20th Nov2019

ປກສ ແຂວງວຽງຈັນ ກັກຕົວເປົ້າໝາຍຊື້-ຂາຍຢາເສບຕິດ ພ້ອມຂອງກາງຢາບ້າ 66.000 ເມັດ

by somchan

ວັນທີ 10 ກັນຍາ 2019 ນີ້ ເຈົ້າໜ້າທີ່ຕໍາຫຼວດພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ໄດ້ເຄື່ອນໄຫວ ຕິດຕາມເປົ້າໝາຍຊື້-ຂາຍຢາເສບຕິດຢູ່ຂອບເຂດເມືອງໝື່ນ ແຂວງວຽງຈັນ ກໍ່ສາມາດຈັບຕົວເປົ້າໝາຍໄດ້ 2 ຄົນ ພ້ອມທັງ ພົບເຫັນຂອງກາງຢາບ້າ ຈໍານວນ 33 ມັດ ເທົ່າກັບ 66.000 ເມັດ ແລະ ປືນສັ້ນຍີ່ຫໍ້ GOOK 19 ຈໍານວນ 1 ກະບອກ ພ້ອມດ້ວຍລູກປືນ 14 ລູກ ເປົ້າໝາຍທັງສອງຄົນຄື: ທ້າວ ຕົ່ງກູ້ວ່າງ ອາຍຸ 43 ປີ, ບ້ານນາປ່າໄຜ່, ທ້າວ ຈາວື່ ຫຼື ຊົງວ່າງ ອາຍຸ 32 ປີ, ບ້ານ ນາຍາວ ທັງສອງຢູ່ເມືອງໝື່ນ ແຂວງວຽງຈັນ.

ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດໃນເບື້ອງຕົ້ນ ພວກກ່ຽວ ໄດ້ໃຫ້ການຮັບສາລະພາບວ່າ: ຢາບ້າຈໍານວນ 66.000 ເມັດ ແມ່ນເປັນຂອງພວກກ່ຽວແທ້ ເຊິ່ງໄດ້ຊື້ນໍາຜູ້ຮ່ວມຂະບວນການບໍ່ຊາບຊື່ ບໍ່ຮູ້ບ້ານ ມາສົ່ງໃຫ້ຢູ່ເຮືອນ ທ້າວ ຕົ່ງກູ້ວ່າງ ໃນລາຄາ 138.600.000 ກີບ(ໜຶ່ງຮ້ອຍສາມສິບແປດລ້ານຫົກແສນກີບ) ແລ້ວຈະນຳເອົາໄປຂາຍຕໍ່ໃຫ້ຜູ້ຮ່ວມຂະບວນການ ມັດລະ 9.000.000 ກີບ(ເກົ້າລ້ານກີບ) ໄດ້ນັດສົ່ງຢາບ້າໃຫ້ຜູ້ຮ່ວມຂະບວນການຢູ່ເຮືອນພັກແຫ່ງໜຶ່ງຂອບເຂດເມືອງໝື່ນ ໃນຄະນະທີ່ກໍາລັງສົ່ງຢາບ້າຢູ່ນັ້ນ ຈຶ່ງຖຶກເຈົ້າໜ້າທີ່ເຂົ້າປິດລ້ອມ ແລະ ທໍາການກວດຄົ້ນຫ້ອງທີ່ພວກກ່ຽວພັກຢູ່ນັ້ນຈຶ່ງພົບເຫັນຂອງກາງບ້າຢາ ແລະ ເຄື່ອງອື່ນໆ.

ປະຈຸບັນ, ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ແຂວງວຽງຈັນ ກໍາລັງດໍາເນີນການສືບສວນ-ສອບສວນ ພວກກ່ຽວທັງສອງ ເພື່ອຂະຫຍາຍຜົນຫາກຸ່ມແກ້ງ, ເຄືອຂ່າຍ, ຜູ້ຮ່ວມຂະບວນການ ມາລົງໂທດຕາມລະບຽບກົດໝາຍຂອງບ້ານເມືອງ.

Off

Comments are closed.