09th Jan2018

1.064 ຕື້ ກວ່າກີບ ຜົນເສຍຫາຍຈາກອັກຄີໄພ ໃນປີ 2017

by somchan

ຕາມການລາຍງານຂອງເຈົ້າໜ້າທີ່ຕຳຫຼວດ ສະກັດກັ້ນ ແລະ ຕ້ານອັກຄີໄພ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບໃຫ້ຮູ້ວ່າ: ໃນປີ 2017 ນີ້ ທົ່ວປະເທດມີອັກຄີໄພ ເກີດຂຶ້ນ 175 ຄັ້ງ ທຽບຖ້າປີ 2016 ເພີ່ມຂຶ້ນ 35 ຄັ້ງ; ສຳລັບ ຜົນເສຍຫາຍຈາກອັກຄີໄພທີ່ເກີດຂຶ້ນ ໃນປີ 2017 ມີຄົນເສຍຊີວິດ 8 ຄົນ, ບາດເຈັບ 12 ຄົນ, ມີເຮືອນຖືກໄຟໄໝ້ 186 ຫຼັງ, ຮ້ານຂາຍເຄື່ອງ 58 ຮ້ານ, ສູນການຄ້າໜຶ່ງແຫ່ງມີ 430 ຫ້ອງ, ລົດໃຫຍ່ 7 ຄັນ ແລະ ອື່ນໆ.

ລວມມູນຄ່າເສຍຫາຍ 1.064 ຕື້ 152 ລ້ານກວ່າກີບ, ສ່ວນສາເຫດຂອງການເກີດອັກຄີໄພສ່ວນຫຼາຍ ແມ່ນເກີດຈາກໄຟຟ້າລັດວົງຈອນ ມີ 65 ຄັ້ງ, ເລິນເລີ້ຂາດຄວາມຮັບຜິດຊອບ 22 ຄັ້ງ, ຄົນຈູດ 26 ຄັ້ງ, ໄຕ້ທູບທຽມບູຊາ 14 ຄັ້ງ, ດັງໄຟແຕ່ງກິນ 14 ຄັ້ງ, ພວມຢູ່ໃນຂັ້ນຕອນການສືບສວນ-ສອບສວນ 24 ຄັ້ງ ແລະ ບໍ່ຮູ້ສາເຫດ 10 ຄັ້ງ.

ໃນນີ້ ເຫດອັກຄີໄພທີ່ພົ້ນເດັ່ນ ແລະ ເສຍຫາຍຫຼາຍ ແມ່ນເຫດການໄຟໄໝ້ສູນການຄ້າຊັງຈຽງ ທີ່ຕັ້ງຢູ່ບ້ານວັດໄຕນ້ອຍທົ່ງ ເມືອງສີໂຄດຕະບອງ ນະຄອນຫຼວງວຽງຈັນ ໃນວັນທີ 14 ກໍລະກົດ 2017 ເຊິ່ງເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານອັກຄີໄພ ໄດ້ໃຊ້ລົດມອດໄຟ 16 ຄັນ ແລະໃຊ້ເວລາ 4 ຊົ່ວໂມງ ໃນການດັບມອດໄຟ ຜົນເສຍຫາຍມີອາຄານສູນການຄ້າ 1 ຫຼັງ ມີ 430 ຫ້ອງ ລວມມູນຄ່າສູນຫາຍ 634 ຕື້ 576 ລ້ານກວ່າກບ ສາເຫດແມ່ນໄຟຟ້າລັດວົງຈອນ ແລະ ເຫດການໄຟໄໝ້ເຮືອນຂອງປະຊາຊົນ 33 ຫຼັງ ຢູ່ບ້ານອາຊິງໃຕ້ ເມືອງສະໝ້ວຍ ແຂວງສາລະວັນ ລວມມູນຄ່າເສຍຫາຍ 1 ຕື້ກວ່າກີບ ສາເຫດແມ່ນເກີດຈາກຄວາມເລີ່ນເລີ້ຂາດສະຕິ ຄື: ທ້າວອຳງິ້ມ ອາຍຸ 32 ປີ ອາຊີບຄ້າຂາຍ ຜູ້ເປັນເຈົ້າຂອງເຮືອນທີ່ເປັນຕົ້ນເພີງຂອງເຫດການໄຟໄໝ້ໃນຄັ້ງນີ້ ໄດ້ດັງໄຟຢ້າງເຂົ້າເປືອກ ແຕ່ບໍ່ໄດ້ຢູ່ເຝົ້າຕິດຕາມ ຈິ່ງໄດ້ເກີດໄຟໄໝ້ແລ້ວລຸກລາມໃໝ້ເຮືອນຂອງຜູ້ກ່ຽວ ແລະ ເຮືອນຂອງປະຊາຊົນ ຢູ່ພາຍໃນບ້ານທັງໝົດ 33 ຫຼັງ ແຕ່ເຫດການໄຟໄໝ້ຄັ້ງນີ້ ເຈົ້າໜ້າທີ່ບໍ່ໄດ້ນຳລົດເຂົ້າມອດໄຟ ເນື່ອງຈາກບ້ານດັ່ງກ່າວ ຕັ້ງຢູ່ຫ່າງໄກຈາກຕົວເມືອງ ແລະ ເສັ້ນທາງເຂົ້າຫາບ້ານມີຄວາມຫຍຸ້ງຍາກບໍ່ສາມາດນຳລົດເຂົ້າໄປໄດ້.

ສຳລັບແຂວງທີ່ເກີດອັກຄີໄພ ຫຼາຍກວ່າໝູ່ ໃນປີ 2017 ນີ້ ແມ່ນນະຄອນຫຼວງວຽງຈັນມີ 52 ຄັ້ງ ມູນຄ່າເສຍຫາຍ 300 ກວ່າຕື້ກີບ ຖັດມາແມ່ນແຂວງສະຫວັນນະເຂດ ມີ 26 ຄັ້ງ ມູນຄ່າເສຍຫາຍ 300 ກວ່າລ້ານກີບ.

ສ່ວນແຂວງທີ່ບໍ່ມີອັກຄີໄພເກີດຂຶ້ນມີແຂວງຜົ້ງສາລີ ແລະ ແຂວງໄຊສົມບູນແມ່ນບໍ່ມີອັກຄີໄພເກີດຂຶ້ນ ເປັນປີທີ 2 ຕິດຕໍ່ກັນ.

Off

Comments are closed.