01st Nov2019

ປະກາດຍົກຍ້າຍນາຍຕຳຫຼວດ ທີ່ຂຶ້ນກັບກອງບັນຊາການ ປກສ ແຂວງສະຫວັນນະເຂດ

by somchan

ໃນວັນທີ 31 ຕຸລາ 2019 ນີ້ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງ ປກສ ໄດ້ເຂົ້າຮ່ວມພິທີປະກາດການຍົກຍ້າຍ ແລະ ແຕ່ງຕັ້ງພະນັກງານຂັ້ນນໍາພາ-ບັນຊາ ກອງບັນຊາການ ປກສ ແຂວງສະຫວັນນະເຂດ ມີບັນດາການນຳແຂວງສະຫວັນນະເຂດ, ພ້ອມດ້ວຍຄະນະພັກ-ຄະນະນຳ ແລະ ພະນັກງານນັກຮົບທົ່ວກອງບັນຊາການເຂົ້າຮ່ວມ.

ພັທ ຄອນສະຫວັນ ສົມພະໄຊ ຫົວໜ້າກົມຈັດຕັ້ງພະນັກງານ ກົມໃຫຍ່ການເມືອງປ້ອງກັນຄວາມສະຫງົບ ໄດ້ຜ່ານຂໍ້ຕົກລົງຂອງທ່ານລັດຖະມົນຕີກະຊວງ ປກສ ວ່າດ້ວຍການຍົກຍ້າຍນາຍຕຳຫຼວດ ທີ່ຂຶ້ນກັບກອງບັນຊາການ ປກສ ແຂວງສະຫວັນນະເຂດ ເຊິ່ງໄດ້ຕົກລົງຍົກຍ້າຍ ພັອ ຄຳພົນ ສີຫາປັນຍາ ຈາກກອງບັນຊາການ ປກສ ແຂວງສະຫວັນນະເຂດ ໄປຮັບໜ້າທີ່ໃໝ່ຢູ່ກະຊວງປ້ອງກັນຄວາມສະຫງົບ, ຍົກຍ້າຍ ພັອ ລຳຄູນ ວໍລະວົງ ຈາກກອງບັນຊາການ ປກສ ແຂວງສະຫວັນນະເຂດ ໄປຮັບໜ້າທີ່ໃໝ່ຢູ່ຫ້ອງການປົກຄອງແຂວງ ສະຫວັນນະເຂດ, ຍົກຍ້າຍ ພັອ ວັນໄຊ ລີໄຊຍະລາດ ຈາກກອງບັນຊາການ ປກສ ແຂວງສະຫວັນນະເຂດ ໄປຮັບໜ້າທີ່ໃໝ່ຢູ່ກະຊວງປ້ອງກັນຄວາມສະຫງົບ, ຍົກຍ້າຍ ພັອ ສົມໝາຍ ພົມມະຈັນ ຈາກກອງບັນຊາການປ້ອງກັນສູນກາງໄປຮັບໜ້າທີ່ໃໝ່ຢູ່ກອງບັນຊາການ ປກສ ແຂວງສະຫວັນນະເຂດ ແລະ ຂໍ້ຕົກລົງວ່າດ້ວຍການແຕ່ງຕັ້ງນາຍຕຳຫຼວດ ທີ່ຂຶ້ນກັບກອງບັນຊາການ ປກສ ແຂວງສະຫວັນນະເຂດ ໃນນີ້ໄດ້ແຕ່ງຕັ້ງ ພັອ ສົມໝາຍ ພົມມະຈັນ ເປັນຮັກສາການຫົວໜ້າກອງບັນຊາການ ປກສ ແຂວງສະຫວັນນະເຂດ, ພັທ ບຸນເລີດ ຂະທຸມພົນ ເປັນຮອງ, ພັທ ສັງທອງ ສີປະເສີດ ເປັນຮອງ ສ່ວນຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.

ໃນໂອກາດດັ່ງກ່າວ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງ ປກສ ໄດ້ມີຄຳເຫັນໂອ້ລົມຕໍ່ນາຍຕຳຫຼວດທີ່ໄດ້ຮັບການແຕ່ງຕັ້ງ ແລະ ຍົກຍ້າຍໃນຄັ້ງນີ້ ແມ່ນຄວາມຮຽກຮ້ອງຕ້ອງການຂອງໜ້າທີ່ການເມືອງ ແລະ ເປັນກົດເກນພາວະວິໄສ ແມ່ນລະບຽບຫຼັກການຂອງພັກ ເພື່ອປັບປຸງການຈັດຕັ້ງໃຫ້ມີຄວາມໜັກແໜ້ນ ເຕີບໃຫຍ່ເຂັ້ມແຂງສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າການເມືອງໃນແຕ່ລະໄລຍະ    ທ່ານລັດຖະມົນຕີ ກະຊວງປ້ອງກັນຄວາມສະຫງົບ ຍັງໄດ້ເນັ້ນໜັກໃຫ້ນາຍຕໍຳຫຼວດທີ່ໄດ້ຮັບການແຕ່ງຕັ້ງ ແລະ ຍົກຍ້າຍ ຈົ່ງເພີ່ມທະວີ-ຍົກສູງສະຕິຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ ເປັນແບບຢ່າງໃນການຈັດຕັ້ງປະຕິບັດແນວທາງຂອງພັກ ການຊີ້ນຳຂອງຂັ້ນເທິງ ເອົາໃຈໃສ່ກໍ່ສ້າງ-ປັບປຸງກຳລັງ ໃຫ້ມີຄວາມເຕີບໃຫຍ່ເຂັ້ມແຂງ ມີແບບແຜນທີ່ທັນສະໄໝ ເພື່ອຮັບໃຊ້ຊາດ-ຮັບໃຊ້ປະຊາຊົນຢ່າງແທ້ຈິງ. ພ້ອມກັນນັ້ນ ທ່ານຍັງໄດ້ເນັ້ນໜັກໃຫ້ຄະນະພັກ-ຄະນະບັນຊາ ແລະ ພະນັກງານ-ນັກຮົບທົ່ວກອງບັນຊາການ ປກສ ແຂວງສະຫວັນນະເຂດ ໃຫ້ເອົາໃຈໃສ່ປະຕິບັດຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ, ມອບໃຫ້ບຸກຄົນຮັບຜິດຊອບ ສິ່ງສຳຄັນແມ່ນເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ ເພື່ອເປັນຈິດໜຶ່ງໃຈດຽວໃນການປະຕິບັດຕາມແນວທາງຂອງພັກ ມະຕິຄຳສັ່ງຂອງຂັ້ນເທິງ ເຮັດສຳເລັດໜ້າທີ່ ທີ່ໄດ້ຮັບມອບໝາຍ ເປັນຕົ້ນແມ່ນການສະກັດກັ້ນ ແລະ ແກ້ໄຂປະກົດການຫຍໍ້ທໍ້ຢູ່ໃນກຳລັງໃຫ້ໝົດໄປ, ຕ້ານ ແລະ ສະກັດກັ້ນການສໍ້ລາດບັງຫຼວງ ການສວຍໃຊ້ໜ້າທີ່ຕຳແໜ່ງໃນທາງທີ່ບໍ່ຖືກຕ້ອງໃຫ້ເດັດຂາດ ຫາກເກີດຂຶ້ນບ່ອນໃດແກ້ໄຂຢູ່ບ່ອນນັ້ນໃຫ້ທັນເວລາ, ຈັດຕັ້ງລະບອບປະຈຳການໃຫ້ເຂັ້ມງວດ ຫັນພະນັກງານລົງກໍ່ສ້າງຮາກຖານ ປຸກລະດົມປະຊາຊົນໃຫ້ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເພື່ອສະກັດກັ້ນ ແກ້ໄຂບັນດາໜໍແໜງທີ່ສ້າງຄວາມບໍ່ສະຫງົບທາງດ້ານການເມືອງ ຄວາມບໍ່ເປັນລະບຽບຮຽບທາງສັງຄົມ ເປັນຕົ້ນແມ່ນ ບັນຫາຢາເສບຕິດ, ສໍ້ໂກງຊັບ, ລັກຊັບ, ອຸປະຕິເຫດຕາມທ້ອງຖະໜົນ, ຄ້າຂາຍເຖື່ອນ, ການເຂົ້າ-ອອກເມືອງບໍ່ຖືກຕ້ອງ, ແກ້ໄຂຄົນຕ່າງປະເທດທີ່ມາເຄື່ອນໄຫວຜິດກົດໝາຍຂອງ ສປປ ລາວ, ແກ້ໄຂບັນຫາໂສເພນີ ແລະ ບັນຫາການຄ້າມະນຸດ ໃຫ້ຫຼຸດນ້ອຍລົງ ເພື່ອເຮັດໃຫ້ແຂວງສະຫວັນນະເຂດມີຄວາມສະຫງົບທາງດ້ານການເມືອງ ມີຄວາມເປັນລະບຽບຮຽບຮ້ອຍທາງສັງຄົມ ການດຳລົງຊີວິດຂອງປະຊາຊົນມີຄວາມປອດໄພ.

Off

Comments are closed.