09th Aug2018

ພິທີສະເຫຼີມສະຫຼອງ ແລະ ຫວນຄືນມູນເຊື້ອ ວັນສ້າງຕັ້ງກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ຄົບຮອບ 40 ປີ

by somchan

ພິທີສະເຫຼີມສະຫຼອງ ແລະ ຫວນຄືນມູນເຊື້ອ ວັນສ້າງຕັ້ງກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກະຊວງ ປກສ ຄົບຮອບ 40 ປີ ໄດ້ຈັດໃນວັນທີ 8 ສິງຫາ 2018 ນີ້. ໂດຍການເຂົ້າຮ່ວມຂອງ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງ ປກສ, ມີຄະນະພັກ-ຄະນະກົມ ແລະ ບັນດາຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ໃນທົ່ວປະເທດ ພ້ອມດ້ວຍພະນັກງານ-ນັກຮົບພາຍໃນກົມເຂົ້າຮ່ວມ.

ພົຈວ ຄຳສາຍ ຈັນທະວົງ ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ ສ້າງຮາກຖານ ໄດ້ເລົ່າຄືນມູນເຊື້ອ ການກຳເນີດເຕີບໃຫ່ຍຂະຫຍາຍຕົວຂອງ ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ແຕ່ລະໄລຍະ ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ເປັນກຳລັງວິຊາສະເພາະໜຶ່ງ ໃນການປະກອບສ່ວນເຂົ້າໃນພາລະກິດປະຕິວັດຊາດ ປະຊາທິປະໄຕ  ກໍ່ຄືຂະບວນແຫ່ງການປົກປັກຮັກສາ-ສ້າງສາພັດທະນາປະເທດຊາດ, ຕິດພັນກັບປະຫວັດມູນເຊື້ອຂອງກຳລັງ ປກສ ປະຊາຊົນ ເຊິ່ງກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ຍັງເປັນກຳລັງສຳຄັນໃນການຂົນຂວາຍເອົາກຳລັງລົງກໍ່ສ້າງຮາກຖານການເມືອງຢູ່ບັນດາແຂວງຕ່າງໆ ໃນຂອບເຂດທົ່ວປະເທດ, ເພື່ອແນ່ໃສ່ເຮັດວຽກງານການເມືອງແນວຄິດໃຫ້ພະນັກງານ-ນັກຮົບ, ປກສ ກຸ້ມບ້ານ, ອົງການຈັດຕັ້ງບ້ານ ແລະ ປະຊາຊົນ ບັນດາເຜົ່າ ໃຫ້ມີສະຕິລະວັງຕົວຕໍ່ກຸ່ມຄົນບໍ່ດີ, ມີຄວາມຮັກຊາດ ຮັກບ້ານເກີດເມືອງນອນ, ເຊື້ອໜັ້ນຕໍ່ການນຳພາຂອງພັກ-ລັດ, ພ້ອມທັງເປັນເຈົ້າການປະກອບສ່ວນເຂົ້າໃນວຽກງານ ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ. ນອກນີ້ຍັງໄດ້ສຸມໃສ່ເຮັດວຽກງານວິຊາສະເພາະຢ່າງຕັ້ງໜ້າໃນການຄຸ້ມຄອງ ແລະ ຕິດຕາມການເໜັງຕີງຂອງພົນລະເມືອງ, ຄຸ້ມຄອງການຂື້ນສຳມະໂນຄົວ-ອອກບັດປະຈຳຕົວ.

ຜ່ານການຈັດຕັ້ງນຳພາແຕ່ລະໄລຍະ ຜ່ານມາກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກໍ່ສາມາດຍາດໄດ້ຜົນງານຫຼາຍດ້ານເຊັ່ນ: ໄດ້ຮັບຫຼຽນໄຊພິລະອາດຫານຊັ້ນ II 1 ໜ່ວຍ, ຫຼຽນໄຊແຮງງານຊັ້ນ II 7 ໜ່ວຍ, ຫຼຽນໄຊແຮງງານຊັ້ນ II 5 ໜ່ວຍ ແລະ ໃບຍ້ອງຍໍຈາກລັດຖະບານ 2 ໃບ.

Off

Comments are closed.