07th Jun2013

ບົດແຈ້ງຜົນການສືບສວນຄັ້ງທີ IIIຂອງເຈົ້າ ໜ້າທີ່ຕຳຫຼວດກ່ຽວກັບການຊອກຕົວ ທ້າວ ສົມບັດ ສົມພອນ ວັນທີ 07 ມິຖຸນາ 2013

by somchan

123456

ກ່ຽວກັບການສືບສວນ-ສອບສວນຊອກຫາຕົວ ທ້າວ ສົມບັດ ສົມພອນ ເຈົ້າໜ້າທີ່ຕຳຫຼວດແຈ້ງ ຜົນການສືບສວນ-ສອບສວນຕື່ມດັ່ງນີ້: ຫຼັງຈາກທີ່ໄດ້ແຈ້ງ ຜົນການສືບສວນ-ສອບສວນ ຊອກຫາຕົວທ້າວ ສົມບັດ ສົມພອນ 02ຄັ້ງຜ່ານ ມາຄະນະຮັບຜິດຊອບດຳເນີນຄະດີກໍ່ໄດ້ເອົາໃຈໃສ່ສືບ ຕໍ່ດຳເນີນການສືບສວນ-ສອບສວນ,ເກັບກຳແຫຼ່ງ ຂ່າວຂໍ້ມູນຕ່າງໆນຳບຸກຄົນ,ພາກສ່ວນ ທີ່ກ່ຽວຂ້ອງຢູ່ພາຍໃນແລະຕ່າງປະເທດຄື:

ລົງໄປປະສານສົມທົບກັບ ອຳນາດການປົກຄອງບ້ານຊຳເກດ ເມືອງສີໂຄດຕະບອງ ແລະ ບ້ານຊ້າງຫົວບໍ່, ເມືອງໄຊທານີ ເພື່ອລົງເກັບກໍາຂໍ້ມູນ ສາຍພົວພັນຕ່າງໆຂອງຜູ້ກ່ຽວ ຢູ່ສູນປັນຍານິເວດ ແລະ ສູນຮຽນຮູ້ສວນໄມ້ລາວ. ນອກນັ້ນ,ຍັງສືບຕໍ່ລົງເກັບກຳຂໍ້ມູນ ຢູ່ບ້ານນາຄຳ, ເມືອງສີໂຄດຕະບອງ ແລະ ບ້ານໂຄກນິນ, ເມືອງສີສັດຕະນາກ ແລະ ຈຸດອື່ນໆຈຳນວນໜຶ່ງຕື່ມ ເພື່ອເປັນບ່ອນອີງໃນການຊອກຫາຕົວຜູ້ກ່ຽວ.

ສືບຕໍ່ປະສານສົມທົບ ກວດກາ ແລະ ມອບໝາຍທຸກເຫຼົ່າລົບວິຊາສະເພາະຂອງເຈົ້າໜ້າທີ່ຕຳຫຼວດທົ່ວປະເທດ ໃນການສືບຕໍ່ຕິດຕາມ ຊອກຫາແຫຼ່ງຂ່າວ, ຂໍ້ມູນຕ່າງໆທີ່ກ່ຽວພັນເຖິງການຊອກຫາຕົວຜູ້ກ່ຽວ.

ເຈົ້າໜ້າທີ່ຕຳຫຼວດສາກົນລາວ ໄດ້ສືບຕໍ່ເຮັດໜັງສືສະເໜີເຖິງອົງການຕຳຫຼວດສາກົນອອກໃບແຈ້ງບຸກຄົນ(ທ້າວສົມບັດ ສົມພອນ) ສູນເສຍ ສີເຫຼືອງ ແລະ ອົງການຕຳຫຼວດສາກົນ ກໍ່ໄດ້ອອກເອກະສານເປັນໃບແຈ້ງບຸກຄົນ (ທ້າວສົມບັດ ສົມພອນ) ສູນຫາຍ ສີເຫຼືອງ ໃນວັນທີ 23 ເມສາ 2013 ອອກສື່ມ່ວນຊົນລວມທັງລົງອິນເຕີເນັດ.

ຕິດຕາມຜົນທີ່ເຈົ້າໜ້າທີ່ຕຳຫຼວດສາກົນລາວ ໄດ້ເຮັດໜັງສືແຈ້ງເຖິງ ບັນດາປະເທດສະມາຊິກຕຳຫຼວດສາກົນ ແລະ ຕຳຫຼວດອາຊຽນ ຊ່ວຍຊອກຫາຂໍ້ມູນ ແລະ ຕົວ ທ້າວສົມບັດ ສົມພອນ, ຜົນກໍ່ໄດ້ຮັບແຈ້ງຕອບຈາກຕໍາຫຼວດສາກົນ 06 ປະເທດຄື:

ປະເທດຍີ່ປຸ່ນ, ອິນເດຍ ແລະ ຝຣັ່ງ ສະເໜີໃຫ້ຕຳຫຼວດລາວ ສະໜອງຂໍ້ມູນທີ່ຈຳເປັນເພື່ອເປັນອີງ ໃນການຊອກຫາເຊັ່ນ: ເລກໜັງສືຜ່ານແດນ ແລະ ບັດປະຈຳຕົວ ຂອງທ້າວສົມບັດ ສົມພອນ ແລະ ເຈົ້າໜ້າທີ່ຕຳຫຼວດສາກົນລາວ ກໍ່ໄດ້ສົ່ງຂໍ້ມູນດັ່ງກ່າວ ໃຫ້ປະເທດທີ່ສະເໜີມານັ້ນແລ້ວ.

ປະເທດເກົາຫຼີໃຕ້ ແຈ້ງວ່າ: ຜ່ານການກວດກາພົບວ່າ ໃນວັນທີ 09 ພະຈິກ 2012 ທ້າວ ສົມບັດ ສົມພອນ ໄດ້ເດີນທາງອອກຈາກ ປະເທດເກົາຫຼີໃຕ້ ມາປະເທດໄທ.

ສະຫະລັດອາເມລິກາ ແຈ້ງວ່າ: ນັບແຕ່ໄດ້ຮັບໜັງສືສະເໜີ ກໍ່ໄດ້ບັນທືກເຂົ້າໃນບັນຊີຕິດຕາມ ການເຂົ້າ-ອອກເມືອງຂອງເຈົ້າໜ້າທີ່ ອາເມລິກາ.

ປະເທດສະເປນ ແຈ້ງວ່າ: ຜ່ານການກວດກາບໍ່ພົບເຫັນ.

ວັນທີ 24/04/2013 ໄດ້ເຊີນນາງ ອຶງ ຊຸຍມິງ ຜູ້ມາແຈ້ງຄວາມ ການຫາຍຕົວຂອງ ທ້າວ ສົມບັດ ສົມພອນ ມາຊາບຜົນ ການສືບສວນ-ສອບສວນຜ່ານມາ ແລະ ສືບຕໍ່ພ້ອມກັນເກັບກຳຂໍ້ມູນຕື່ມອີກ.

ນອກຈາກນັ້ນ, ຄະນະຮັບຜິດຊອບດຳເນີນຄະດີ ຍັງໄດ້ພົບ ແລະ ໃຫ້ຄຳອະທິບາຍ ຊີ້ແຈງ ກ່ຽວກັບບັນຫານີ້ຕໍ່ບັນດາທ່ານທີ່ສົນໃຈ, ບັນດາຜູ້ຕາງໜ້າ, ບັນດາສະຖານທູດຕ່າງປະເທດປະຈຳ ສປປ ລາວ.

ທັງໝົດນັ້ນ, ໄດ້ສະແດງເຖິງຄວາມເອົາໃຈໃສ່ ຢ່າງມີຄວາມຮັບຜິດຊອບສູງ ຂອງການນຳກະຊວງປ້ອງກັນຄວາມສະຫງົບ ກໍ່ຄືກົມໃຫຍ່ຕຳຫຼວດ ໃນການຊີ້ນຳ ຕໍ່ການສືບສວນ-ສອບສວນ ຊອກຫາຕົວ ທ້າວ ສົມບັດ ສົມພອນ ຂອງຄະນະຮັບຜິດຊອບດຳເນີນຄະດີ ໃຫ້ດຳເນີນໄປເປັນປົກກະຕິ ຕາມຫຼັກການວິຊາສະເພາະ ແລະ ລະບຽບກົດໝາຍຂອງ ສປປ ລາວ. ມາຮອດປະຈຸບັນ ຍັງບໍ່ທັນພົບເຫັນຕົວຜູ້ກ່ຽວເທື່ອ ເຊີ່ງຄະນະຮັບຜິດຊອບດຳເນີນຄະດີ ພວກຂ້າພະເຈົ້າ ກໍ່ໄດ້ມີແຜນສືບຕໍ່ ດຳເນີນການສືບສວນ-ສອບສວນ ເກັບກຳຂໍ້ມູນ, ກວດກາພິສູດແຫຼ່ງຂ່າວ, ຂໍ້ມູນຕ່າງໆນຳບຸກຄົນ, ພາກສ່ວນຕ່າງໆຢູ່ພາຍໃນ ແລະ ຕ່າງປະເທດຕື່ມ ຕາມພາລະບົດບາດ ໜ້າທີ່ໆໄດ້ຮັບການມອບໝາຍ.

ດັ່ງນັ້ນ, ຈື່ງແຈ້ງມາຍັງທຸກພາກສ່ວນ, ທຸກອົງການຈັດຕັ້ງທັງພາຍໃນ ແລະ ຕ່າງປະເທດຊາບ, ຖ້າຫາກໃຜມີແຫຼ່ງຂ່າວ ຂໍ້ມູນ ຫຼັກຖານໃດໆ ກ່ຽວຂ້ອງກັບບັບຫາດັ່ງກ່າວນີ້ ແມ່ນໃຫ້ພົວພັນກັບເຈົ້າໜ້າທີ່ຕຳຫຼວດເມືອງ, ແຂວງ, ນະຄອນຫຼວງ ໃນຂອບເຂດທົ່ວປະເທດ ເພື່ອມີສ່ວນຮ່ວມໃນການແກ້ໄຂບັນຫາດັ່ງກ່າວນີ້ໃຫ້ສຳເລັດໄປດ້ວຍດີ.

 

Off

Comments are closed.