28th Mar2013

ບົດແຈ້ງຜົນການສືບສວນ-ສອບສວນຄັ້ງ ທີ​ II ຂອງເຈົ້າໜ້າທີ່ຕຳຫຼວດກ່ຽວກັບການ ຊອກຕົວທ້າວສົມບັດ ສົມພອນ ວັນທີ 1ມີນາ2013

by somchan

ເພື່ອເປັນການຮັບຮູ້ ແລະ ເຂົ້າໃຈເພີ່ມເຕີມກ່ຽວ ກັບການເຄື່ອນໄຫວເຮັດວຽກງານສືບສວນ-ສອບ ສວນຂອງເຈົ້າໜ້າທີ່ຕຳຫຼວດທີ່ໄດ້ຮັບການມອບ ໝາຍຈາກການຈັດຕັ້ງຂັ້ນເທີງກ່ຽວກັບການ ຊອກຫາຕົວທ້າວ ສົມບັດ ສົມພອນຜ່ານມາ. ຂ້າພະເຈົ້າ ພັອ ດຣ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕຳຫຼວດກະຊວງປ້ອງ ກັນຄວາມສະຫງົບຕາງໜ້າໃຫ້ຄະນະຮັບຜິດ ຊອບດຳເນີນຄະດີຂໍແຈ້ງຜົນການສືບ ສວນ-ສອບ ສວນຊອກຫາຕົວທ້າວ ສົມບັດ ສົມພອນ ຕື່ມເປັນຄັ້ງທີ II ດັ່ງນີ້:

ຫຼັງຈາກທີ່ຂ້າພະເຈົ້າ ໄດ້ແຈ້ງຜົນການສືບສວນ-ສອບສວນ ຊອກຫາຕົວ ທ້າວ ສົມບັດ ສົມພອນ ເບື້ອງຕົ້ນໃນຄັ້ງວັນທີ 11/01/2013 ຕໍ່ມາພວກຂ້າພະ ເຈົ້າກໍ່ຍັງໄດ້ເອົາໃຈໃສ່ສືບຕໍ່ດຳເນີນການສືບສວນ-ສອບສວນ, ເກັບກຳແຫຼ່ງຂ່າວຂໍ້ມູນຕ່າງໆນຳບຸກຄົນ ແລະ ພາກສ່ວນທີ່ກ່ຽວຂ້ອງ ຕາມພາລະບົດບາດໜ້າທີ່ຂອງອົງການສືບສວນ-ສອບສວນ ຂອງເຈົ້າໜ້າທີ່ຕຳຫຼວດ ເຊີ່ງສະແດງອອກຄື:

1. ໃນວັນທີ 15-16/01/2013 ໄດ້ສືບຕໍ່ເຊີນ ນາງອຶງ ຊຸຍມິງ (ພັນລະຍາ), ນາງ ເພັດສະໄໜ (ນ້ອງສາວ) ແລະ ນາງສົມຈິດ ​(ຫຼານສາວ) ຂອງທ້າວ ສົມບັດ ສົມພອນ ເພຶ່ອສືບຕໍ່ປຶກສາເກັບກຳຂໍ້ມູນກ່ຽວກັບທ້າວ ສົມບັດ ສົມພອນ ເປັນບ່ອນອີງໃນການສືບຕໍ່ຊອກຫາຜູ້ກ່ຽວ ຈຶ່ງໄດ້ຮູ້ວ່າ: ຜູ້ກ່ຽວມີຍາດໃກ້ສິດຢູ່ແຂວງຄຳມ່ວນ. ດັ່ງນັ້ນ, ໃນວັນທີ 24-25 ມັງກອນ 2013 ຈຶ່ງໄດ້ມາລົງໄປປະສານສົມທົບກັບກອງບັນຊາການ ປກສ ແຂວງຄຳມ່ວນ ເພື່ອພ້ອມກັນໄປເກັບກຳຂໍ້ມູນນຳນ້ອງຊາຍສອງຄົນ ແລະ ນ້ອງສາວສອງຄົນ ຂອງທ້າວສົມບັດ ສົມພອນ ຢູ່ບ້ານໜອງບົວຄຳ ແລະ ບ້ານສັນຕິສຸກ ເມືອງທ່າແຂກ ແຂວງຄຳມ່ວນ ກໍ່ສາມາດຮູ້ໄດ້ຂໍ້ມູນເພີ່ມຕື່ມຈຳນວນໜຶ່ງ. ວັນທີ 08/02/2013 ຈຶ່ງໄດ້ເຊີນເອົານາງ ອຶງ ຊຸຍມິງ ແລະ ນາງເພັດສະໄໝ ເພື່ອມາພ້ອມກັນຕີລາຄາ ປືກສາທິດທາງສືບຕໍ່ໃນການຊອກຕົວຂອງທ້າວສົມບັດ ສົມພອນ ພ້ອມທັງແຈ້ງຜົນການສືບສວນ-ສອບສວນ ໃນໄລຍະຜ່ານມາໃຫ້ພວກກ່ຽວຊາບ.

2. ທາງດ້ານວິຊາສະເພາະໄດ້ສືບຕໍ່ປະສານສົມທົບ ແລະ ມອບໝາຍໃຫ້ທຸກເຫຼົ່າລົບວິຊາສະເພາະຂອງເຈົ້າໜ້າທີ່ຕຳຫຼວດທົ່ວປະເທດ ໃນການຕິດຕາມຊອກຫາແຫຼ່ງຂ່າວ, ຂໍ້ມູນເພື່ອຊອກຫາຜູ້ກ່ຽວຕະຫຼອດມາ.

3. ຕໍ່ກັບຄຳສະໜີຂອງ ນາງ ອຶງ ຊຸຍມິງ ພັນລະຍາຂອງທ້າວ ສົມບັດ ສົມພອນ ແລະ ຄຳສົນໃຈຂອງບາງປະເທດ, ສະມາຊິກລັດຖະສະພາບາງປະເທດ, ລັດຖະສະພາເອີຣົບ,ບາງອົງການຈັດຕັ້ງສາກົນ, ບາງອົງການບໍ່ສັງກັດລັດຖະບານ, ບາງສື່ມວນຊົນຕ່າງປະເທດ ແລະ ບາງບຸກຄົນກ່ຽວກັບບາງບັນຫາດັ່ງກ່າວນີ້:

3.1 ເຈົ້າໜ້າທີ່ສືບສວນ ໄດ້ສອບຖາມຫຍັງແດ່ ຕໍ່ກັບຕຳຫຼວດທີ່ໄດ້ຢຸດລົມຂອງສາມີຂ້າພະເຈົ້າ (ທ້າວ ສົມບັດ ສົມພອນ) ໃນຕອນແລງຂອງວັນທີ 15 ທັນ 2012 ? ເຈົ້າໜ້າທີ່ໄດ້ຖາມບໍ່ວ່າ: ເກີດຫຍັງຂື້ນໃນມື້ນັ້ນ ແລະ ພວກເຂົາໄດ້ເຫັນໄດ້ຮູ້ຫຍັງແດ່ ?.

ຕໍ່ກັບຄຳຖາມດັ່ງກ່າວ, ຂ້າພະເຈົ້າໄດ້ຊີ້ແຈງແລ້ວວ່າ: ພວກເຮົາໄດ້ສອບຖາມເຈົ້າໜ້າທີ່ຈາລະຈອນທີ່ປະຕິບັດໜ້າທີ່ຢູ່ຈຸດດັ່ງກ່າວໃນມື້ນັ້ນ ພວກເຂົາໄດ້ຕອບວ່າ: ທຸກໆວັນ ແມ່ນໄດ້ກວດລົດຈຳນວນຫຼາຍຄັນຕາມລະບຽບການເປັນປົກກະຕິ, ບໍ່ສາມາດຈື່ໄດ້ວ່າ ໄດ້ກວດລົດຊະນິດໃດແດ່, ລົດຂອງໃຜ ບຸກຄົນໃດ, ເພາະເຈົ້າໜ້າທີ່ຕຳຫຼວດຈະລາຈອນເຮົາກວດເບິ່ງແຕ່ເອກະສານລົດ, ທະບຽນລົດ, ຖ້າຄົບຖ້ວນ ແລະ ຖືກຕ້ອງກໍ່ສົ່ງເອກະສານຄືນ ແລ້ວປ່ອຍເຂົາເຈົ້າໄປຕາມລະບຽບການ. ໃນມື້ນັ້ນສະພາບແມ່ນປົກກະຕິ ບໍ່ມີເຫດການຈັບກຸມທຸບຕີແຕ່ຢ່າງໃດ ແລະ ກໍ່ບໍ່ໄດ້ກັກລົດປະເພດໃດ ຫຼື ກັກບຸກຄົນໃດ.

3.2 ບໍ່ຮູ້ວ່າ ຄົນຂີ່ລົດຈັກທີ່ໄດ້ຂັບລົດຈິບຂອງ ທ້າວສົມບັດ ໄປນັ້ນ ໄດ້ຖືກສອບຖາມ ແລະ ຂະຫຍາຍຜົນແນວໃດ?

ພວກເຮົາໄດ້ພະຍາຍາມກວດເບິ່ງກ້ອງຈອນປິດຫຼາຍຄັ້ງ ກໍ່ເຫັນໄດ້ເທົ່າທີ່ໄດ້ບັນທຶກພາບໄວ້ເທົ່ານັ້ນ ເພາະເປັນເລື່ອງເຕັກນິກ, ທັງເປັນກາງຄືນບໍ່ສາມາດເຫັນໄດ້ຊັດເຈນວ່າ: ແມ່ນຜູ້ໃດຂັບຂີ່ລົດຈັກມາ, ເລກທະບຽນລົດຈັກເທົ່າໃດ ກໍ່ບໍ່ເຫັນ, ຜ່ານການຖາມເຈົ້າໜ້າທີ່ຈະລາຈອນ ບອກວ່າ: ບໍ່ໄດ້ຕິດຕາມເບິ່ງລົດຈັກ ຫຼື ລົດຈິບໃຜເປັນຜູ້ຂັບລົດຈັກມາ ແລະຂັບຂີ່ລົດຈິບອອກໄປ ເພາະວ່າສະພາບປົກກະຕິ, ມີິແຕ່ກ່ອນຈະໄປກິນເຂົ້າແລງເຈົ້າໜ້າທີ່ຕຳຫຼວດຈະລາຈອນ ໄດ້ເຫັນລົດຈັກຄັນໜຶ່ງຈອດກີດຂວາງທາງຍ່າງ, ຈື່ງຍ່າງໄປເພື່ອຢາກຍ້າຍລົດຈັກອອກຈາກທາງຍ່າງ, ແຕ່ລົດຈັກໄດ້ຖືກໃສ່ກະແຈຄໍໄວ້ຈຶ່ງບໍ່ສາມາດຍ້າຍໄດ້ ແລະ ເຂົ້າໃຈວ່າມີເຈົ້າຂອງລົດຈັກຄັນດັ່ງກ່າວ ຢູ່ໃກ້ໆແຖວນັ້ນເຈົ້າໜ້າທີ່ຕຳຫຼວດຈະລາຈອນຈຶ່ງກັນຄືນ ແລະ ໄປກິນເຂົ້າ.ຕໍ່ກັບຜູ້ຂັບຂີ່ລົດຈັກ ແລະ ຂັບຂີ່ລົດຈິບອອກໄປ ເຈົ້າໜ້າທີ່ກໍ່ຍິ່ງມີຄວາມຕ້ອງການຊອກຫາຕົວພວກກ່ຽວທີ່ສຸດ, ຖ້າຜູ້ໃດຮູ້ເຫັນຊ່ວຍແຈ້ງໃຫ້ເຈົ້າໜ້າທີ່ຕຳຫຼວດບ່ອນທີ່ໃກ້ສຸດ.

3.3 ລົດຈິບຂອງທ້າວ ສົມບັດ ສົມພອນ ທະບຽນ ກກ 2624 ໄດ້ພົບເຫັນ ຫຼື ຍັງ?

ເຈົ້າໜ້າທີ່ພວກເຮົາໄດ້ພະຍາຍາມຊອກຫາຕົວ ທ້າວສົມບັດ ສົມພອນ ພ້ອມທັງລົດຈິບ ເລກທະບຽນ ກກ 2624 ນັບແຕ່ມື້ໄດ້ຮັບແຈ້ງຄວາມ ໂດຍພວກເຮົາໄດ້ແຈ້ງການ ເຖິງບັນດາກອງບັນຊາການ ປກສ ແຂວງ, ເມືອງ ໃນທົ່ວປະເທດ ແລະ ໄດ້ຈັດຕັ້ງພະນັກງານອອກເຄື່ອນໄຫວເກັບກຳສະພາບ, ເກັບກຳຂໍ້ມູນຊອກຫາຕົວ, ຊອກຫາລົດຂອງທ້າວສົມບັດ ສົມພອນ, ແຕ່ມາຮອດປະຈຸບັນຍັງບໍ່ມີບຸກຄົນໃດ ແລະ ພາກສ່ວນໃດ ແຈ້ງຂໍ້ມູນກ່ຽວກັບທ້າວສົມບັດ ສົມພອນ ແລະ ລົດຈິບຄັນດັ່ງກ່າວໃຫ້ພວກເຮົາເທື່ອ.

3.4 ບໍ່ຮູ້ວ່າລົດກະບະສີຂາວທີ່ຂັບມາຈອດຢູ່ປ້ອມຕຳຫຼວດ ແລະ ຮັບເອົາສາມີ (ທ້າວສົມບັດ ສົມພອນ) ນັ້ນໄດ້ຂະຫຍາຍຜົນຕື່ມຄືແນວໃດ?.

ຕໍ່ບັນຫາດັ່ງກ່າວ: ຜ່ານການເບິ່ງກ້ອງວົງຈອນປິດຫຼາຍຄັ້ງ ພວກເຮົາເຫັນໄດ້ພຽງແຕ່ລົດກະບະ, ບໍ່ເຫັນປ້າຍທະບຽນລົດຊັດເຈນ, ຜູ້ທີ່ຂຶ້ນ ແລະ ຜູ້ຂັບລົດຍິ່ງບໍ່ເຫັນ. ເຈົ້າໜ້າທີ່ພວກເຮົາກໍ່ມີຄວາມເອົາໃຈໃສ່ກວດກາ, ສອບຖາມເຈົ້າໜ້າທີ່ຈະລາຈອນ ທີ່ປະຕິບັດໜ້າທີ່ຢູ່ຈຸດດັ່ງກ່າວໃນມື້ນັ້ນ ແລະ ປະຊາຊົນຢູ່ຂົງເຂດນັ້ນ ບໍ່ເຫັນມີການຕໍ່ສູ້ ແລະ ຍິນສຽງຮ້ອງຂໍຄວາມຊ່ວຍເຫຼືອຂອງບຸກຄົນໃດໜຶ່ງຈາກລົດຄັນໃດ. ເຖິງຢ່າງໃດກໍ່ຕາມ ພວກເຮົາຈະສືບຕໍ່ຕິດຕາມ, ເກັບກຳຂໍ້ມູນເພື່ອເປັນບ່ອນອີງໃນການຊອກລົດ ແລະ ຜູ້ຂັບລົດຄັນດັ່ງກ່າວ.

3.5 ຖ້າຫາກວ່າແຟ້ມພາບຈາກກ້ອງວົງຈອນປິດ ຫາກເຫັນບໍ່ຊັດເຈນຕາມການລາຍງານຂອງເຈົ້າໜ້າທີ່, ບໍ່ຮູ້ວ່າ ທາງກະຊວງປ້ອງກັນຄວາມສະຫງົບໄດ້ຂໍຄວາມຊ່ວຍເຫຼືອດ້ານເຕັກນິກຈາກລັດຖະບານອື່ນ ຫຼື ບໍ່? ແລ້ວກ້ອງວົງຈອນປິດທີ່ຕິດຕັ້ງຕາມສາຍທາງທ່າເດື່ອກໍ່ບໍ່ເຫັນຊັດເຈນເຊັ່ນດຽວກັນທັງໝົດບໍ່?.

ກ່ຍວກັບກ້ອງວົງຈອນປິດເປັນພື້ນຖານ ທາງດ້ານເຕັກນິກວິຊາສະເພາະຂອງເຈົ້າໜ້າທີ່ຕຳຫຼວດ, ຕາມຫຼັກການແລ້ວບໍ່ວ່າຢູ່ປະເທດໃດ ຈະບໍ່ອະນຸຍາດໃຫ້ບຸກຄົນອື່ນທີ່ບໍ່ມີຄວາມຮັບຜິດຊອບ ເຂົ້າໄປໃນສະຖານທີ່ດັ່ງກ່າວຢ່າງເດັດຂາດ, ແຕ່ເຈົ້າໜ້າທີ່ຂອງ ສປປ ລາວ ເຫັນຄວາມສຳຄັນ ແລະ ມີຄວາມຈິງໃຈຊ່ວຍເຫຼືອ ຈຶ່ງອະນຸຍາດໃຫ້ນາງ ອຶງ ຊຸຍມິງ (ພັນລະຍາ) ແລະ ຫຼານສາວຂອງ ທ້າວ ສົມບັດ ສົມພອນ ເຂົ້າໄປສູນບັນຊາກ້ອງວົງຈອນປິດຂອງເຈົ້າທີ່ຕຳຫຼວດນະຄອນຫຼວງວຽງຈັນ ເພື່ອກວດກາບັນທືກເອົາພາບ ຈາກກ້ອງວົງຈອນປິດທັງໝົດທີ່ມີ ແລ້ວສົ່ງໃຫ້ທຸກໆອົງການ ທັງລົງອິນເຕີເນັດ.ພາບທີ່ບັນທືກໄດ້ກໍ່ມີພຽງແຕ່ເທົ່ານັ້ນ ແລະ ຄວາມຊັດເຈນຊ່ຳໃດໃຜເບິ່ງກໍ່ເຫັນຊ່ຳນັ້ນ ຍ້ອນເລື່ອງເຕັກນິກເພາະເປັນພາບບັນທືກ ຈຶ່ງບໍ່ສາມາດຫຍໍ້ເຂົ້າ ຫຼື ຂະຫຍາຍພາບອອກໄດ້ ໄດ້ເບິ່ງຢ່າງຊັດເຈນ, ສ່ວນລາຍລະອຽດແນວໃດເຈົ້າໜ້າທີ່ພວກເຮົາຍັງຈະສືບຕໍ່ການກວດກາຕື່ມ.

ນອກຈາກນັ້ນ ພວກເຮົາກໍ່ໄດ້ໄປກວດກາຢູ່ສູນບັນຊາກ້ອງວົງຈອນປິດຂອງເຈົ້າໜ້າທີ່ຕຳຫຼວດຈະລາຈອນນະຄອນຫຼວງວຽງຈັນ ຄືນກໍເຫັນເຫັນແຕ່ພາບຄືກັນກັບນາງ ອຶງ ຊຸຍມິງ ໄດ້ບັນທຶກພາບເອົາໄວ້ເທົ່ານັ້ນ, ສ່ວນຈຸດອື່ນໆກວດກາແລ້ວແມ່ນບໍ່ພົບເຫັນ. ສະນັ້ນບັນຫາດັ່ງກ່າວເຈົ້າໜ້າທີ່ຕຳຫຼວດພວກເຮົາ ສາມາດດຳເນີນການກວດກາໄດ້ ແລະ ເປັນຄວາມຮັບຜິດຊອບພາຍໃນຂອງພວກເຮົາ ຈື່ງບໍ່ມີຄວາມຈຳເປັນຂໍການຊ່ວຍເຫຼືອຈາກພາຍນອກ, ອີກດ້ານໜື່ງເປັນວຽກງານທີ່ກ່ຽວຂ້ອງກັບຄວາມປອດໄພ ແລະ ຄວາມໝັ້ນຄົງ, ແຕ່ລະປະເທດກໍ່ມີລະບຽບຫຼັກການພາຍໃນຂອງໃຜມັນ.

3.6 ບໍ່ຮູ້ວ່າ ເຈົ້າໜ້າທີ່ຕຳຫຼວດລາວ ໄດ້ຍົກປະເດັນນີ້ແຈ້ງ ແລະ ຂໍຄວາມຊ່ວຍເຫຼືອຈາກຕຳຫຼວດສາກົນ ຫຼື ບໍ່? ແລະ ໄດ້ແຈ້ງໃຫ້ບັນດາປະເທດເພື່ອນບ້ານໃນພາກພື້ນຮັບຮູ້ ແລະ ຊອກຫາ ທ້າວ ສົມບັດ ຫຼື ບໍ່?

ເຈົ້າໜ້າທີ່ຕຳຫຼວດລາວ ໄດ້ແຈ້ງຫາຕຳຫຼວດຂອງປະເທດອາຊຽນ ແລະ ຕຳຫຼວດສາກົນ ເພື່ອຊ່ວຍຕິດຕາມ ທ້າວ ສົມບັດ ສົມພອນ ແລະ ລົດຂອງຜູ້ກ່ຽວ.ເຫດການດັ່ງກ່າວນິ້ ແມ່ນເກີດຂີື້ນຢູ່ພາຍໃນຂອງ ສປປ ລາວ ເຖີງວ່າເຫດການລັກສະນະນີ້ບໍ່ຄ່ອຍເກີດຂຶ້ນຢູ່ ສປປ ລາວ ຄືຢູ່ກັບຫຼາຍປະເທດ ແຕ່ຜ່ານມາເຫດການນີ້ ກໍ່ເຄີຍເກີດຂື້ນຕົວຢ່າງເຊັ່ນ:

– ໃນປີ 1988 ມີການລັກພາຕົວເຈົ້າໜ້າທີ່ສະຖານທູດຍີ່ປຸ່ນ ຊອກໄປຊອກມາຫຼາຍປີ ຈື່ງພົບເຫັນຢູ່ປະເທດໄທ.

– ກ່ອນໜ້ານີ້ 5 ປີມີເອື້ອຍ ຂອງພັນລະຍາ ທ່ານ ປຣະສິດ ໄຊຍະສິດ ຫົວໜ້າກົມພິທີການທູດ ກະຊວງການຕ່າງປະເທດ ແຫ່ງ ສປປ ລາວ ກໍ່ໄດ້ຫາຍຕົວໄປຈົນເຖີງປະຈຸບັນກໍ່ຍັງບໍ່ມີຂ່າວຄາວຫຍັງ.

– ປີ 2010 ມີເຈົ້າໜ້າທີ່ຕຳຫຼວດ ຢູ່ກອງບັນຊາການ ປກສ ເມືອງປາກກະດິງ ຊື່ທ້າວສາຄອນ ໄດ້ຫາຍຕົວ, ມາຮອດປະຈຸບັນ ກໍ່ຍັງບໍ່ທັນພົບເຫັນ.

– ໃນກາງປີ 2012 ກໍ່ມີເຈົ້າໜ້າທີ່ຕຳຫຼວດ ຢູ່ກອງບັນຊາການ ປກສ ແຂວງຫຼວງນ້ຳທາ ຊື່ທ້າວ ບຸນລັດ ກໍ່ຫາຍຕົວ ມາຮອດປະຈຸບັນກໍ່ຍັງບໍ່ພົບເຫັນ.

ກໍລະນີແບບນີ້ກໍ່ເກີດຂື້ນຢູ່ຫຼາຍປະເທດ ແລະ ບໍ່ສາມາດເວົ້າໄດ້ວ່າ ເຈົ້າໜ້າທີ່ພວກເຮົາຈະໃຊ້ເວລາສືບສວນ-ສອບສວນ ສຳເລັດໄດ້ໄວ ຫຼື ຍາກງ່າຍແນວໃດ ເນື່ອງຈາກວ່າກໍລະນີດັ່ງກ່າວມີຄວາມສັບສົນ. ໃນກໍລະນີນີ້ ພວກເຮົາທີ່ເປັນພົນລະເມືອງລາວດ້ວຍກັນ ກໍ່ຍີ່ງມີຄວາມເສຍໃຈ ແລະ ເຫັນໃຈນຳຄອບຄົວ, ຍາດຕິພີ່ນ້ອງຂອງຜູ້ກ່ຽວ, ໃຜໆກໍ່ຢາກໃຫ້ຜູ້ກ່ຽວກັບມາຫາຄອບຄົວໄດ້ຢ່າງປອດໄພ ແລະ ຂອບໃຈນຳທຸກຄົນ, ອົງການຈັດຕັ້ງສາກົນຫຼາຍປະເທດທີ່ເປັນຫ່ວງ. ແຕ່ຖາມວ່າມື້ໃດ ຈະດຳເນີນສຳເລັດ? ບໍ່ມີໃຜຕອບໄດ້, ເຈົ້າໜ້າທີ່ພວກເຮົາຍັງດຳເນີນການສືບສວນ-ສອບສວນຢູ່.

ສະນັ້ນ, ຕໍ່ເຫດການດັ່ງກ່າວຂ້າງເທີງນັ້ນ ພວກເຮົາກໍ່ໄດ້ມີການແຈ້ງຜ່ານທັງໂທລະພາບ, ໜັງສືພິມ ແລະ ໄດ້ແຈ້ງຫາເຈົ້າໜ້າທີ່ຕຳຫຼວດແຂວງ, ເມືອງໃນທົ່ວປະເທດ, ແຈ້ງຫາຕຳຫຼວດສາກົນ ແລະ ຕຳຫຼວດອາຊຽນ ເພື່ອຊ່ວຍຊອກຫາຂໍ້ມູນ ແຕ່ກໍ່ຍັງບໍ່ທັນມີຂໍ້ມູນຫຼັກຖານຮັດກຸມເພື່ອຊອກຫາຕົວ ທ້າວສົມບັດ ສົມພອນໄດ້ເທື່ອ ເຊີ່ງຄະນະນຳກະຊວງປ້ອງກັນຄວາມສະຫງົບ ກໍ່ຄືກົມໃຫຍ່ຕຳຫຼວດ ໄດ້ເອົາໃຈໃສ່ຊີ້ນຳຢ່າງເປັນປົກກະຕິ ຕໍ່ຄະນະຮັບຜິດຊອບດຳເນີນຄະດີ, ຄະນະດຳເນີນຄະດີກໍ່ໄດ້ມີຄວາມຮັບຜິດຊອບສູງ ແລະ ບໍ່ໄດ້ລົດລະຄວາມພະຍາຍາມໃນການສືບສວນ-ສອບສວນ ເພື່ອຊອກຮູ້ວ່າເຫດການຕົວຈິງເກີດຂື້ນແນວໃດແທ້, ກົງກັນຂ້າມຜ່ານມາ ຍັງມີບາງບຸກຄົນ, ບາງອົງການຈັດຕັ້ງບໍ່ສັງກັດລັດຖະບານ, ບາງສື່ມວນຊົນຕ່າງປະ ເທດ ໄດ້ຕີລາຄາຕໍ່ເຫດການດັ່ງກ່າວແບບບໍ່ສ້າງສັນ, ປັ່ນປ່ວນພາຍໃນສັງຄົມ, ໃສ່ຮ້າຍປ້າຍສີວ່າເຈົ້າໜ້າທີ່ຕຳຫຼວດເປັນຜູ້ກັກຕົວ ທ້າວ ສົມບັດ ສົມພອນ ແມ່ນບໍ່ຖືກກັບຄວາມຈິງ ຄືກັບເຫດການທີ່ເກີດຂື້ນໃນປີ 2010 ມີບຸກຄົນ ແລະ ອົງການຈັດຕັ້ງຕ່າງໆ ລວມທັງສື່ມວນຊົນຢູ່ຕ່າງປະເທດ ໃສ່ຮ້າຍປ້າຍສີ ວ່າເຈົ້າໜ້າທີ່ຕຳຫຼວດຢູ່ຄ້າຍຄຸມຂັງໂພນຕ້ອງ ເປັນຜູ້ຂົ່ມຂືນທຳສຳເລົາ ນາງ ສຸມັດຕາ ຈົນຖືພາ ຄົນສັນຊາດອັງກິດ ເປັນຜູ້ຕ້ອງຫາຄ້າຂາຍຢາເສບຕິດປະເພດເຮໂລອີນ ແຕ່ສຸດທ້າຍແມ່ນເລ່ລ່ຽມກົນອຸບາຍຂອງຜູ້ກ່ຽວເອງ ໂດຍນຳເອົານ້ຳອະຊຸຈິຈາກ ທ້າວ ຈອນ ວັດສັນ ສັນຊາດອັງກິດ ເປັນຜູ້ຕ້ອງຫາທີ່ຖືກກັກຂັງຢູ່ຄ້າຍຄຸມຂັງໂພນຕ້ອງດ້ວຍກັນ ມາຊີດເຂົ້າອະໄວຍະວະເພດຂອງຕົນເອງ ຈື່ງເຮັດໃຫ້ຖືພາເພື່ອໃຫ້ຫຼຸດພົ້ນຈາກໂທດປະຫານຊີວິດ.

ດັ່ງນັ້ນ, ຈື່ງແຈ້ງມາຍັງທຸກພາກສ່ວນ, ທຸກອົງການຈັດຕັ້ງຊາບ ຖ້າຫາກໃຜມີແຫຼ່ງຂ່າວຂໍ້ມູນຫຼັກຖານໃດໆ ກ່ຽວຂ້ອງກັບບັນຫາດັ່ງກ່າວນີ້ ສະເໜີໃຫ້ພົວພັນກັບເຈົ້າໜ້າທີ່ຕຳຫຼວດເມືອງ, ແຂວງ, ນະຄອນຫຼວງ ໃນຂອບເຂດທົ່ວປະເທດ ເພື່ອຈະໄດ້ພ້ອມກັນມີສ່ວນຮ່ວມໃນການແກ້ໄຂບັນຫາດັ່ງກ່າວນີ້ ໃຫ້ລຸລ່ວງໄປດ້ວຍດີ.

Off

Comments are closed.