10th Apr2018

ປີ 2017 ເມືອງໄຊເສດຖາ ສາມາດມ້າງຄະດີຢາເສບຕິດໄດ້ 61 ລາຍ

by somchan

ຕາມການລາຍງານຂອງ ພັນໂທ ເຄນທອງ ແກ້ວພັກດີ ຮອງກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ໃນກອງປະຊຸມສະຫຼຸບວຽກງານປ້ອງກັນຄວາມສະຫງົບ ປະຈຳປີ 2017 ຂອງກອງບັນຊາການ ປກສ ເມືອງໄຊເສດຖາ ໃນກາງເດືອນກຸມພາ ຜ່ານມານີ້ວ່າ: ໃນໄລຍະຜ່ານມາບັນຫາຄວາມບໍ່ສະຫງົບ ຄວາມບໍ່ເປັນລະບຽບຮຽບຮ້ອຍພາຍໃນເມືອງໄຊເສດຖາ ບັນຫາທີ່ເກີດຂຶ້ນຫຼາຍກວ່າໝູ່ແມ່ນບັນຫາຢາເສບຕິດ ທີ່ກໍ່ໃຫ້ເກີດບັນຫາຄວາມບໍ່ສະຫງົບຕ່າງໆ ເຊັ່ນ: ປຸ້ນຈີ້, ຊີງຊັບ, ຂີ້ລັກງັດແງະ, ນັກເລງອັນຕະພານ ຕັ້ງກຸ່ມແກ້ງ ຂີ່ລົດກວນເມືອງອື່ນໆ. ເຊິ່ງໃນປີ 2017 ຜ່ານມາ, ປກສ ເມືອງໄຊເສດຖາ ໄດ້ສຸມໃສ່ຢ່າງຕັ້ງໜ້າໃນການສະກັດກັ້ນ ແລະ ແກ້ໄຂບັນຫາຢາເສບຕິດ ໂດຍໄດ້ສຸມໃສ່ແກ້ໄຂຈຸດມົ້ວສຸມ, ການຊື້-ຂາຍຢາເສບຕິດ ພາຍໃນເມືອງໄຊເສດຖາໃຫ້ລຸດລົງ ໂດຍໄດ້ມີການປະສານສົມທົບກັບອຳນາດການປົກຄອງບ້ານ ແລະ ກຳລັງວິຊາສະເພາະ, ເພື່ອຕິດຕາມຂຶ້ນບັນຊີພື້ນທີ່ ທີ່ມີການມົ້ວສຸມຊື້-ຂາຍຢາເສບຕິດ, ເປັນຕົ້ນຮ້ານເກມ ຮ້ານສະນຸກເກີ, ເຮືອນພັກ ໂຮງແຮມ, ທາງຮ່ອມ ແລະ ອື່ນໆ. ສະແດງອອກໃນປີ 2017 ສາມາດແກ້ໄຂກຸ່ມແກ້ງຊື້-ຂາຍຢາເສບຕິດໄດ້ 61 ລາຍ, ກັກຕົວຜູ້ຄ້າ-ຂາຍຢາເສບຕິດມາດຳເນີນຄະດີໄດ້ 103 ຄົນ ຍິງ 11 ຄົນ, ກັກຕົວຜູ້ເສບຢາເສບຕິດໄດ້ 81 ຄົນ ຍິງ 11 ຄົນ ຢຶດຢາບ້າໄດ້ 14.000ກວ່າເມັດ, ຢາໄອ 28 ຖົງ ແລະ ອຸປະກອນເສບຈຳນວນໜຶ່ງ, ສຳລັບຜູ້ເສບຕິດເສບຕິດ ທາງເຈົ້າໜ້າທີ່ໄດ້ສຶກສາອົບຮົມ ແລະ ສົ່ງສູນບຳບັດ.

Off

Comments are closed.