12th Feb2020

ພິທີປະກາດການແຕ່ງຕັ້ງຮັກສາການ ຫົວໜ້າວິທະຍາຄານສັນຕິບານປະຊາຊົນ

by somchan

ກະຊວງປ້ອງກັນຄວາມສະຫງົບ ຈັດພິທີປະກາດການແຕ່ງຕັ້ງຮັກສາການ ຫົວໜ້າວິທະຍາຄານສັນຕິບານປະຊາຊົນ ໃນວັນທີ 12 ກຸມພາ 2020 ນີ້ ພາຍໃຕ້ການເປັນປະທານຂອງ ພົຕ ປອ ສົມຫວັງ ທຳມະສິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ມີຄະນະພັກ, ຄະນະບັນຊາ, ພະນັກງານຫຼັກແຫຼ່ງອ້ອມຂ້າງວິທະຍາຄານສັນຕິບານປະຊາຊົນເຂົ້າຮ່ວມ.

ໃນພິທີ ພັທ ຄຳພອນ ແສງສາລີຈັນ ຮອງຫົວໜ້າກົມຈັດຕັ້ງພະນັກງານ ກົມໃຫ່ຍການເມືອງ ປກສ ໄດ້ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງນາຍຕຳຫຼວດທີ່ຂື້ນກັບ ວິທະຍາຄານສັນຕິບານປະຊາຊົນ ໃນນີ້ໄດ້ແຕ່ງຕັ້ງ ພັອ ປອ ວັນສົມ ສີສົມບັດ ເປັນຮັກສາການຫົວໜ້າວິທະຍາຄານສັນຕິບານປະຊາຊົນ ແລະ ຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ ພ້ອມນີ້ ພັອ ຫຸມພັນ ຜິວເຂັມພອນ ຫົວໜ້າກົມພັກ ກົມໃຫ່ຍການເມືອງ ປກສ ໄດ້ຜ່ານມະຕິຕົກລົງຂອງຄະນະພັກ ກະຊວງປ້ອງກັນຄວາມສະຫງົບ ວ່າດ້ວຍການບົ່ງຕົວແຕ່ງຕັ້ງເລຂາຄະນະບໍລິຫານງານພັກວິທະຍາຄານສັນຕິບານປະຊາຊົນ ໃນນີ້ໄດ້ບົ່ງຕົວແຕ່ງຕັ້ງ ພັອ ປອ ວັນສົມ ສີສົມບັດ ເປັນເລຂາຄະນະບໍລິຫານງານພັກວິທະຍາຄານສັນຕິບານປະຊາຊົນ.

ທັງນີ້ກໍ່ເພື່ອເປັນການປັບປຸງກົງຈັກການຈັດຕັ້ງຂອງກະຊວງປ້ອງກັນຄວາມສະຫງົບຢູ່ແຕ່ລະຂັ້ນໃຫ້ມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ ແລະ ສາມາດຕອບສະໜອງ ໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍໃໝ່.

Comments are closed.