາເສບຕິດຢູ່ບໍລິເວນຊາຍແດນສາມາດຈັບກຸ່ມເປົ້າໝາຍທີ່ມີການເຄື່ອນໄຫວກະທຳຜິດມາດຳເນີນຄະດີຕາມກົດໝາຍໄດ້ຈຳນວນໜື່ງ.

ຜ່ານມາການຮ່ວມກັນຂອງສອງຝ່າຍສາມາດປະກອບສ່ວນເຮັດໃຫ້ສາຍພົວພັນມິດຕະພາບຖານບ້ານໃກັເຮືອນຄຽງທີ່ດີຕໍ່ກັນລະຫ່ວາງສອງຊາດກໍ່ຄືປະຊາຊົນສອງປະເທດນັບມື້ນັບແໜ້ນແຟ້ນ, ກຳລັງຕຳຫຼວດລາວ-ກຳປູເຈຍສາມາດຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມໝັ້ນຄົງຂອງຊາດເຮັດໃຫ້ຊາຍແດນລະຫວ່າງສອງປະເທດເປັນເສັ້ນຊາຍແດນແຫ່ງສັນຕິພາບ, ມິດຕະພາບ ແລະ ຮັກສາຄວາມປອດໄພໃຫ້ປະຊາຊົນສອງປະເທດສາມາດໄປມາຫາສູ່ກັນໄດ້ຢາງສະດວກສະບາຍ.

ໂອກາດດຽວກັນ, ທັງສອງຝ່າຍກໍ່ໄດ້ເປັນເອກະພາບກັນຮັບຮອງ ແລະ ລົງນາມໃນບົດບັນທືກວ່າດ້ວຍການຮ່ວມມືລະຫວ່າງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະກະຊວງພາຍໃນ ແຫ່ງຣາຊະນາຈັກກຳປູເຈຍ ປະຈຳປີ 2018 ຝ່າຍ ສປປ ລາວ ລົງນາມໂດຍ ພົຕ ສົມແກ້ວ ສີລາວົງ ລັດຖະມົນຕີ ກະຊວງປ້ອງກັນຄວາມສະຫງົບ ແລະ ຝ່າຍກຳປູເຈຍ ລົງນາມໂດຍ ສົມເດັດ ກຼໍລາໂຮມ ຊໍ ເຄັງ ຮອງນາຍົກລັດຖະມົນຕີ ລັດຖະມົນຕີກະຊວງພາຍໃນ.

ໃນນີ້, ທັງສອງຝ່າຍໄດ້ເປັນເອກະພາບກັນໃນບົດບັນທືກ ໂດຍຈະສືບຕໍ່ຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ຮ່ວມມືກວດກາ ແລະ ຄວບຄຸມຢາເສບຕິດ, ຮ່ວມມືດ້ານວຽກງານຕ້ານການຄ້າມະນຸດ, ຮ່ວມມືອຳນວຍຄວາມສະດວກ ແລະ ຄວາມປອດໄພໃນການເຂົ້າ-ອອກເມືອງ, ຮ່ວມມືແລກປ່ຽນການຢ້ຽມຢາມຂອງຄະນະຜູ້ແທນ, ຮ່ວມມືດ້ານການກໍ່ສ້າງກຳລັງ ພ້ອມກັນນຳເອົາເນືອໃນຈິດໃຈຂອງບົດບັນທືກໄປຈັດຕັ້ງປະຕິບັດໃຫ້ເປັນຮູບປະທຳຫຼາຍຂື້ນກ່ວາເກົ່າ ເພື່ອຜົນປະໂຫຍດລວມຂອງປະຊາຊົນສອງຊາດ ແລະ ເສີມຂະຫຍາຍສາຍພົວພັນມິດຕະພາບ ການຮ່ວມມືລະຫວ່າງສອງປະເທດລາວ-ກຳປູເຈຍ, ກຳປູເຈຍລາວໃຫ້ນັບມື້ນັບດີຂື້ນຢ່າງບໍ່ຢຸດຢັ້ງ.

 

 

Off

Comments are closed.