07th Oct2019

ປະກາດແຕ່ງຕັ້ງຫົວໜ້າກອງບັນຊາການ ປກສ ແຂວງຈຳປາສັກ

by somchan

ກະຊວງປ້ອງກັນຄວາມສະຫງົບ ໄດ້ປະກາດແຕ່ງຕັ້ງຫົວໜ້າກອງບັນຊາການ ປກສ ແຂວງຈຳປາສັກ ໃນທ້າຍອາທິດຜ່ານມານີ້ ໂດຍການເປັນກຽດເຂົ້າຮ່ວມ ຂອງພົນໂທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້້ອງກັນຄວາມສະຫງົບ ມີຄະນະພັກ-ຄະນະບັນຊາພະນັກງານນັກຮົບອ້ອມຂ້າງ ປກສ ແຂວງ ຈຳປາສັກ ເຂົ້າຮ່ວມ.

ພັນໂທ ຄອນສະຫວັນ ສົມພະໄຊ ຫົວໜ້າກົມຈັດຕັ້ງພະນັກງານກົມໃຫ່ຍການເມືອງ ກະຊວງປ້ອງກັນຄວາມສະຫງົບ ໄດ້ຂື້ນຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງ ພັນເອກ ຖາວອນ ບຸນກອງພິມ ຮັກສາການຫົວໜ້າກອງບັນຊາການ ປກສ ແຂວງຈຳປາສັກ ຂື້ນເປັນຫົວໜ້າກອງບັນຊາການ ປກສ ແຂວງຈຳປາສັກຜູ້ໃໝ່ ສ່ວນຮອງກອງບັນຊາການ ປກສ ແຂວງທີ່ມີຢູ່ແລ້ວແມ່ນຮັກສາໄວ້ຄື ເກົ່າ. ການປະກາດແຕ່ງຕັ້ງ ແລະ ປັບປຸງກົງຈັກການຈັດຕັ້ງຄັ້ງນີ້ ແມ່ນອີງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານຢູ່ແຂວງຈຳປາສັກ ໃຫ້ມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານ ການຈັດຕັ້ງ ແລະ ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.

 

ໂອກາດດັ່ງກ່າວ ພົນໂທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງ ປ້ອງກັນຄວາມສະຫງົບ ໄດ້ມີຄຳເຫັນໂອ້ລົມຕໍ່ນາຍຕຳຫຼວດທີ່ໄດ້ຮັບການແຕ່ງຕັ້ງເປັນຫົວໜ້າກອງບັນຊາການຜູ້ໃໝ່ໃນຄັ້ງນີ້ ຕ້ອງຍົກສູງຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບມອບໝາຍ, ເຕົ້າໂຮມຄວາມສາມັກຄີພາຍໃນໃຫ້ແໜ້ນແຟ້ນ ຮັບປະກັນໃຫ້ກົມກອງມີຄວາມເຕີບໃຫ່ຍເຂັ້ມແຂງຂື້ນໄປເລື່ອຍໆ ສືບຕໍ່ເຮັດໜ້າທີ່ໃຫ້ເຕີບໃຫ່ຍ ແລະ ທັນສະໄໝຂື້ນໄປເທື່ອລະກ້າວ.

Comments are closed.