06th Feb2020

ພິທີປະກາດແຕ່ງຕັ້ງຫົວໜ້າກອງບັນຊາການ ປກສ ແຂວງອັດຕະປື

by somchan

ພິທີປະກາດແຕ່ງຕັ້ງຫົວໜ້າກອງບັນຊາການ ປກສ ແຂວງອັດຕະປື ໄດ້ຈັດໃນວັນທີ 6 ກຸມພາ 2020 ຢູ່ທີ່ສະໂມສອນຂອງກອງບັນຊາການ ປກສ ແຂວງ ໂດຍການໃຫ້ກຽດເຂົ້າຮ່ວມຂອງ ທ່ານ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ,

ມີ ທ່ານ ເລັດ ໄຊຍະພອນ ເຈົ້າແຂວງອັດຕະປື, ມີຄະນະກອງບັນຊາການ, ຄະນະຫ້ອງ, ກອງພັນ, ຄ້າຍຄຸມຂັງ – ດັດສ້າງ, ກອງບັນຊາການ ປກສ 5 ເມືອງ, ແຂກຖືກເຊີນຈາກພາກສ່ວນທີ່ກ່ຽວຂ້ອງອ້ອມຂ້າງແຂວງ ແລະ ພະນັກງານຫຼັກແຫຼ່ງຂອງກອງບັນຊາການ ປກສ ແຂວງເຂົ້າຮ່ວມຢ່າງພ້ອມພຽງ.

ທ່ານ ພັທ ຄຳພອນ ແສງສາລິຈັນ ຮອງກົມຈັດຕັ້ງ ກະຊວງປ້ອງກັນຄວາມສະຫງົບ ໄດ້ຜ່ານດຳລັດຂອງນາຍົກລັດຖະມົນຕີແຫ່ງ ສປປ ລາວ ວ່າດ້ວຍການແຕ່ງຕັ້ງ ຫົວໜ້າກອງບັນຊາການ ປກສ ແຂວງອັດຕະປື ໂດຍໄດ້ແຕ່ງຕັ້ງ ທ່ານ ພັອ ສີເວີນ ແກ້ວສີວົງສາ ຮັກສາການຫົວໜ້າກອງບັນຊາການ ປກສ ແຂວງ ຂື້ນເປັນຫົວໜ້າກອງບັນຊາການ ປກສ ແຂວງ.

 

 

ການປະກາດແຕ່ງຕັ້ງຫົວໜ້າກອງບັນຊາການ ປກສ ແຂວງອັດຕະປືໃນຄັ້ງນີ້ ແມ່ນອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານ ກອງບັນຊາການ ປກສ ແຂວງ ເພື່ອເປັນການປັບປຸງກົງຈັກການຈັດຕັ້ງ ໃຫ້ມີຄວາມໜັກແໜ້ນທາງດ້ານການເມືອງ – ແນວຄິດ, ມີຄວາມເຂັ້ມແຂງທາງດ້ານການຈັດຕັ້ງ ແລະ ຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.

ໃນໂອກາດດັ່ງກ່າວ ພົຕ ກົງທອງ ພົງວິຈິດ ກໍ່ໄດ້ໃຫ້ກຽດໂອ້ລົມເຊິ່ງກ່ອນອື່ນ ທ່ານກໍໄດ້ຍ້ອງຍໍຊົມເຊີຍຕໍ່ຄະນະພັກ – ຄະນະບັນຊາ ຕະຫຼອດຮອດພະນັກງານ – ນັກຮົບ ທົ່ວກຳລັງປ້ອງກັນຄວາມສະຫງົບແຂວງອັດຕະປື ທີ່ໄດ້ທຸ່ມເທເຫື່ອແຮງ, ສະຕິປັນຍາ, ມີຄວາມອົດທົນ, ສູ້ຊົນ ເຂົ້າໃນການເຮັດວຽກງານການເມືອງ ແລະ ໜ້າທີ່ວຽກງານວິຊາສະເພາະ ເພື່ອຮັບປະກັນໃຫ້ແຂວງອັດຕະປືມີຄວາມສະຫງົບ, ມີຄວາມເປັນລະບຽບຮຽບ ຮ້ອຍໂດຍພື້ນຖານ. ນອກຈາກນັ້ນ, ທ່ານຍັງໄດ້ຮຽກຮ້ອງ ໃຫ້ຜູ້ທີ່ໄດ້ຮັບການແຕ່ງຕັ້ງເປັນຫົວໜ້າກອງບັນຊາການ ປກສ ແຂວງ (ຜູ້ໃໝ່) ຍົກສູງຄວາມຮັບຜິດຊອບ ຕໍ່ໜ້າທີ່ວຽກງານທີ່ໄດ້ຮັບມອບໝາຍ, ເຕົ້າໂຮມ ຄວາມສາມັກຄີພາຍໃນໃຫ້ແໜ້ນແຟ້ນ, ພ້ອມກັນຈັດຕັ້ງປະຕິບັດໜ້າທີ່ວຽກງານທີ່ໄດ້ຮັບມອບໝາຍຈາກຂັ້ນເທິງໃຫ້ມີຜົນສຳເລັດ, ສ້າງໃຫ້ກອງບັນຊາການ ປກສ ແຂວງອັດຕະປື ມີຄວາມເຕີບໃຫຍ່ ແລະ ເຂັ້ມແຂງຂື້ນເປັນກ້າວໆ.

Comments are closed.