14th Jun2019

ປກສ ແຂວງສະຫວັນນະເຂດ ກັກຕົວພວກຄ້າຂາຍຢາເສບຕິດ 4 ຄົນ ພ້ອມ ຢາໄອສ໌ 5 ກິໂລ.

by somchan

ໃນວັນທີ 4 ມິຖຸນາ 2019 ນີ້ ເຈົ້າໜ້າທີ່ ພະແນກຕຳຫຼວດ ສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດ ກັກຕົວພວກຄ້າຂາຍຢາເສບຕິດໄດ້  4 ຄົນ ພ້ອມຂອງກາງ ຢາບ້າ 9 ມັດ ຫຼື 18,185 ເມັດ, ຢາໄອສ໌ 5 ຖົງ ເທົ່າກັບ 5 ກິໂລກະລາມ  ລົດໃຫຍ່ ຍີ່ຫໍ້ຮຸ່ນໃດ ຄຼີຕ້າ ສີດຳ ບໍ່ຕິດປ້າຍທະບຽນ ໂທລະສັບ 9 ໜ່ວຍ ກ້ອງຖ່າຍຮູບ 1 ໜ່ວຍ ແລະ ເງິນຈຳນວນ 400,000 ກີບ. ຜູ້ກະທຳຜິດທັງ 4 ຄົນຄື: ທ້າວ ເລັ່ງຫາ ອາຍຸ 40 ປີ  ຢູ່ບ້ານ ນ້ຳພາວ ເມືອງຄຳເກີດ ແຂວງບໍລິຄຳໄຊ, ທ້າວ ປໍຊົງ ຫຼື (ຈົວ) ອາຍຸ 24 ປີ  ຢູ່ບ້ານ ນາແສນຄຳ ເມືອງໄຊ ແຂວງອຸດົມໄຊ, ນາງ ລີຈ້າງ ອາຍຸ 16 ປີ, ແລະ ນາງ ຊົວວ່າງ ອາຍຸ 16 ປີ ທັງສອງ ຢູ່ ບ້ານ ທ່າດິນແດງ ເມືອງໄຊທານີ ນະຄອນຫຼວງວຽງຈັນ.

ເຈົ້າໜ້າທີ່ໃຫ້ຮູ້ວ່າ: ໃນເວລາ 10ໂມງ 30 ນາທີ ວັນທີ 4 ມິຖຸນາ 2019 ເຈົ້າໜ້າທີ່ຕຳຫຼວດປະຈຳຢູ່ຈຸດກວດກາດ່ານເຊບັ້ງຫຽງ ເມືອງສອງຄອນ ແຂວງສະຫວັນນະເຂດ ໄດ້ລັດລົດຍີ້ຫໍ້ຮຸນໄດຄຼີຕ້າ ສີດຳ ບໍ່ມີປ້າຍທະບຽນ ທີ່ແລ່ນມາຕາມເສັ້ນທາງ ເລກທີ13 ໃຕ້ ເພື່ອເດີນທາງລົງນະຄອນປາກເຊ ເມື່ອກວດກາເອກະສານລົດ ແຕ່ເຫັນວ່າ: ບຸກຄົນທ່ີຂັບຂີ່ລົດດັ່ງກ່າວມີພິລຸດສົງໃສ ເຈົ້າໜ້າທີ່ຈຶ່ງຂໍກວດຄົ້ນລົດຄັນດັ່ງກ່າວ ຜ່ານການກວດຄົ້ນຈຶ່ງພົບເຫັນ ຢາເສບຕິດ ປະເພດ ຢາໄອສ ຈຳນວນ 5 ຖົງເທົ່າກັບ 5ກິໂລກຼາມ ແລະ ຢາບ້າ 9ມັດ ກັບ 1ຖົງ ເທົ່າກັບ 18,185 ເມັດ ຊຸກເຊື່ອງໄວ້ຢູ່ບ່ອນເກັບເຄື່ອງທ້າຍລົດ  ຈຶ່ງໄດ້ກັກຕົວພວກກ່ຽວທັງ 4 ຄົນ ທີ່ມານຳລົດດັ່ງກ່າວ ຈາກນັ້ນຈືງປະສານສົມທົບກັບເຈົ້າໜ້າທີ່ສະກັດກັ້ນ-ຕ້ານຢາເສບຕິດ ແຂວງສະຫວັນນະເຂດ ເພື່ອນຳຕົວພວກກ່ຽວມາດຳເນີນການສືບສວນ-ສອບສວນ

ຜ່ານການສືບສວນ-ສອບສວນໃນເບື້ອງຕົ້ນ ພວກກ່ຽວໃຫ້ຮູ້ວ່າ: ຢາໄອສ ແລະ ຢາບ້າຈຳນວນດັ່ງກ່າວ ແມ່ນເປັນຂອງ ທ້າວ ເລັ່ງຫາ ແມ່ນຊື້ມາຈາກຜູ້ຮ່ວມຂະບວນການ ຢູ່ແຂວງບໍລິຄຳໄຊ, ສ່ວນ ທ້າວ ປໍຊົງ ຫຼື (ຈົວ) ເປັນຜູ້ຕິດຕໍ່ ຊື້-ຂາຍ ກັບລູກຄ້າ ເຊຶ່ງຊື້ຢາໄອສ 1 ກິໂລກາມ ໃນລາຄາ 100,000 ບາດ ໄປຂາຍຕໍ່ໃຫ້ລູກຄ້າ 1 ກິໂລກາມ ໃນລາຄາ 120,000 ບາດ ສ່ວນຢາບ້າຊື້ໃນລາຄາມັດລະ 10,000 ບາດ ມາຂາຍຕໍ່ໃຫ້ລູກຄ້າໃນລາຄາມັດລະ 15,000 ບາດ ແຕ່ຖືກເຈົ້າໜ້າທີ່ກັກຕົວກ່ອນ  

ສ່ວນພວກຮ່ວມຂະບວນການເຈົ້າໜ້າທີ່ຍັງສືບຕໍ່ນຳຈັບຕົວມາດຳເນີນຄະດີຕາມລະບຽບກົດໝາຍຕໍ່ໄປ.

Off

Comments are closed.