26th Sep2013

ຜົນສຳເລັດຂອງກອງປະຊຸມລັດຖະມົນ ຕີອາຊຽນວ່າດ້ວຍອາຊະຍາກຳຂ້າມຊາດ ຄັ້ງທີ 9

by somchan

ກອງປະຊຸມລັດຖະມົນຕີອາຊຽນວ່າດ້ວຍອາຊະຍາ ກຳຂ້າມຊາດຄັ້ງທີ 9 ໄດ້ຈັດຂຶ້ນໃນລະຫວ່າງວັນທີ 15-19 ກັນຍາ 2013 ຢູ່ທີ່ນະຄອນຫຼວງວຽງຈັນ ສປປລາວ ໂດຍມີ ຄະນະຜູ້ແທນຈາກ 10ປະເທດສະ ມາຊິກອາຊຽນ, ເລຂາທິການໃຫຍ່ອາຊຽນ ແລະ ຄະນະຜູ້ ແທນຈາກຄູ່ເຈລະຈາຄື: ສປ ຈີນ, ຍີ່ປຸ່ນ ແລະ ສາ ທາລະນະລັດ ເກົາຫຼີ ເຂົ້າຮ່ວມທັງໝົດ 170 ກ່ວາທ່ານ.

ກອງປະຊຸມໃນຄັ້ງນີ້ໄດ້ທົບທວນຄືນຜົນການຈັດຕັ້ງປະຕິບັດແຜນງານ ແລະຂໍ້ຕົກລົງຂອງກອງປະຊຸມຄັ້ງທີ 8 ທີ່ບາລີ ປະເທດອິນໂດເນເຊຍເຊິ່ງຫຼາຍປະເທດໄດ້ສະແດງຄວາມພໍໃຈຕໍ່ການຮ່ວມມືໃນໄລບະຜ່ານມາ.

ກອງປະຊຸມລັດຖະມົນຕີອາຊຽນວ່າດ້ວຍອາຊະຍາກຳຂ້າມຊາດຄັ້ງທີ 9 ໄດ້ຢໍ້າເຖິງການພົວພັນຮ່ວມມືຂອງອາຊຽນ ແລະອາຊຽນກັບຄູ່ເຈລະນາໃນການຕ້ານອາຊະຍາກຳຂ້າມຊາດໂດຍສະເພາະແມ່ນການສ້າງຄວາມເຂົ້າໃຈ, ຄວາມໄວ້ເນື້ອເຊື້ອໃຈເຊິ່ງກັນແລະກັນ ໃນການພົວພັນຮ່ວມມືແລກປ່ຽນຂໍ້ມູນຂ່າວສານຕ່າງໆທີ່ເປັນການປະກອບສ່ວນອັນສຳຄັນ ໃນການຕ້ານອາຊະຍາກຳຂ້າມຊາດ ເພື່ອແນ່ໃສ່ການປົກປັກຮັກສາຄວາມສະຫງົບ, ຄວາມໝັ້ນຄົງ, ສະຖຽນລະພາບ ແລະ ການພັດທະນາເສດຖະກິດສັງຄົມໃນພາກພື້ນອາຊຽນ ແລະ ໃນໂລກ.

ຄ່ຽງຄູ່ກັບກອງປະຊຸມດັ່ງກ່າວ ຍັງໄດ້ມີກອງປະຊຸມປືກສາຫາລືລັດຖະມົນຕີອາຊຽນກັບຄູ່ເຈລະຈາຄື:ກອງປະຊຸມລັດຖະມົນຕີອາຊຽນບວກສາມ (ສປປ ຈີນ, ຍີ່ປຸ່ນ, ສ ເກົາຫຼີ) ວ່າດ້ວຍອາຊະຍາກໍາຂ້າມຊາດຄັ້ງທີ 6 , ກອງປະຊຸມປຶກສາຫາລືລັດຖະມົນຕີອາຊຽນບວກຍີ່ປຸ່ນ ວ່າດ້ວຍອາຊະຍາກຳຂ້າມຊາດຄັ້ງທຳອິດ ເຊິ່ງຖືວ່າເປັນການລິເລີ່ມການຮ່ວມມືລະຫວ່າງອາຊຽນກັບຍີ່ປຸ່ນ, ນອກນັ້ນກອງປະຊຸມລັດຖະມົນຕີອາຊຽນວ່າດ້ວຍອາຊະຍາກຳຂ້າມຊາດຄັ້ງທີ 9 ຍັງໄດ້ມີການຖະແຫຼງການຮ່ວມມື ເພື່ອຢັ້ງຢືນຄວາມເປັນເອກະພາບໃນການຮ່ວມມືກັນດ້ານການເຄື່ອນໄຫວ ຂອງພວກອາຊະຍາກອນຂ້າມຊາດ ທີ່ເປັນສິ່ງທ້າທ້າຍແລະເປັນໄພຂົ່ມຂູ່ຕໍ່ຄວາມໝັ້ນຄົງ ຕໍ່ການສ້າງສາພັດທະນາເສດຖະກິດ-ສັງຄົມ ແລະ ເພື່ອສົ່ງເສີມການຮ່ວມມືຊ່ວຍເຫຼືອເຊິ່ງກັນແລະກັນ ແນ່ໃສ່ສ້າງໃຫ້ພາກພື໊ນອາຊຽນມີຄວາມສະຫງົບ ມີຄວາມປອດໄພ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ປະຊາຊົນດຳລົງຊີວິດດ້ວຍສັນຕິພາບ ແລະ ຄວາມສະຫງົບສຸກ.

ກອງປະຊຸມລັດຖະມົນຕີອາຊຽນວ່າດ້ວຍອາຊະຍາກຳຂ້າມຊາດຄັ້ງທີ 9ໄດ້ຮັບຮອງເອົາແຜນວຽກຂອງເຈົ້າໜ້າທີ່ອາວຸດໂສອາຊຽນວ່າດ້ວຍອາຊະຍາກຳຂ້າມຊາດ ແຕ່ 2013 ຫາ ປີ 2015 ແລະມອບໃຫ້ເຈົ້າໜ້າທີ່ອາວຸດໂສອາຊຽນວ່າດ້ວຍອາຊະຍາກຳຂ້າມຊາດ ຈັດຕັ້ງແຜນປະຕິບັດງານຮອບດ້ານ ກ່ຽວກັບການຕ້ານການກໍ່ການຮ້າຍ, ຄຽງຄູ່ກັນນັ້ນໃນກອງປະຊຸມປຶກສາຫາລືລັດຖະມົນຕີອາຊຽນບວກຈີນວ່າດ້ວຍອາຊະຍາກຳຂ້າມຊາດຄັ້ງ 6 ໄດ້ມີການປຶກສາຫາ, ຄົ້ນຄ້ວາ ແລະ ຕົກລົງກັນຫຼາຍບັນຫາ ເປັນຕົ້ນແມ່ນການແລກປ່ຽນການຢ້ຽມຢາມ ແລະ ສ້າງຄວາມໄວເນື້ອເຊື້ອໃຈເຊິ່ງກັນແລະກັນເພື່ອເພີ່ມທະວີຢ່າງໃກ້ຊິດກ່ຽວກັບການປະຕິບັດກົດໝາຍ, ສ້າງຄວາມເຂົ້າໃຈໃນການຮ່ວມມືຕ້ານອາຊະຍາກຳຂ້າມຊາດ ລະຫວ່າງອາຊຽນແລະຈີນແຕ່ນີ້ຮອດປີ 2014 , ສ້າງເວທີການຮ່ວມມືໃນການຈັດຕັ້ງປະຕິບັດກົດໝາຍລະຫວ່າງອາຊຽນບວກຈີນເພື່ອຄົ້ນຄ້ວາຊອກຫາມາດຕະການຕອບໂຕ້ອາຊະຍາກຳຂ້າມຊາດ. ນອກນີ້ ສປ ຈີນ ຍັງໃຫ້ການຝຶກອົບຮົມ ໃຫ້ແກ່ພະນັກງານປະຕິບັດກົດໝາຍອາຊຽນອີກຈຳນວນໜຶ່ງ. ສຳລັບກອງປະຊຸມລັດຖະມົນຕີອາຊຽນບວກຍີ່ປຸ່ນວ່າດ້ວຍອາຊະຍາກຳຂ້າມຊາດຄັ້ງທຳອິດ ກໍ່ຍັງມີການຕົກລົງເຫັນດີຍົກລະດັບການຮ່ວມມືໃນຂົງເຂດການຕ້ານອາຊະຍາກຳຂ້າມຊາດຂຶ້ນຈາກລະດັບເຈົ້າໜ້າທີ່ອາວຸໂສມາເປັນລະດັບລັດຖະມົນຕີ ເຊິ່ງສະແດງເຖິງການໃຫ້ຄວາມສຳຄັນຕໍ່ການຮ່ວມມືລະຫວ່າງອາຊຽນ ແລະຍີ່ປຸ່ນ ໃນການສະກັດກັ້ນ ແລະ ແກ້ໄຂບັນຫາອາຊະຍາກຳຂ້າມຊາດ.

ສັງລວມແລ້ວກອງປະຊຸມລັດຖະມົນຕີອາຊຽນວ່າດ້ວຍອາຊະຍາກຳຂ້າມຊາດຄັ້ງທີ 9 ນີ້ ແມ່ນໄດ້ບັນລຸຜົນສຳເລັດຈຸດປະສົງທີ່ຄາດໝາຍໄວ້ ເປັນຕົ້ນແມ່ນກອງປະຊຸມໄດ້ຕົກລົກເປັນເອກະພາບກັນ ສ້າງຖະແຫຼງການຮ່ວມມືອາຊຽນ, ອາຊຽນບວກສາມ, ອາຊຽນບວກຈີນ, ອາຊຽນບວກຍີ່ປຸ່ນ ວ່າດ້ວຍອາຊະຍາກຳຂ້າມຊາດ ເພື່ອປ້ອງກັນ ແລະ ຕ້ານອາຊະຍາກຳຂ້າມຊາດ ມັນໄດ້ສະແດງໃຫ້ເຫັນຄວມເປັນປືກແຜນ, ຄວາມເປັນເອກະພາບ ແລະພ້ອມທັງເປັນການເສີມສ້າງສາຍພົວພັນຮ່ວມມືມິດຕະພາບແລະ ຄວາມເຂົ້າອົກເຂົ້າໃຈຂອງບັນດາປະເທດສະມາຊິກອາຊຽນ ແລະ ຄູ່ເຈລະຈາທີ່ນັບມືນັບເພີ່ມຂຶ້ນເລື່ອຍໆ.

ສຳລັບກອງປະຊຸມລັດຖະມົນຕີອາຊຽນວ່າດ້ວຍອາຊະຍາກຳຂ້າມຊາດຄັ້ງຕໍ່ໄປ ແມ່ນຈະໄດ້ຈັດຂຶ້ນຢູຸ່ທີ່ປະເທດມາເລເຊຍ.

pitingang(01)

Off

Comments are closed.