14th Jan2020

ພິທີວາງສີລາລຶກ ໂຄງການກໍ່ສ້າງສະໂມສອນກະຊວງປ້ອງກັນຄວາມສະຫົງບ

by somchan

ກະຊວງປ້ອງກັນຄວາມສະຫົງບ ແລະ ບໍລິສັດ ນໍລິນໂກ ສປ ຈີນ ໄດ້ຈັດພິທີວາງສີລາລຶກ ໂຄງການກໍ່ສ້າງສະໂມສອນກະຊວງປ້ອງກັນຄວາມສະຫົງບ, ໃນວັນທີ 14 ມັງກອນນີ້, ເປັນກຽດເຂົ້າຮ່ວມຂອງ ພົທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫົງບ, ມີຮອງລັດຖະມົນຕີ, ຄະນະກົມໃຫຍ່, ກົມກອງອ້ອມຂ້າງກະຊວງປ້ອງກັນຄວາມສະຫົງບ, ຕາງໜ້າບໍລິສັດ ນໍລິນໂກ ສປ ຈີນ ແລະ ແຂກຖືກເຊີນເຂົ້າຮ່ວມ.

ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫຍ່ການເມືອງປ້ອງກັນຄວາມສະຫົງບ ຄະນະຮັບຜິດຊອບໂຄງການກໍ່ສ້າງສະໂມສອນກະຊວງປ້ອງກັນຄວາມສະຫົງບໄດ້ກ່າວວ່າ: ໂຄງການດັ່ງກ່າວເປັນໂຄງການໜຶ່ງ ທີ່ມີຄວາມສຳຄັນ ແລະ ຈຳເປັນຕໍ່ກຳລັງປ້ອງກັນຄວາມສະຫົງບ ເພື່ອແນ່ໃສ່ພັດທະນາພື້ນຖານໂຄງລ່າງຂອງກະຊວງປ້ອງກັນຄວາມສະຫງົບ ໂດຍສະເພາະແມ່ນກະກຽມຮັບໃຊ້ງານສະເຫຼີມສະຫຼອງ ວັນສ້າງຕັ້ງກຳລັງ ປ້ອງກັນຄວາມສະຫງົບຄົບຮອບ 60 ປີ. ຖ້າໂຄງການກໍ່ສ້າງດັ່ງກ່າວສຳເລັດ ກະຊວງປ້ອງກັນຄວາມສະຫົງບ ຈະມີຫ້ອງປະຊຸມທີ່ເປັນລະບົບຄົບຊຸດ ເຊິ່ງມີທີ່ສາມາດບັນຈຸຈຳນວນຄົນໄດ້ 500 ຄົນ, 200 ຄົນ ແລະ 50 ຄົນ, ເຊີ່ງສາມາດຮັບໃຊ້ກອງປະຊຸມຫຼາຍລະດັບ, ນອກນັ້ນຍັງຈະເປັນບ່ອນສຶກສາອົບຮົມພະນັກງານ-ນັກຮົບ, ບ່ອນສະແດງສິນລະປະ, ໂຮມຊຸມນຸມ ສະເຫຼີມສະຫຼອງວັນບຸນຕ່າງໆ ໄດ້ຢ່າງສະດວກ ແລະ ສິ່ງສຳຄັນແມ່ນ ເປັນສະຖານທີ່ສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ ທີ່ຈະມາເຖິງໃນວັນທີ 5 ເມສາ 2021.

ທ່ານ ພຶດສະພາ ພູມມະສັກ ຕາງໜ້າບໍລິສັດ ນໍລິນໂກ ສປ ຈີນ ໃນນາມບໍລິສັດຮັບເໝົາກໍ່ສ້າງ ໄດ້ກ່າວວ່າ: ໂຄງການກໍ່ສ້າງສະໂມສອນກະຊວງປ້ອງກັນຄວາມສະຫົງບ ຕັ້ງຢູ່ບ້ານ ແສງສະຫ່ວາງ ເມືອງໄຊເສດຖາ ນະຄອນຫຼວງວຽງຈັນ ເຊີ່ງມີຂະໜາດ 36×69.5 ແມັດ, ມີຫ້ອງປະຊຸມ ແລະ ຫ້ອງຈັດງານລ້ຽງ, ມີຫ້ອງອາຫານ ເຊິ່ງມີຫ້ອງນ້ຳ, ບ່ອນຈອດລົດໃຫຍ່ 154 ຄັນ, ບ່ອນຈອດລົດຈັກ 80 ຄັນ, ເດີ່ນເບຕົງ, ຕາມແຜນການກໍ່ສ້າງໂຄງການດັ່ງກ່າວແມ່ນໄລຍະເວລາ 18 ເດືອນ, ແຕ່ດ້ວຍຄວາມຈຳເປັນອັນເລັ່ງດ່ວນເພື່ອໃຫ້ສະໂມສອນດັ່ງກ່າວ ທ່ວງທັນຮັບໃຊ້ເຂົ້າໃນວັນສ້າງຕັ້ງກຳລັງປ້ອງກັນຄວາມສະຫົງບຄົບຮອບ 60 ປີ, ໃນວັນທີ 5 ເມສາ 2021 ຈື່ງເລັ່ງໃຫ້ສຳເລັດພາຍໃນ 15 ເດືອນນັບແຕ່ມື້ລົງມືກໍ່ສ້າງເປັນຕົ້ນໄປ.

Comments are closed.