11th Jan2019

ພິທີສະເຫຼີມສະຫຼອງວັນສ້າງຕັ້ງກຳລັງກວດກາ -ກວດການ ກະຊວງ ປກສ ຄົບຮອບ 25 ປີ

by somchan

ກົມກວດກາ-ກວດການ ກະຊວງ ປກສ ໄດ້ຈັດພິທີສະເຫຼີມສະຫຼອງວັນສ້າງຕັ້ງກຳລັງກວດກາ-ກວດການ ກະຊວງ ປກສ ຄົບຮອບ 25 ປີ (10 ມັງກອນ 1994-10 ມັງກອນ 2019 ) ໃນວັນທີ 10 ມັງກອນ 2019 ໂດຍການເຂົ້າຮ່ວມຂອງ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງ ປ້ອງກັນຄວາມສະຫງົບ ມີຫົວໜ້າກົມກວດກາ ກະຊວງປ້ອງກັນປະເທດ, ຄະນະພັກ, ຄະນະກົມ-ກອງອ້ອມຂ້າງກົມກວດກາ-ກວດການ, ກອງບັນຊາການ ປກສ ນະຄອນຫຼວງວຽງຈັນ, ປກສ ແຂວງວຽງຈັນ, ວິທະຍາຄານ ພະນັກງານຫຼັກແຫຼ່ງ ແລະ ແຂກຖືກເຊີນເຂົ້າຮ່ວມ.

ພົຈວ ດວງປີ ດາມະນີວົງ ຫົວໜ້າກົມກວດກາ-ກວດການ ໄດ້ຂື້ນກ່າວກ່ຽວກັບປະຫວັດມູນເຊື່ອ ການກຳເນີດເຕີບໃຫ່ຍຂະຫຍາຍຕົວ ຂອງກຳລັງກວດກາ-ກວດການ ວ່າ: ກຳລັງກວດກາ-ກວດການ ປກສ ແມ່ນກຳລັງວິຊາສະເພາະໜື່ງທີ່ສຳຄັນ ໃນໂຄງປະກອບກົງຈັກການຈັດຕັ້ງຂອງ ກະຊວງປ້ອງກັນຄວາມສະຫງົບ, ມີພາລະບົດບາດເປັນເສນາທິການ ໃຫ້ແກ່ຄະນະພັກ- ຄະນະກະຊວງ ປກສ, ຄະນະກວດກາສູນກາງພັກ, ອົງການກວດກາລັດຖະບານ ແລະ ອົງການຕ້ານການສໍ້ລາດບັງຫຼວງຂັ້ນສູນກາງ. ໃນການຄົ້ນຄວ້າວາງແຜນການໂຄງການດຳເນີນການຕິດຕາມ-ກວດກາ ການເຄື່ອນໄຫວປະຕິບັດພາລະບົດບາດ, ຂອງບັນດາອົງການຈັດຕັ້ງພັກ, ອົງການຈັດຕັ້ງບໍລິຫານລັດ, ອົງການຈັດຕັ້ງມະຫາຊົນ, ຄົ້ນຄວ້າຄຳຮ້ອງ, ຄຳສະເໜີ ແລະ ຕ້ານການສໍ້ລາດບັງຫຼວງໃນຂອບເຂດຄວາມຮັບຜິດຊອບ ຂອງກະຊວງປ້ອງກັນຄວາມສະຫງົບ, ໃນປີ 1994 ໂດຍອີງໃສ່ທິດຊີ້ນຳຂອງກົມການເມືອງສູນກາງພັກ ແລະ ຄຳສັ່ງຄະນະກຳມະການສູນກາງພັກ ແລະ ອີງໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນເວລານັ້ນ, ຄະນະພັກ-ຄະນະນຳກະຊວງພາຍໃນ ຈຶ່ງໄດ້ຕົກລົງເຫັນດີເປັນເອກະພາບສະເໜີສ້າງຕັ້ງຄະນະກວດກາ-ກວດການ ຂື້ນ ໃນວັນທີ 10 ມັງກອນ 1994 ( ຕາມດໍາລັດຂອງນາຍົກລັດຖະມົນຕີ ) ນັບແຕ່ນັ້ນມາມັນໄດ້ເປັນຂີດໝາຍອັນສຳຄັນ ໃຫ້ແກ່ການກຳເນີດຂອງກຳລັງກວດກາ-ກວດການ ປກສ  ແລະ ມິຄວາມເຕີບໃຫ່ຍຂະຫຍາຍຕົວເປັນກ້າວມາ, ໂດຍສະເພາະ ແມ່ນວຽກງານການເຄື່ອນໄຫວຕິດຕາມກວດກາ ແລະ ແກ້ໄຂບັນດາປະກົດການຫຍໍ້ທໍ້ຕ່າງໆ ທີ່ເກີດຂື້ນຢູ່ພາຍໃນກຳລັງປ້ອງກັນຄວາມສະຫງົບ ຢູ່ຂັ້ນສູນກາງ ແລະ ທ້ອງຖິ່ນ, ໄດ້ຕິດຕາມ-ຄຸ້ມຄອງບັນດາໂຄງການລົງທືນລັດ, ຕິດຕາມກວດກາການແຈ້ງຊັບສິນ ແລະ ລາຍຮັບ ໃນທົ່ວກຳລັງປ້ອງກັນຄວາມສະຫງົບ ແລະ ວຽກງານອື່ນໆ. ສະເພາະໃນປີ 2018 ຜ່ານມາໄດ້ຮັບ ແລະ ຄົ້ນຄວ້າແກ້ໄຂຄຳຮ້ອງ, ຄຳສະເໜີມີ 108 ເລື່ອງ, ແກ້ໄຂສຳເລັດ 33 ເລື່ອງ, ສົ່ງໃຫ້ກົມກອງທີ່ກ່ຽວຂ້ອງແກ້ໄຂ 29 ເລື່ອງ ແລະ ກຳລັງດຳເນີນການກວດກາ 38 ເລື່ອງ, ຊັດມ້ຽນ 8 ເລື່ອງ. ນັບແຕ່ມື້ສ້າງຕັ້ງຈົນມາເຖິງປະຈຸບັນ ກຳລັງກວດກາ-ກວດການ ກະຊວງ ປກສ ແມ່ນມີຄວາມເຕີບໃຫ່ຍເຂັ້ມແຂງທາງດ້ານປະລິມານ ແລະ ຄຸນນະພາບ, ເຮັດໃຫ້ການຈັດຕັ້ງປະຕິບັດວຽກງານກວດກາ-ກວດການ ຮັບປະກັນໄດ້ທາງດ້ານປະສິດທິຜົນ ແລະ ມີຄວາມກ້າວໜ້າຂື້ນຢ່າງບໍ່ຢຸດຢັ້ງ.

ໃນໂອກາດດັ່ງກ່າວນີ້ ທ່ານ ພົທ ວິໄລ ຫຼ້າຄຳຟອງ ລັດຖະມົນຕີກະຊວງ ປກສ ຍັງໄດ້ໃຫ້ກຽດໂອ້ລົມ ຊຶ່ງໄດ້ຍ້ອງຍໍຊົມເຊີຍຕໍ່ຜົນງານໄຊຊະນະທີ່ກຳລັງກົມກວດກາ-ກວດການຍາດມາໄດ້ ໃນໄລຍຜ່ານມາ ແລະ ໄດ້ເນັ້ນໜັກໃຫ້ຄະນະພັກ-ຄະນະບັນຊາຕະຫຼອດຮອດພະນັກງານ-ນັກຮົບ ກົມກວດກາ-ກວດການ ກະຊວງປກສ ຈົ່ງເສີມຂະຫຍາຍມູນເຊື້ອ ແລະ ພັດທະນາວຽກງານຂອງຕົນໃຫ້ສຳເລັດເຕິບໃຫ່ຍເຂັ້ມແຂງເປັນກ້າວໆ.

Off

Comments are closed.