30th Jul2018

ພິທີລະນຶກວັນສາກົນຕ້ານການຄ້າມະນຸດ ຄົບຮອບ 18 ປີ

by somchan

​ໃນວັນ​ທີ 28 ກໍລະກົດ​ນີ້ ກອງ​ເລຂາ​ຄະນະ​ກຳມະການ ​ຕ້ານ​ການ​ຄ້າ​ມະນຸດລະດັບ​ຊາດ​ ຮ່ວມ​ກັບ​ກົມ​ຕຳຫຼວດ ​ສະກັດ​ກັ້ນ ​ແລະ ຕ້ານ​ການ​ຄ້າ​ມະນຸດ ກົມ​ໃຫ່ຍຕຳຫຼວດ ກະຊວງ​ປ້ອງ​ກັນ​ຄວາມ​ສະຫງົບຈັດພິທີລະນຶກວັນສາກົນຕ້ານການຄ້າມະນຸດ ຄົບຮອບ 18 ປີ ຄືວັນທີ 30 ກໍລະກົດ 2000 ຫາ 30 ກໍລະກົດ 2018 ຢູ່ທີ່ສວນປະຕູໄຊ ໂດຍການໃຫ້ກຽດເຂົ້າຮ່ວມຂອງ ພົຕ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ທັງເປັນຮອງປະທານຄະນະກຳມະການ ​ຕ້ານ​ການ​ຄ້າ​ມະນຸດລະດັບ​ຊາດ, ມີ​ບັນດາ​ການ​ນຳກະຊວງ​ອົງການ​ທຽບ​ເທົ່າ​ກະຊວງ, ຄະນະ​ກຳມະການ ຕ້ານ​ການ​ຄ້າ​ມະນຸດ​ລະດັບ​ຊາດ, ຄູ່​ຮ່ວມ​ງານ​ຈາກ​ບັນດາ​ກະຊວງ, ສະຖານທູດ​ອົງການ​ຈັດ​ຕັ້ງ​ສາກົນ​ຕ່າງໆ​ປະຈຳ ສປປ ລາວ ​ແລະ ມວນ​ຊົນ​ເຂົ້າ​ຮ່ວມ.

​ໂອກາດ​ດັ່ງກ່າວ ພົຕ ສົມ​ແກ້ວ ສີ​ລາ​ວົງ ​ໄດ້​ກ່າວ​ວ່າ: ບັນຫາ​ການ​ຄ້າ​ມະນຸດ​ເປັນ​ອາຍາ​ກຳ​ຂ້າມ​ຊາດ​ທີ່​ຮ້າຍ​ແຮງ ຍ້ອນ​ວ່າການ​ຄ້າ​ມະນຸດ ​ແມ່ນ​ການລະ​ເມີດ​ສິດທິ​ພື້ນຖານ ຂອງ​ຄວາມ​ເປັນ​ມະນຸດ​ຂັ້ນ​ຮ້າຍ​ແຮງ ສົ່ງ​ຜົນ​ກະທົບ​ໂດຍ​ກົງ ທາງ​ດ້ານ​ຮ່າງກາຍ ​ແລະ ຈິດ​ໃຈ​ຂອງ​ຜູ້​ຖືກ​ເຄາະ​ຮ້າຍ, ຕໍ່​ຄອບຄົວ, ສັງຄົມ ​ແລະ ການ​ພັດທະນາ​ສ້າງສາ​ປະ​ເທດ​ຊາດ, ​ໃນ​ປະຈຸ​ບັນ​ມີ​ຜູ້​ຖືກ​ເຄາະ​ຮ້າຍ ຈາກ​ການ​ຄ້າ​ມະນຸດ​ໃນ​ທົ່ວ​ໂລກ​ຫຼາຍ​ກວ່າ 40 ລ້ານ​ຄົນ, ​ເດັກນ້​ອຍ ​ແລະ ຜູ້ຍິງ​ກວມ​ເອົາ 71%, ​ເຂດ​ພາກ​ພື້ນ​ອາຊີ ​ແລະ ​ປາຊີ​ຟິກ ​ເປັນ​​ເຂດທີ່​ມີ​ຜູ້​ຖືກ​ເຄາະ​ຮ້າຍ​ຫຼາຍ​ທີ່​ສຸດ​ໃນ​ໂລກ ກວມ​ເອົາ 65% ຂອງ​ຈຳນວນ​ຜູ້​ຖືກ​ເຄາະ​ຮ້າຍ​ໃນ​ທົ່ວ​ໂລກ. ບັນຫາ​ການ​ຄ້າ​ມະນຸດ​ໄດ້​ເກີດ​ຂື້ນ​ຢ່າງ​ກວ້າງ​ຂວາງ ​ແລະ ມີ​ຫຼາຍ​ຮູບ​ແບບ​ເປັນ​ຕົ້ນ​ແມ່ນ: ການ​ເຄື່ອນ​ຍ້າຍ​ແຮງ​ງານ, ການ​ອົບ​ພະຍົບຂອງ​ປະຊາກອນ​ໂລກ ​ແລະ ອື່ນໆ. ສະ​ເພາະ ສປປ ລາວ ພົ້ນ​ເດັ່ນ: ​ແມ່ນ​ຮູບ​ແບບ​ການ​ຕົວະ​ຍົວະ​ຫຼ​ອກລວງ​ໄປ​ທ່ອງທ່ຽວ, ​ໄປ​ຂາຍ​ເຄື່ອງ, ​ໄປ​ອອກ​ແຮງ​ງານ​ແບບ​ຜິດ​ກົດໝາຍ ​ແລະ ຂົນຂວາຍ​ເອົາ​ແມ່ຍິງ​ລາວ​ໄປ​ແຕ່ງດອງ​ກັບ​ຄົນ​ຕ່າງປະ​ເທດ ດ້ວຍ​ຮູບ​ການ​ໝັ້ນ​ໝາຍ​ແອບ​ແຝງ ​ແລະ ອື່ນໆ.

ທ່ານ​ຍັງ​ກ່າວ​ຕື່ມ​ວ່າ: ​ເພື່ອ​ຈັດ​ຕັ້ງ​ປະຕິບັດ​ບັນດາ​ວຽກ​ງານ ຕ້ານ​ການ​ຄ້າ​ມະນຸດ​ໃນ​ຕໍ່ໜ້າ​ໃຫ້​ມີ​ປະສິດ​ທິຜົນ ​ແລະ ປະສິດທິພາບ​ສູງ, ທັງ​ແກ້​ໄຂ​ບັນຫາ​ການ​ຄ້າ​ມະນຸດ​ຢູ່ ສປປ ລາວ ​ໃຫ້ຫຼຸດລົງ, ຮຽກຮ້ອງ​ໃຫ້​ທຸກຂະ​ແໜງ​ການ ​ແລະ ທຸກ​ພາກສ່ວນ​ຈົ່ງ​ເພີ່ມ​ທະວີ​ວຽກ​ງານ​ໂຄສະນາ​ສຶກສາ​ອົບຮົມ​ດ້ວຍ​ຫຼາຍ​ຮູບ​ຫຼາຍ​ສີ, ຫຼາຍ​ວິທີ​ການ​ເພື່ອ​ໃຫ້​ບັນດາ​ຊັ້ນ​ຄົນ​ຕ່າງ​ໆ. ​ໂດຍ​ສະ​ເພາະ​ຊາວ​ໜຸ່ມ-​ເຍົາວະ​ຊົນ​ຢູ່​ສູນ​ກາງ ​ແລະ ທ້ອງ​ຖິ່ນ​ເຂດ​ຫ່າງ​ໄກ​ສອກຫຼີກ ຮາກ​ຖານ​ບ້ານ ນັບ​ທັງ​ເຂດ​ເສດຖະກິດ ພິ​ເສດ​ໄດ້​ຮັບ​ຮູ້​ເຂົ້າ​ໃຈ​ຜົນ​ຮ້າຍ​ຂອງ​ການ​ຄ້າ​ມະນຸດ ມີ​ສະຕິ​ປ້ອງ​ກັນ​ຕົນ​ເອງ ​ແລະ ມີ​ຄວາມ​ຕື່ນ​ຕົວ​ປະກອບສ່ວນ​ເຂົ້າ​ໃນ​ວຽກ​ງານ​ຕ້ານ​ການ​ຄ້າ​ມະນຸດ, ​ໃນ​ພິທີ​ຍັງ​ໄດ້​ມີ​ການວາງສະ​ແດງ​ຮູບ​ພາບ​ກ່ຽວ​ກັບ​ຜົນງານ ການ​ເຄື່ອນ​ໄຫວ​ວຽກ​ງານ​ຕ້ານ​ການ​ຄ້າ​ມະນຸດ​ໃນ​ໄລຍະ​ຜ່ານ​ມາ ​ແລະ ​ໄດ້​ມີ​ການ​ຍ່າງ​ມິ​ນິມາລາ​ທອນ​ເພື່ອ​ສຸຂະພາບ.

Off

Comments are closed.