25th Jun2018

ປະທານປະເທດລາວ ຕ້ອນຮັບການເຂົ້າ ຢ້ຽມຂ່ຳນັບຂອງ ຮອງປະທານປະເທດ ຫວຽດນາມ

by somchan

ໃນວັນທີ 19 ມິຖຸນາ 2018 ທີ່ທຳນຽບປະທານປະເທດ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງສະຫາຍ ນາງ ດັ້ງ ຖິ ຫງ໋ອກ ທິ້ງ ກຳມະການຄະນະ ບໍລິຫານງານສູນກາງພັກກອມມູນິດຫວຽດນາມ, ຮອງປະທານປະເທດ ແຫ່ງ ສສ ຫວຽດນາມ ແລະ ຄະນະ, ພາຍຫຼັງພົບປະສອງຝ່າຍ ສະຫາຍ ພັນຄຳ ວິພາວັນ ຮອງປະທານປະເທດ ແຫ່ງ ສປປ ລາວ. ໃນໂອກາດນີ້, ​ສະຫາຍ ປະທານປະເທດ ບຸນຍັງ ວໍລະຈິດ ໄດ້ສະແດງຄວາມຍິນດີຕ້ອນຮັບ ແລະ ຕີລາສູງຕໍ່ ການຢ້ຽມຢາມ ສປປ ລາວ ຢ່າງເປັນທາງການ ຂອງສະຫາຍ ນາງ ດັ້ງ ຖິ ຫງ໋ອກ ທິ້ງ ເຊິ່ງເປັນຄັ້ງທຳອິດທີ່ສະຫາຍໄດ້ຮັບຕຳແໜ່ງເປັນຮອງປະທານປະເທດ ສສ ຫວຽດນາມ. ການຢ້ຽມຢາມນີ້ກໍເປັນປະເພນີປະຕິບັດເປັນປົກກະຕິ ຂອງສອງປະເທດ ລາວ-ຫວຽດນາມ, ຊຶ່ງເປັນການປະກອບສ່ວນສຳຄັນເຂົ້າໃນການສົ່ງເສີມ ແລະ ຮັດແໜ້ນສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ມີມາແຕ່ດົນນານແລ້ວນັ້ນ ໃຫ້ນັບມື້ແໜ້ນແຟ້ນຍິ່ງໆຂຶ້ນ. ລວມທັງເປັນການກະຕຸກຊຸກຍູ້ໃຫ້ແກ່ການຮ່ວມມື ລະຫວ່າງສອງປະເທດໃຫ້ເຂົ້າສູ່ລວງເລິກ. ພ້ອມກັນນີ້, ສະຫາຍ ບຸນຍັງ ວໍລະຈິດ ກໍໄດ້ສະແດງຄວາມຊົມເຊີຍຕໍ່ບັນດາຜົນສຳເລັດອັນສຳຄັນ, ຮອບດ້ານ ທີ່ປະຊາຊົນຫວຽດນາມຍາດມາໄດ້ ພາຍໃຕ້ການນຳພາອັກຖືກຕ້ອງຂອງພັກກອມມູນິດ ຫວຽດນາມໃນໄລຍະຜ່ານມາ ແລະ ສະແດງຄວາມຂອບອົກຂອບໃຈຢ່າງສູງ ຕໍ່ການເອົາໃຈໃສ່ຊຸກຍູ້ການຊ່ວຍເຫຼືອແບບພິເສດ ແລະ ລ້ຳຄ່າຂອງພັກ, ລັດຖະບານ ກໍຄື ປະຊາຊົນຫວຽດນາມ ທີ່ມີຕໍ່ປະເທດຊົນລາວ ໃນການປົກປັກຮັກສາ ແລະ ສ້າງສາພັດທະນາປະເທດຊາດຕະຫຼອດມາ. ນອກນີ້, ສະຫາຍ ປະທານປະທານ ບຸນຍັງ ວໍລະຈິດ ຍັງໄດ້ຕີລາຄາສູງຕໍ່ໝາກຜົນຂອງການພົບປະສອງຝ່າຍ ລະຫວ່າງ ສະຫາຍຮອງປະທານປະເທດ ດັ້ງ ຖິ ຫງ໋ອກ ທິ້ງ ກັບສະຫາຍ ພັນຄຳ ວິພາວັນ ຮອງປະທານປະເທດ ແຫ່ງ ສປປ ລາວ ໃນໂອກາດຢ້ຽມຢາມຄັ້ງນີ້.

ສະຫາຍ ປະທານປະເທດ ບຸນຍັງ ວໍລະຈິດ ຍັງໄດ້ອວຍພອນໃຫ້ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີ ແລະ ການຮ່ວມມືຮອບດ້ານ ລາວ-ຫວຽດນາມ ຈົ່ງໝັ້ນຄົງທະນົງແກ່ນຕະຫຼອດກາລະນານ. ພ້ອມທັງ ອວຍພອນໃຫ້ ສະຫາຍ ຮອງປະທານປະເທດ ດັ້ງ ຖິ ຫງ໋ອກ ທິ້ງ ພ້ອມດ້ວຍຄະນະ ຈົ່ງມີມີສຸຂະພາບເຂັ້ມແຂງ, ​ມີຄວາມຜາສຸກ, ສືບຕໍ່ຊີ້ນຳພາປະເທດຫວຽດນາມ ກ້າວຂຶ້ນຕາມເປົ້າໝາຍທີ່ວາງໄວ້ ແລະ ໄດ້ຮັບຜົນສຳເລັດຢ່າງຈົບງາມ ໃນການເດີນທາງມາຢ້ຽມຢາມ ສປປ ລາວ ໃນຄັ້ງນີ້.

ໃນໂອກາດດຽວກັນ, ສະຫາຍ ຮອງປະທານປະເທດ ດັ້ງ ຖິ ຫງ໋ອກ ທິ້ງ ກໍໄດ້ສະແດງຄວາມຂອບໃຈເປັນຢ່າງສູງ ຕໍ່ການຕ້ອນຮັບອັນອຸ່ນຂອງ ສະຫາຍ ປະທານປະເທດ ໃນຄັ້ງນີ້,​ພ້ອມທັງໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວຫວຽດນາມ ອ້າຍນ້ອງ ໃນໄລຍະຜ່ານມາ, ທີ່ໄດ້ຮັບການເສີມຂະຫຍາຍໃຫ້ແໜ້ນແຟ້ນຍິ່ງໆຂຶ້ນ ແລະ ສຶບຕໍ່ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ໂດຍສະເພາະໃນສະພາບໃຫມ່ ແລະ ຍຸກສະໄໝໃໝ່ນີ້. ພ້ອມນີ້, ສະຫາຍ ຮອງຮອງປະທານປະເທດ ດັ້ງ ຖິ ຫງ໋ອກ ທິ້ງ ຍັງໄດ້ນຳເອົາກວາງສົ່ງເຖິງ ສະຫາຍເລຂາທິການໃຫຍ່ ຫງວຽນ ຝູຈ໋ອງ ແລະ ສະຫາຍປະທານປະທານ ເຈີນດ່າຍ ກວາງ ສົ່ງເຖິງ ສະຫາຍ ປະທານປະເທດ ບຸນຍັງ ວໍລະຈິດ ອີກດ້ວຍ

Off

Comments are closed.