28th Mar2013

ຜົນສຳເລັດວຽກງານກໍ່ສ້າງຮາກຖານເມືອງ-ພັດທະນາຊົນນະບົດຮອບດ້ານ.

by somchan

ບັນດາການນຳຂັ້ນສູງຂອງພັກ-ລັດ ແລະອົງການ ຈັດຕັ້ງມະຫາຊົນໄດ້ລົງຊີ້ນຳວຽກງານຢ່າງເປັນປະຈຳ ແລະທົ່ວເຖິງເຮັດວຽກງານກໍ່ສ້າງຮາກຖານການ ເມືອງ-ພັດທະນາຊົນນະບົດຮອບດ້ານການ ເມືອງກາຍເປັນວຽກງານບູລິມະສິດຂອງທົ່ວພັກ -ທົ່ວລັດແລະທົ່ວປວງຊົນຢ່າງແທ້ຈິງເປັນຂະບວນ ການຟົດຟື້ນເພື່ອຊ່ວຍຍູ້ໜູນທ້ອງຖິ່ນໃນການ ແກ້ໄຂປະກົດການຫຍໍ້ທໍ້,ແກ້ໄຂໜໍ່ແໜງ ຄວາມບໍ່ສະຫງົບຢູ່ບາງບໍລິເວນແລະຫັນລົງຕາມ ຂະແໜງການວິຊາສະເພາະເພື່ອຊຸກຍູ້ວຽກງານ ພັດທະນາຊົນນະບົດຮອບດ້ານຢູ່ຂັ້ນຮາກຖານຢ່າງມີຜົນສຳເລັດ.

ໃນ 1 ປີຜ່ານມາ, ໄດ້ມີພະນັກງານລົງເຮັດວຽກງານກໍ່ສ້າງຮາກຖານການເມືອງປະຈຳແຕ່ລະບ້ານ, ຂັ້ນແຂວງ 579 ຄົນ, ຂັ້ນເມືອງ 5,438 ຄົນ. ໃນນີ້, ໄດ້ປະຕິບັດຕາມທິດຊີ້ນຳຂອງສະຫາຍເລຂາທິການໃຫຍ່ ກ່ຽວກັບການຫັນເອົາບັນດານັກສຶກສາ ທີ່ຈົບຂະແໜງວິຊາຊີບຕ່າງໆ ລົງເຮັດວຽກຊ່ວຍບ້ານ ແລະ ກຸ່ມບ້ານ ແນ່ໃສ່ສ້າງນັກພັດທະນາກອນກັບທີ່ ໂດຍໄດ້ຄົ້ນຄວ້າອອກນະໂຍບາຍ ແລະ ມາດຕະການຈັດຕັ້ງປະຕິບັດ ທີ່ຈະແທດເຖິງກ່ວາເຊັ່ນ: ແຂວງໄຊຍະລູລີ ໄດ້ຫັນເອົານັກສຶກສາທີ່ຮຽນຈົບວິຊາຊີບຈຳນວນ 200 ກ່ວາຄົນ ລົງເຮັດວຽກຢູ່ຕາມບ້ານ, ກຸ່ມບ້ານ ພາຍຫຼັງທີ່ສຳເລັດທິດສະດີການເມືອງ.

ທ່ານ ບຸນເຮືອງ ວົງພະຈັນ ລັດຖະມົນຕີປະຈຳຫ້ອງວ່າການລັດຖະບານ, ຫົວໜ້າຄະນະພັດທະນາຊົນນະບົດ ແລະ ລືບລ້າງຄວາມທຸກຍາກຂັ້ນສູນກາງ ກ່າວໃນກອງປະຊຸມວຽກງານກໍ່ສ້າງຮາກຖານການເມືອງ-ພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ໃນວັນທີ 21-22 ພະຈິກ 2012 ວ່າ: ຕາມການກວດກາປະເມີນຜົນກວດກາປະຈຳປີ 2012, ປະຊາຊົນມີຄວາມຕື່ນຕົວສູງທາງດ້ານການເມືອງ, ມີສະຕິເຄົາລົບລະບຽບກົດໝາຍຂອງລັດ, ມີຄວາມສາມັກຄີປອງດອງກັນ ໂດຍສະເລ່ຍແລ້ວຢູ່ໃນລະດັບ 90,60%, ລະບົບການເມືອງຢູ່ບ້ານ, ກຸ່ມບ້ານໄດ້ຮັບການປັບປຸງໃຫ້ໜັກແໜ້ນເຂັ້ມແຂງເທື່ອລະກ້າວ, ຄະນະພັກຮາກຖານໜ່ວຍພັກຢູ່ບ້ານ, ກຸ່ມບ້ານໄດ້ເຄື່ອນໄຫວວຽກງານຕາມພາລະບົດບາດໄດ້ດີ, ອີງຕາມຕົວເລກທ້າຍປີ 2012, ທົ່ວປະເທດມີຄະນະພັກຮາກຖານກຸ່ມບ້ານ 4,729 ສະຫາຍ, ມີໜ່ວຍພັກຂັ້ນບ້ານທັງໝົດ 6,996 ໜ່ວຍ, ມີສະມາຊິກພັກທັງໝົດ 113,076 ສະຫາຍ, ໄດ້ຫັນເອົາກຳມະການພັກເມືອງ ໄປເປັນເຂລາພັກຮາກຖານກຸ່ມບ້ານທັງໝົດ 506 ສະຫາຍ, ບ້ານມີສະມາຊິກພັກ, ໜ່ວຍພັກເພີ່ມຂຶ້ນ, ຈຳນວນບ້ານມີລະບົບການຈັດຕັ້ງໜັກແໜ້ນແເຂັ້ມແຂງ, ມີໜ່ວຍພັກແຂງຮູ້ນຳພາຮອບດ້ານ ຈຳນວນ 5,936 ບ້ານ ຂອງຈຳນວນບ້ານໃນທົ່ວປະເທດ, ເພີ່ມຈາກປີ 2011 ເທົ່າຕົວ, ຈຳນວນບ້ານຂຶ້ນກັບເມືອງໂດຍກົງເພີ່ມຂຶ້ນ 1,243 ບ້ານ, ມີແນວທາງປ້ອງກັນຊາດບ້ານ ທັງໝົດ 80,000 ກ່ວາຄົນ, ມີສະມາຊິກຊາວໜຸ່ມບ້ານທັງໝົດ 40,000 ກ່ວາຄົນ, ມີສະມາຊິກແມ່ຍິງບ້ານທັງໝົດ 50,000 ກ່ວາຄົນ, ມີສະຫະພັນນັກຮົບເກົ່າບ້ານ ທັງໝົດ 50,000 ກ່ວາຄົນ, ຄອບຄົວທຸກຍາກໃນປີ 2011 ຈຳນວນ 140,129 ຄອບຄົວ, ຫຼຸດລົງຫຼາຍກ່ວາ 5% ຍັງເຫຼືອພຽງແຕ່ 13,01% ຄາດວ່າປີ 2015 ຈະໃຫ້ຫຼຸດລົງຕ່ຳກ່ວາ 10% ໃນທົ່ວປະເທດ.ສຳລັບວຽກງານປ້ອງກັນຊາດ-ປ້ອງກັນຄວາມສະຫງົບ ຢູ່ຂັ້ນຮາກຖານໃນທົ່ວປະເທດໄດ້ຮັບການເຊື່ອມຊືມ ແລະ ຈັດຕັ້ງຜັນຂະຫຍາຍນັບມື້ນັບກວ້າງຂວາງເລີກເຊິ່ງ, ສະຕິກົນອຸບາຍມ້າງເພທຳລາຍຂອງສັດຕູໄດ້ຮັບການຍົກສູງ, ກຳລັງກອງຫຼອນປ້ອງກັນຕົວ, ປກສ ບ້ານໄດ້ຮັບການຝຶກອົບຮົມຍົກລະດັບທາງດ້ານສິລະປະຍຸດ-ຍຸດທະວິທີ ເປັນປົກກະຕິ, ດ້ານຈຳນວນເພີ່ມຂື້ນເປັນກຳລັງແຮງຄ້ຳປະກັນຄວາມສຸກ, ຄວາມປອດໄພ, ຄວາມເປັນລະບຽບຮຽບຮ້ອຍຢູ່ຂັ້ນຮາກຖານ, ຕາມຕົວເລກເກັບກຳໃນທ້າຍປີ 2012 ມີກຳລັງກອງຫຼອນທັງໝົດ 1 ແສນກ່ວາຄົນ, ສັງກັດຢູ່ 1,500 ກ່ວາກອງຮ້ອຍ, ປກສ ບ້ານ ເພີ່ມຂຶ້ນ 80,000 ກ່ວາຄົນ,ເຄື່ອນໄຫວເຮັດວຽກຢູ່ບັນດາບ້ານ, ກຸ່ມບ້ານ ທົ່ວປະເທດ, ກຳລັງປະກອບອາວຸດປະຊາຊົນກໍ່ໄດ້ເອົາໃຈໃສ່ກໍ່ສ້າງຮາກຖານ ປກຊ-ປກສ ຢູ່ເຂດທີ່ສຳຄັນ ແລະ ບໍລິເວນລຽບຊາຍແດນ ເພື່ອສະກັດກັ້ນແກ້ໄຂປະກົດການຫຍໍ້ທໍ້ຕ່າງໆ, ປະກອບສ່ວນເຂົ້າໃນການປົກປັກຮັກສາ ແລະ ຮັບປະກັນໄດ້ຄວາມປອດໄພ.

ຜ່ານການປະເມີນໃນປີ 2012 ເຫັນວ່າ: ບ້ານ ປກຊ ດີ ເພີ່ມຂຶ້ນຈາກ 49% ໃນປີ 2011 ມາເປັນ 76%, ບ້ານ ປກສ ດີ ໄດ້ເພີ່ມຈາກ 49% ມາເປັນ 75%, ບ້ານປອດຢາເສບຕິດເພີ່ມຂຶ້ນເປັນ 61%, ບ້ານປອດຄະດີເພີ່ມຂຶ້ນເປັນ 60% ຂອງຈຳນວນບ້ານໃນປະເທດ, ຄອບຄົວພັດທະນາ ເພີ່ມຂຶ້ນຈາກ 495,626 ຄອບຄົວ ມາເປັນ 617,231 ຄອບຄົວ ໂດຍສະເພາະ 10 ແຂວງ ທີ່ສາມາດບັນລຸຄາດໝາຍສູ້ຊົນ ໄດ້ມີບ້ານພັດທະນາເຖິງ 15% ຂອງຈຳນວນບ້ານເຊັ່ນ: ແຂວງຫຼວງນ້ຳທາ, ຊຽງຂວາງ, ອັດຕະປື, ເຊກອງ, ບໍລິຄຳໄຊ, ບໍ່ແກ້ວ, ວຽງຈັນ, ໄຊຍະບູລີ, ນະຄອນຫຼວງວຽງຈັນ, ສະຫວັນນະເຂດ, ຈຳປະສັກ.

Off

Comments are closed.