07th Jan2020

ປີ 2019 ທົ່ວປະເທດ ມີຄະດີອາຍາເກີດຂຶ້ນທັງໝົດ 7.657 ເລື່ອງ

by somchan

ໃນວາລະດຳເນີນກອງປະຊຸມສະຫຼຸບວຽກງານປ້ອງກັນຄວາມສະຫົງບ ປະຈຳປີ 2019 ແລະ ທິດທາງແຜນການວຽກງານຈຸດສຸມ ປີ 2020 ໃນວັນທີ 7 ມັງກອນນີ້. ພົຈວ ສົມວັນ ສາຍລ້ອງພາ ຫົວໜ້າຫ້ອງວ່າການ ກະຊວງ ປກສ ໄດ້ຜ່ານຮ່າງບົດສະຫຼຸບການເຄື່ອນໄຫວວຽກງານປ້ອງກັນຄວາມສະຫງົບ ປະຈຳປີ 2019 ແລະ ທິດທາງແຜນການວຽກງານຈຸດສຸມ ປີ 2020 ໂດຍໃຫ້ຮູ້ວ່າ: ໄລຍະປີ 2019 ກຳລັງປ້ອງກັນຄວາມສະຫງົບບັນດາເຫຼົ່າວິຊາສະເພາະໃນຂອບເຂດທົ່ວປະເທດ ໄດ້ເອົາໃຈໃສ່ປະຕິບັດວຽກງານວິຊາສະເພາະຕາມຂົງເຂດຄວາມຮັບຜິດຊອບ ເປັນຕົ້ນແມ່ນວຽກງານປົກປັກຮັກສາຄວາມເປັນລະບຽບຮຽບຮ້ອຍ, ສຸມໃສ່ແກ້ໄຂປະກົດການຫຍໍ້ທໍ້ທາງສັງຄົມ ໂດຍຈັດຕັ້ງຜັນຂະຫຍາຍຄຳສັ່ງຕ່າງໆທີ່ຂັ້ນເທິງວາງອອກ ສາມາດຮັບປະກັນໃຫ້ສັງຄົມມີຄວາມສະຫງົບໂດຍພື້ນຖານ, ແຕ່ຍັງປັດສະຈາກບໍ່ໄດ້ບັນຫາປະກົດການຫຍໍ້ທໍ້ເກີດຂຶ້ນ ສະແດງອອກປີ 2019 ມີຄະດີອາຍາທົ່ວປະເທດເກີດຂຶ້ນທັງໝົດ 7.657 ເລື່ອງ, ມ້າງໄດ້ 5.554 ເລື່ອງ, ຜູ້ຖືກຫາ 8.364 ຄົນ ຍິງ 1.094 ຄົນ, ຄົນຕ່າງປະເທດ 162 ຄົນ ( ທຽບໃສ່ປີ 2018 ຄະດີເພີ່ມຂຶ້ນ 1.292 ເລື່ອງ ), ຄະດີທີ່ເພີ່ມຂຶ້ນຫຼາຍແມ່ນຄະດີ: ບັນຫາຄ້າຂາຍຢາເສບຕິດ, ຄາດຕະກຳ, ລັກພາຕົວ, ປຸ້ນຊັບ-ຊີງຊັບ, ລັກຊັບ, ນຳໃຊ້ບັດ ATM ປອມ ແລະ ບັນຫາອື່ນໆ ຫຼາຍກວ່າໝູ່ແມ່ນ: ບັນຫາຢາເສບຕິດ 3.957 ເລື່ອງ. ລັກຊັບພົນລະເມືອງ 2.146.

 

ສໍາລັບທິດທາງປີ 2020 ກະຂວງ ປກສ ໄດ້ວາງທິດທາງແຜນການສຸມໃສ່ແກ້ໄຂປະກົດການຫຍໍ້ທໍ້ທາງສັງຄົມ, ເອົາໃຈໃສ່ຈັັດຕັ້ງຜັນຂະຫຍາຍຄຳສັ່ງເລກທີ 15 ແລະ 27ຂອງນາຍົກລັດຖະມົນຕີ, ຄຳສັ່ງເລກທີ 22/ຂອງຄະນະເລຂາທິການສູນກາງພັກ, ຄຳສັ່ງເລກທີ 1470 ຂອງກະຊວງປ້ອງກັນຄວາມສະຫງົບ ແລະ ບັນດານິຕິກຳອື່ນໆເພີ່ມທະວີວຽກງານສະກັດກັ້ນ, ຕ້ານ, ແກ້ໄຂປະກົດການຫຍໍ້ທໍ້ໃນສັງຄົມ ແລະ ບັນຫາຢາເສບຕິດ ໃຫ້ມີປະສິດທິຜົນ ແລະ ເປັນຮູບປະທຳຫຼາຍຂຶ້ນ ໂດຍອີງໃສ່ກຳລັງແຮງທົ່ວປວງຊົນ ເປັນຕົ້ນ: ກຳແໜ້ນເປົ້າໝາຍທີ່ເປັນຫົວໂປ່ໂຕການກຸ່ມແກ້ງ, ເຄືອຂ່າຍໃຫ້ຖືກຕ້ອງຊັດເຈນ ແລະ ໃຊ້ມາດຕະການຢ່າງເດັດຂາດ ເພື່ອສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມໃຫ້ຫຼຸດລົງກວ່າປີຜ່ານມາ.

ໃນກອງປະຊຸມ, ບັນດາທ່ານທີ່ເຂົ້າຮ່ວມ ໄດ້ຍົກສູງຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າ ແລະ ປະກອບຄຳຄິດເຫັນໃສ່ຮ່າງບົດສະຫຼຸບເພື່ອສ້າງຄວາມເປັນເອກະພາບ, ເພີ່ມຄວາມລະອຽດຊັດເຈນ ຕໍ່ບັນດາວຽກງານຈຸດສຸມທີ່ບັນດາເຫຼົ່າວິຊາສະເພາະຈະພ້ອມກັນນຳໄປຈັດຕັ້ງຜັນຂະຫຍາຍເຂົ້າໃນວຽກງານປ້ອງກັນຄວາມສະຫງົບໃຫ້ປະສົບຜົນສຳເລັດຂຶ້ນກວ່າເກົ່າ.

 

Off

Comments are closed.