03rd Jul2018

ກອງປະຊຸມສະໄໝສາມັນເທື່ອທີ 5 ຂອງສະພາ ແຫ່ງຊາດ ຊຸດທີ VIII ພິຈາລະນາຮັບຮອງ ການຊີ້ແຈງອະທິບາຍຂອງລັດຖະບານ

by somchan

ໃນກອງປະຊຸມສະໄໝສາມັນເທື່ອທີ 5 ຂອງສະພາ ແຫ່ງຊາດ ຊຸດທີ VIII ໄດ້ພິຈາລະນາຮັບຮອງ ການຊີ້ແຈງອະທິບາຍຂອງລັດຖະບານຕໍ່ກັບຄຳຊັກຖາມ ຂອງສະພາແຫ່ງຊາດ ໂດຍສະເພາະແມ່ນ ມາດຕະການ ແລະ ວິທີແກ້ໄຂຕໍ່ປະກົດການຫຍໍ້ທໍ້ໃນສັງຄົມ ທ່ານ ນາງ ສອນສະຫວັນ ວິຍະເກດ ເລຂາທິການສະພາແຫ່ງຊາດ ໄດ້ໃຫ້ຮູ້ວ່າການຊີ້ແຈງອະທິບາຍຂອງລັດຖະບານກ່ຽວກັບມາດຕະການ ແລະ ວິທີການແກ້ໄຂບັນດາປະກົດການຫຍໍ້ທໍ້ໃນສັງຄົມເປັນຕົ້ນບັນຫາຢາເສບຕິດ ແລະ ບັນຫາອຸປະຕິເຫດ.

ນອກຈາກນັ້ນກອງປະຊຸມສະພາແຫ່ງຊາດ ສະເໜີໃຫ້ລັດຖະບານເອົາໃຈໃສ່ບາງມາດຕະການເພີ່ມຕື່ມຄື: ບັນຫາຢາເສບຕິດ ໂດຍການເພີ່ມທະວີໂຄສະນາ, ສຶກສາອົບຮົມປູກຈິດສຳນຶກໃຫ້ທົ່ວປວງຊົນດ້ວຍຫຼາຍເນື້ອໃນ,ຫຼາຍຮູບການ ແລະ ຫຼາຍວິທີເພື່ອໃຫ້ສັງຄົມຮັບຮູ້ຜົນຮ້າຍໄພອັນຕະລາຍຂອງຢາເສບຕິດ, ພ້ອມທັງເຮັດໃຫ້ວຽກງານສະກັດກັ້ນ ແລະ ຕ້ານຢາເສບຕິດກາຍເປັນສະຕິເປັນເຈົ້າການ, ຄວາມຮັບຜິດຊອບ ແລະ ເປັນໜ້າທີ່ຂອງທົ່ວປວງຊົນ, ຄົ້ນຄວ້າສ້າງຍຸດທະສາດແກ້ໄຂຢາເສບຕິດໄລຍະຍາວໃຫ້ເປັນຮູບປະທຳ, ປັບປຸງ ແລະ ບັງຄັບໃຊ້ກົດໝາຍວ່າດ້ວຍຢາເສບຕິດຕໍ່ຜູ້ກະທຳຜິດເປັນຕົ້ນຜູ້ຜະລິດ, ຜູ້ຂາຍ-ຜູ້ຊື້, ຜູ້ຂົນສົ່ງ, ຜູ້ຄອບຄອງ ແລະ ຜູ້ເສບຢາເສບຕິດໃຫ້ມີຄວາມເຂັ້ມງວດ ແລະ ເດັດຂາດຂື້ນຕື່ມ, ສືບຕໍ່ຊີ້ນຳ-ນຳພາ ແລະ ສຶກສາອົບຮົມການເມືອງ-ແນວຄິດໃຫ້ເຈົ້າໜ້າທີ່ທີ່ກ່ຽວຂ້ອງໂດຍກົງກ່ຽວກັບຢາເສບຕິດໃຫ້ມີຈັນຍາບັນ, ຈັນຍາທຳເພື່ອຮັບປະກັນໃນການປະຕິບັດໜ້າທີ່ວຽກງານໃຫ້ມີຄວາມໂປ່ງໃສ,ຍຸຕິທຳຖືກຕ້ອງຕາມກົດໝາຍ ແລະ ສະໜອງງົບປະມານເຂົ້າໃສການບຳລຸງສ້າງບຸກຄະລາກອນທີ່ມີຄວາມຮູ້ຄວາມສາມາດ,ການກໍ່ສ້າງແລະປັບປຸງສູນບຳບັດປິ່ນປົວຜູ້ຕິດຢາເສບຕິດ, ສູນວິໄຈຢາເສບຕິດ ແລະ ຄ້າຍດັດສ້າງໃຫ້ມີຄຸນນະພາບຂື້ນຕື່ມລວມທັງການສະໜອງພາຫະນະ,ອຸປະກອນເຕັກນິກທີ່ຈຳເປັນເພື່ອຮັບໃຊ້ການປະຕິບັດໜ້າທີ່ວຽກງານດັ່ງກ່າວໃຫ້ດີຂື້ນກວ່າເກົ່າ.

Off

Comments are closed.