05th Feb2020

ພິທີປະກາດ ແຕ່ງຕັ້ງຮັກສາການຫົວຫນ້າກອງບັນຊາການ ປກສ ແຂວງໄຊສົມບຸນ

by somchan

ພິທີປະກາດ ແຕ່ງຕັ້ງຮັກສາການຫົວຫນ້າກອງບັນຊາການ ປກສ ແຂວງ ໄຊສົມບູນ ໄດ້ຈັດຂຶ້ນໃນວັນທີ 4 ກຸມພາ 2020 ໃຫ້ກຽດເຂົ້າຮ່ວມໂດຍ ພົທ ວິໄລ ຫຼ້າຄໍາຟອງ ເລຂາທິການສູນກາງພັກ ລັດຖະມົນຕີກະຊວງ ປກສ, ມີບອ່ນ ແຕ ຄໍາລຽງ ອຸທສ ໄກສອນ ເຈົ້າແຂວງ ແຂວງໄຊສົມບູນ, ພ້ອມດ້ວຍພະນັກງານພະນັກງານນໍາພາ-ບັນຊາ ແລະ ພະນັກງານຫຼັກແຫຼ່ງທົ່ວກອງບັນຊາການ ປກສ ແຂວງໄຊສົມບຸນເຂົ້າຮ່ວມ.

ພັອ ຄອນສະຫວັນ ສົມພາໄຊ ຫົວຫນ້າກົມຈັດຕັ້ງພະນັກງານ ກົມໃຫຍ່ການເມືອງກະຊວງປ້ອງກັນ ຄວາມສະຫງົບ ໄດ້ຂໍ້ຕົກລົງຂອງທ່ານລັດຖະມົນຕີກະຊວງ ປກສ ວ່າດ້ວຍການອະນຸຍາດ ໃຫ້ ພັອ ພິມພາ ທິຖາວອນ ຫົວຫນ້າກອງບັນຊາການ ປກສ ແຂວງໄຊສົມບູນ ພັກການເເພື່ອລໍຖ້າຮັບເບ້ຍບຳນານ ແລະ ຂໍ້ຕົກລົງ ວ່າດ້ວຍການແຕ່ງຕັ້ງ ພັອ ບົວພັນ ອິນທະປັນຍາ ເປັນຮັກສາການຫົວຫນ້າກອງບັນຊາການ ປກສ ແຂວງໄຊສົມບຸນ ສ່ວນຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.

ຈາກນັ້ນ, ພົທ ວິໄລ ຫຼ້າຄໍາຟອງ ເລຂາທິການສູນກາງພັກ ລັດຖະມົນຕີກະຊວງ ປກສ ໄດ້ມີຄໍາເຫັນ ໂອ້ລົມຕໍ່ນາຍຕໍາຫຼວດທີ່ໄດ້ຮັບການແຕ່ງຕັ້ງ ແລະ ພັກການກຽມຮັບເບ້ຍບໍານານໃນຄັ້ງນີ້ ແມ່ນຍ້ອນຄວາມ ຮຽກຮ້ອງຕ້ອງການຂອງຫນ້າທີ່ການເມືອງ ແລະ ເປັນກົດເກນພາວະວິໄສ ແມ່ນລະບຽບຫຼັກການຂອງພັກ ເພື່ອປັບປຸງ ການຈັດຕັ້ງໃຫ້ມີຄວາມຫນັກແຫນ້ນ ເຕີບໃຫຍ່ເຂັ້ມແຂງສາມາດຕອບສະຫນອງກັບຄວາມຮຽກຮ້ອງຕ້ອງການຂອງຫນ້າການເມືອງໃນແຕ່ລະໄລຍະ ທ່ານລັດຖະມົນຕີ ກະຊວງປ້ອງກັນຄວາມສະຫງົບ ຍັງໄດ້ເນັ້ນຫນັກໃຫ້ນາຍຕໍາ ຫຼວດທີ່ໄດ້ຮັບການແຕ່ງຕັ້ງ ຈົ່ງເພີ່ມທະວີ-ຍົກສູງສະຕິຄວາມຮັບຜິດຕໍ່ຫນ້າທີ່ການເມືອງທີ່ໄດ້ຮັບມອບຫມາຍ ເປັນ ແບບຢ່າງໃນການຈັດຕັ້ງປະຕິບັດແນວທາງຂອງພັກ ການຊີ້ນໍາຂອງຂັ້ນເທິງ ເອົາໃຈໃສກໍ່ສ້າງ-ປັບປຸງກໍາລັງ ໃຫ້ມີ ຄວາມເຕີບໃຫຍ່ເຂັ້ມແຂງ ມີແບບແຜນທີ່ທັນສະໄຫມ ເພື່ອຮັບໃຊ້ຊາດ-ຮັບໃຊ້ປະຊາຊົນຢ່າງແທ້ຈິງ. ພ້ອມກັນນັ້ນ ທ່ານຍັງໄດ້ເນັ້ນຫນັກໃຫ້ຄະນະພັກ-ຄະນະບັນຊາ ແລະ ພະນັກງານ-ນັກຮົບທົ່ວກອງບັນຊາການ ປກສ ແຂວງໄຊ ສົມບູນ ໃຫ້ເອົາໃຈໃສ່ປະຕິບັດຫຼັກການລວມສູນປະຊາທິປະໄຕ ເຮັດວຽກເປັນຫມູ່ຄະນະ, ມອບໃຫ້ບຸກຄົນ ຮັບຜິດຊອບ ສິ່ງສໍາຄັນແມ່ນເພີ່ມທະວີຄວາມສາມັກຄີພາຍໃນໃຫ້ແຫນ້ນແຟ້ນ ໃນການປະຕິບັດ ຕາມແນວທາງຂອງພັກ ມະຕິຄໍາສັ່ງຂອງຂັ້ນເທິງ ເຮັດສໍາເລັດຫນ້າທີ ທີ່ໄດ້ຮັບມອບ ຫມາຍ ເປັນຕົ້ນແມ່ນການສະກັດກັ້ນ ແລະ ແກ້ໄຂປະກົດການຫຍໍ້ທໍ້ຢູ່ໃນກໍາລັງ, ຕ້ານ ແລະ ສະກັດກັ້ນການສໍ້ລາດບັງຫຼວງ ການສວຍໃຊ້ ຫນ້າທີ່ຕໍາແຫນ່ງໃນທາງທີ່ບໍ່ຖືກຕ້ອງໃຫ້ເດັດຂາດ, ຈັດຕັ້ງ ລະບອບປະຈໍາການໃຫ້ເຂັ້ມງວດ ຫັນພະນັກງານລົງກໍ່ສ້າງຮາກຖານ ປຸກລະດົມປະຊາຊົນໃຫ້ເຂົ້າຮ່ວມວຽກງານປ້ອງ ກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເພື່ອສະກັດກັ້ນ ແກ້ໄຂບັນດາຫນໍ່ແຫນງທີ່ສ້າງຄວາມບໍ່ ສະຫງົບທາງດ້ານການເມືອງ ຄວາມບໍ່ເປັນລະບຽບຮຽບຮ້ອຍທາງສັງຄົມ ເປັນຕົ້ນແມ່ນ ບັນຫາຢາເສບຕິດ, ສໍ້ໂກງ ຊັບ, ລັກຊັບ, ອຸປະຕິເຫດຕາມທ້ອງຖະຫນົນ, ຄ້າຂາຍເຖື່ອນ, ແກ້ໄຂຄົນຕ່າງປະເທດທີ່ມາເຄື່ອນໄຫວຜິດກົດຫມາຍ, ແກ້ໄຂບັນຫາໂສເພນີ ແລະ ບັນຫາການຄ້າມະນຸດ ໃຫ້ຫຼຸດນ້ອຍລົງ ເພື່ອເຮັດໃຫ້ແຂວງໄຊສົມບູນ ມີຄວາມສະຫງົບທາງດ້ານການເມືອງ ມີຄວາມເປັນລະບຽບຮຽບຮ້ອຍທາງສັງຄົມ ການດໍາລົງຊີວິດຂອງປະຊາຊົນມີ ຄວາມປອດໄພ.

 

Off

Comments are closed.