11th Feb2019

ປະດັບຫຼຽນກຽດຕິຄຸນລັດຖະບານໂອຕຣິດ ໃຫ້ນາຍົກລັດຖະມົນຕີ

by somchan

ໃນວັນທີ 8 ກຸມພາ 2019 ທີ່ຫ້ອງວ່າການສຳນັກງານນາຍົກລັດຖະມົນຕີໄດ້ຈັດພິທີປະດັບຫຼຽນກຽດຕິຄຸນລັດຖະບານໂອຕຣິດ ໃຫ້ທ່ານ ທອງລຸນ ສີສຸລິດ ນາຍົກລັດຖະມົນຕີ ປະທານກິດຕິມະສັກ ຄະນະກຳມະການບ້ານຊ່ວຍເຫຼືອເດັກນ້ອຍ SOS ລາວ, ໂດຍແມ່ນທ່ານ ກຶນເທີ ປລັດເຕີ ເຈົ້າແຂວງໆ ທີໂຣນ ຕາງໜ້າລັດຖະບານ ປະເທດໂອຕຼິດ ເປັນຜູ້ປະດັບ, ຫຼຽນດັ່ງກ່າວຖືວ່າເປັນຫຼຽນສູງສຸດ ທີ່ລັດຖະບານ ໂອຕຼິດ ມອບໃຫ້ຕ່າງປະເທດ , ການປະດັບຫຼຽນໃນຄັ້ງນີ້ ເພື່ອເປັນການຍ້ອງຍໍສັນລະເສີນ ຄຸນງາມຄວາມດີໃນການປະກອບສ່ວນຊ່ວຍເຫຼືອບ້ານຊ່ວຍເຫຼືອເດັກນ້ອຍ SOS ລາວ , ເຊິ່ງທ່ານເປັນຜູ້ໜຶ່ງທີ່ກໍ່ຕັ້ງໂຄງການບ້ານຊ່ວຍເຫຼືອເດັກນ້ອຍ SOS ລາວ ຕັ້ງແຕ່ປີ 1993 ແລະ ຕະຫຼອດໄລຍະ 25 ປີ, ທ່ານໄດ້ໃຫ້ຄວາມໃກ້ຊິດຕິດແທດ ຊີ້ນຳ ນຳພາ ເອົາໃຈໃສ່ຕໍ່ໂຄງການບ້ານຊ່ວຍເຫຼືອເດັກ SOS ລາວ ໃຫ້ເຕີບໃຫ່ຍຂະຫຍາຍຕົວ ແລະ ເປັນສະຖານທີ່ເບິ່ງແຍງລ້ຽງດູເດັກກຳພ້າ-ກຳພອຍ ທີ່ດ້ອຍໂອກາດ ໃຫ້ມີຊີວິດທີ່ດີໃນສັງຄົມ ປະຈຸບັນມີບ້ານຊ່ວຍເຫຼືອເດັກນ້ອຍ SOS ລາວ ທັງໝົດ 6 ແຫ່ງ ໃນທົ່ວປະເທດ.

ໃນໂອກາດດຽວກັນ ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ປະທານຄະນະກຳມະການບ້ານຊ່ວຍເຫຼືອເດັກນ້ອຍ SOS ລາວ ຕາງໜ້າລັດຖະບານ ສປປ ລາວ ກໍ່ໄດ້ປະດັບຫຼຽນໄຊພັດທະນາ ຊັ້ນ III ໃຫ້ແກ່ທ່ານ ກຶນເທີ ປລັດເຕີ ເຈົ້າແຂວງໆ ທີໂຣນ, ປະເທດໂອຕຼິດ ຊຶ່ງເປັນສະມາຊິກຂອງອົງການ SOS ສາກົນ ແລະ ໄດ້ປະກອບສ່ວນໃຫ້ການສະໜັບສະໜູນໃຫ້ແກ່ອົງການ SOS ສາກົນ ລວມທັງໂຄງການບ້ານຊ່ວຍເຫຼືອເດັກນ້ອຍ SOS ລາວ.

ລັດຖະບານ ສປປ ລາວ ຖືວ່າ ໂຄງການບ້ານຊ່ວຍເຫຼືອເດັກ SOS ລາວ ເປັນຂອງຂັວນອັນລ້ຳຄ່າ ທີ່ອົງການ SOS ສາກົນ ມອບໃຫ້ ລັດຖະບານລາວ ເພື່ອເປັນບ່ອນຢູ່ອາໃສ ສຳລັບເດັກກຳພ້າ-ກຳພອຍ ດ້ວຍໂອກາດທີ່ຂາດທີ່ເພີ່ງພາອາໃສ, ຂາດຜູ້ເບິ່ງແຍງລ້ຽງດູ ບ້ານຊ່ວຍເຫຼືອເດັກນ້ອຍ SOS ລາວ ໄດ້ໃຫ້ການດູແລເບິ່ງແຍງໃຫ້ຄວາມຮັກ, ຄວາມອົບອຸ່ນ ຕາມຫຼັກການຂອງອົງການ SOS ສາກົນ ແລະ ສອດຄ່ອງກັບຮີດຄອງປະເພນີອັນດີງາມຂອງລາວ ໃຫ້ເດັກໄດ້ຮັບການລ້ຽງດູເບິ່ງແຍງຊີວິດການເປັນຢູ່, ສຸຂະພາບ, ໄດ້ຮັບການສຶກສາ ແລະ ມີອາຊີບ ຜ່ານມາມີເດັກນ້ອຍຜູ້ດ້ອຍໂອກາດຫຼາຍກວ່າ 600 ຄົນ ໄດ້ຮັບການຊ່ວຍເຫຼືອ ແລະ ຮຽນຈົບຈາກບ້ານຊ່ວຍເຫຼືອເດັກ SOS ແລະ ຫຼາຍກວ່າ 1,000 ຄົນ ກຳລັງໄດ້ຮັບການເບິ່ງແຍງດູແລໃນປັດຈຸບັນ.

Comments are closed.