08th Apr2019

ປະທານປະເທດເນັ້ນໜັກໃຫ້ການນຳກະຊວງ ປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ເອົາໃຈໃສ່ປັບປຸງຊ່ວຍເຫຼືອກຳລັງທ້ອງຖິ່ນຮາກຖານ

by somchan

ທ່ານ ບຸນຍັງ ວໍລະຈິດ ເລຂາທິການໃຫ່ຍ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ ສປປລາວ ໄດ້ເນັ້ນໜັກໃຫ້ການນຳກະຊວງປ້ອງກັນປະເທດ ແລະ ການນຳກະຊວງປ້ອງກັນຄວາມສະຫງົບ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ ທົ່ວກຳລັງປະກອບອາວຸດເອົາໃຈໃສ່ປັບປຸງ ຊ່ວຍເຫຼືອກຳລັງທ້ອງຖິ່ນຢູ່ຮາກຖານ, ປຸກລະດົມບັນຊາອົບຮົມຫັດແອບ ເພື່ອໃຫ້ເຂົາເຈົ້າສາມາດເຮັດລ້ອນໜ້າທີ່ປົກປັກຮັກສາທ້ອງຖິ່ນຂອງຕົນ, ພ້ອມທັງເອົາໃຈໃສ່ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ເປັນບໍລິເວນກວ້າງ ມີຄຸນນະພາບ ເພື່ອເປັນກຳລັງສຳຮອງໃນກໍລະນີເກີດສະພາບການຕ່າງໆ.

ໃນໂອກາດທີ່ທ່ານໄດ້ເຂົ້າຮ່ວມ ພິທີປາຖະກະຖາເລົ່າຄືນມູນເຊື້ອວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 64 ປີ ຢູ່ທີ່ສະໂມສອນໃຫ່ຍການເມືອງກອງທັບ ກະຊວງປ້ອງກັນປະເທດໃນເມື່ອບໍ່ດົນມານີ້, ທ່ານໄດ້ກ່າວວ່າ ໃນສະພາບທີ່ປະເທດເຮົາຍັງຂາດເຂີນດ້ານງົບປະມານຄຽງຄູ່ກັບການປັບປຸງກຳລັງຕ່າງໆ ຢູ່ຂັ້ນທ້ອງຖີ່ນຮາກຖານແລ້ວ ທົ່ວກຳລັງປະກອບອາວຸດ ຕ້ອງສຸມໃສ່ທຸກເງື່ອນໄຂຄວາມສາມາດ ແລະ ກ້າວໄປເຖິງການກຸ້ມຕົນເອງຢ່າງຮອບດ້ານ, ຖືເອົາວຽກງານຄຸ້ມຄອງລ້ຽງດູກຳລັງດ້ວຍການສ້າງພະລາທິການກັບທີ່ເປັນວຽກງານຕົ້ນຕໍ ເພື່ອແກ້ໄຂຄວາມຫຍຸ້ງຍາກ ດ້ານຊີວິດການເປັນຢູ່ ໂດຍສຸມໃສ່ດ້ານກະສິກຳເປັນທ່າແຮງໃຫ້ເປັນຂະບວນກວ້າງຂວາງ ແລະ ອື່ນໆ.

Off

Comments are closed.