27th Dec2018

ແຂວງອັດຕະປືຈັດກອງປະຊຸມປືກສາຫາລື ແລະ ຊຸກຍູ້ວຽກງານການຈັດຕັ້ງປະຕິບັດ ຄຳສັ່ງຂອງ ນາຍົກລັດຖະມົນຕີ

by somchan

 

ວັນທີ່ 20 ທັນວາ 2018 ນີ້ ພະແນກແຮງງານ ແລະ ສະວັດດີການສັງຄົມ ແຂວງອັດຕະປື ໄດ້ຮ່ວມກັບ ກອງບັນຊາການ ປກສ ແຂວງ ຈັດກອງປະຊຸມປືກສາຫາລື ແລະ ຊຸກຍູ້ວຽກງານ ການຈັດຕັ້ງປະຕິບັດຄຳສັ່ງ ຂອງ ນາຍົກລັດຖະມົນຕີ ວ່າດ້ວຍການອຳນວຍຄວາມສະດວກ ແລະ ໃຫ້ການຮ່ວມມື ໃນການຂື້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວ ໃຫ້ຄົນຕ່າງປະເທດ ຂື້ນທີຫ້ອງວ່າການປົກຄອງແຂວງອັດຕະປື ໃຫ້ກຽດເຂົ້າຮ່ວມຂອງ ພົຕ ກົງທອງ ພົງວິຈິດ ຮອງເລຂາພັກກະຊວງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ມີທ່ານ ພົຈວ ທອງຈັນ ຈັນທະພົງ ຄະນະປະຈຳພັກແຂວງ ຫົວໜ້າກອງບັນຊາການ ປກສ ແຂວງ ຫົວໜ້າຄະນະຊີ້ນຳການຂື້ນທະບຽນ ແລະ ອອກບັດອະນຸຍາດເຄືາອນໄຫວຊົ່ວຄາວໃຫ້ຄົນຕ່າງປະເທດ ພາຍໃນແຂວງອັດຕະປື ມີກຳມະການພັກແຂວງ ຫົວໜ້າພະແນກແຮງງານ ແລະ ສະວັດດີການສັງຄົມ ຄະນະຊີ້ນຳການຂື້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ,ມີພະນັກງານຈາກກະຊວງ ແລະ ພະແນກການທີ່ກ່ຽວຂ້ອງອ້ອມຂ້າງແຂວງເຂົ້າຮ່ວມ.

ທ່ານ ພົຈວ ທອງຈັນ ຈັນທະພົງ ລາຍງານຜົນການຈັດຕັ້ງປະຕິບັດການຂື້ນທະບຽນ ແລະ ອອກບັດອະນຸຍາດເຄື່ອນໄຫວຊົວຄາວໃຫ້ຄົນຕ່າງປະເທດ ໄລຍະ 1 ແລະ ໄລຍະ 2 ໂດຍສັງລວມໃນ 5 ຕົວເມືອງ ທົ່ວແຂວງອັດຕະປື ສາມາດເຄື່ອນໄຫວອອກບັດຊົວຄາວໃຫ້ຄົນຕ່າງປະເທດໄດ້ທັງໝົດ 1,378 ຄົນ ຍີງ 497 ຄົນ ໃນນັ້ນໄດ້ອອກບັດຊົວຄາວ 3 ເດືອນ ມີ 1,348 ຄົນ ອອກບັດ 6 ເດືອນ ມີ 30 ຄົນ ຜູ້ທີມີເງືອນໄຂປັບສະຖານະພາບໃຫ້ຖືກຕ້ອງຕາມລະບຽບກົດໝາຍ ມີ 253 ຄົນ ຜູ້ມີເງືອນໄຂໃຫ້ສຳລະສະສາງເພື່ອຍຸດຕິການເຄື່ອນໄຫວ ມີ 1,125 ຄົນ ຈຳນວນຄົນຕ່າງປະເທດທີກວດກາຕົວຈີງ ທີບໍ່ທັນໄດ້ຂື້ນທະບຽນ ມີ 200 ກ່ວາຄົນ ກອງປະຊຸມໄດ້ປະກອບຄຳຄິດຄຳເຫັນ ແລະ ປືກສາຫາລື ເພື່ອເຮັດໃຫ້ການຈັດຕັ້ງປະຕິບັດວຽກງານການຂື້ນທະບຽນ ແລະ ອອກບັດອະນຸຍາດເຄືອນໄຫວຊົ່ວຄາວໃຫ້ຄົນຕ່າງປະເທດ ມີຄວາມຖືກຕ້ອງ ແລະ ສອດຄ່ອງຍີ່ງຂື້ນ.

ໂອກາດນີ້ ທ່ານ ກົງທອງ ພົງວິຈິດ ໄດ້ຍ້ອງຍໍຊົມເຊີຍມາຍັງຄະນະພັກ-ຄະນະປົກຄອງແຂວງ ເວົ້າລວມ,ເວົ້າສະເພາະ ກໍ່ແມ່ນບັນດາຂະແໜງການທີກ່ຽວຂ້ອງ ທີ່ມີຄວາມຮັບຜິດຊອບສູງໃນການຈັດຕັ້ງປະຕິບັດຄຳສັ່ງກໍຄືບັນດານິຕິກຳອື່ນໆທີ່ກ່ຽວຂ້ອງ ເຊີ່ງມັນໄດ້ສ່ອງແສງໃຫ້ເຫັນຜົນງານທີ່ຍາດມາໄດ້ ແລະທ່ານໄດ້ຮຽກຮ້ອງໃຫ້ຄະນະພັກ-ຄະນະນຳຂອງບັນດາຂະແໜງການທີ່ກ່ຽວຂ້ອງ ຈົ່ງໄດ້ເອົາໃຈໃສ່ສືບຕໍ່ຊີ້ນຳ-ນຳພາໃນການຈັດຕັ້ງປະຕິບັດຄຳສັ່ງດັ່ງກ່າວໃຫ້ໄດ້ຮັບໝາກຜົນຫຼາຍຂື້ນ ເພື່ອເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດີຂື້ນເປັນກ້າວໆ.

Off

Comments are closed.