23rd Mar2020

ປະກາດແຕ່ງຕັ້ງຮັກສາການຫົວໜ້າກອງບັນຊາການ ປກສ ນະຄອນຫຼວງວຽງຈັນ

by somchan

ພິທີປະກາດແຕ່ງຕັ້ງຮັກສາການຫົວໜ້າກອງບັນຊາການ ປກສ ນະຄອນຫຼວງວຽງຈັນ ໄດ້ຈັດຂຶ້ນໃນຕອນບ່າຍວັນທີ 20 ມີນາ 2020 ນີ້ ທີ່ຫ້ອງປະຊຸມ ກອງບັນຊາການ ປກສ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ພົນໂທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ມີຄະນະພັກ, ພະນັກງານຫຼັກແຫຼ່ງ, ຫ້ອງ, ກອງພັນ, ກອງບັນຊາການ ປກສ ນະຄອນຫຼວງວຽງ ແລະ ແຂກຖືກເຊີນເຂົາຮ່ວມ. 

ໃນພິທີ ພັນເອກ ຄອນສະຫວັນ ສົມພາໄຊ ຫົວໜ້າກົມຈັດຕັ້ງພະນັກງານກົມໃຫຍ່ການເມືອງປ້ອງກັນຄວາມສະຫງົບ ໄດ້ຜ່ານດຳລັດຂອງນາຍົກລັດຖະມົນຕີ ວ່າດ້ວຍການອະນຸມັດໃຫ້ ພົນຈັດຕະວາ ບຸບຜາ ສີພົມມາ ຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ອອກພັກການ-ຮັບອຸດໜູນບຳນານ ແລະ ຜ່ານຂໍ້ຕົກລົງຂອງລັດຖະມົນຕີ  ວ່າດ້ວຍການແຕ່ງຕັ້ງ ພັນໂທ ສຸກພະຈັນ ບຸດດາຄຳ ເປັນຮັກສາການຫົວໜ້າກອງບັນຊາການ ປ້ອງກັນຄວາມສະຫງົບ ຄອນຫລວງວຽງຈັນ, ສ່ວນຮອງທີ່ມີຢູ່ແລ້ວແມ່ນຮັກສາໄວ້ເກົ່າ. 

ໃນໂອກາດທີ່ມີຄວາມໝາຍສຳຄັນນີ້ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ແລະ ກໍ່ໄດ້ຍ້ອງຍໍຊົມເຊີຍຜົນງານທີ່ຫົວໜ້າກອງບັນຊາການ ປ້ອງກັນຄວາມສະຫງົບຜູ້ເກົ່າເຮັດໄດ້ໃນໄລຍະຜ່ານມາ ພ້ອມທັງ ເໜັ້ນໜັກໃຫ້ຜູ້ໄດ້ຮັບຕຳແໜ່ງໃໝ່ ຈົ່ງເຊິດຊູເຊື້ອຜົນງານ, ເອົາໃຈໃສ່ຊີ້ນຳ-ນຳພາ ພະນັກງານ-ນັກຮົບ ທົ່ວກອງບັນຊາການ ປກສ ນະຄອນຫຼວງວຽງຈັນ ໃຫ້ມີຄວາມໜັກແໜ້ນ ເຂັ້ມແຂງ, ປະຕິບັດໜ້າທີ່ຢ່າງມີປະສິດທິຜົນ  ເພື່ອແນໃສ່ເຮັດໃຫ້ນະຄອນຫຼວງມີຄວາມສະຫງົບ ແລະ ເປັນລະບຽບຮຽບຮ້ອຍ.

Comments are closed.