29th Jan2019

ພິທີເປີດປີທ່ອງທ່ຽວ ລາວ-ຈີນ 2019 ໄດ້ເປີດຂື້ນຢ່າງເປັນທາງການ

by somchan

ກະຊວງຖະແຫຼ່ງຂ່າວ ວັດທະນະທຳ ແລະ ທ່ອງທ່ຽວ ສປປ ລາວ ຮ່ວມກັບ ກະຊວງຖະແຫຼ່ງຂ່າວ ແລະ ທ່ອງທ່ຽວ ສປ ຈີນ ໄດ້ຈັດພິທີເປີດປີທ່ອງທ່ຽວ ລາວ-ຈີນ 2019 ຂື້ນຢ່າງເປັນທາງການໃນວັນທີ 25 ມັງກອນ 2019 ທີ່ຫໍວັດທະນະທຳແຫ່ງຊາດ ໂດຍການເຂົ້າຮ່ວມຂອງ ປອ ສອນໄຊ ສີພັນດອນ ຮອງນາຍຍົກລັດຖະມົນຕີ ແຫ່ງ ສປປ ລາວ,  ປອ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ປອ ບໍ່ແສງຄຳ ວົງດາລາ ລັດຖະມົນຕີກະຊວງ ກະຊວງຖະແຫຼ່ງຂ່າວ ວັດທະນະທຳ ແລະ ທ່ອງທ່ຽວ, ທ່ານ ລູ ຊູ ກາງ ລັດຖະມົນຕີກະຊວງວັດທະນະທຳ ແລະ ທ່ອງທ່ຽວ ແຫ່ງ ສປ ຈີນ ພ້ອມດ້ວຍການນຳພັກ-ລັດ, ທູດຕານຸທູດ ແລະ ອົງການຈັດຕັ້ງສາກົນເຂົ້າຮ່ວມ.

ປອ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວວ່າ: ສປປ ລາວ ແລະ ສປ ຈີນ ເປັນປະທານບ້ານໃກ້ເຮືອນຄຽງ ປະຊາຊົນສອງຊາດໄດ້ມີມູນເຊື້ອແລກປ່ຽນການຢ້ຽມຢາມໄປມາຫາສູ່ກັນຕະຫຼອດ, ໃນປີ 2016 ສອງປະເທດໄດ້ຈັດພິທີສະເຫຼີມສະຫຼອງສາຍພົວພັນການທູດຄົບຮອບ 55 ປີ ພ້ອມທັງແລກປ່ຽນກິດຈະກຳຫຼາຍຢ່າງຢູ່ແຕ່ລະປະເທດ ໂດຍສະເພາະແມ່ນການແລກປ່ຽນຮ່ວມມືດ້ານການທ່ອງທ່ຽວ, ເພື່ອເປັນການເສີມຂະຫຍາຍມູນເຊື້ອສາຍພົວພັນຮອບດ້ານ ແລະ ເຂົ້າສູ່ລວງເລິກບົນຈິດໃຈເພື່ອນ 4 ດີ ເພື່ອພ້ອມກັນສ້າງເປັນຄູ່ຮ່ວມຊາຕາກຳອັນດຽວກັນ ດັ່ງນັ້ນ, ການນຳພັກ-ລັດ ຂອງທັງສອງຊາດ ລາວ-ຈີນ ຈຶ່ງໄດ້ເຫັນດີເປັນເອກະພາບກັນເລືອກເອົາປີ 2019 ເປັນປີທ່ອງທ່ຽວ ລາວ-ຈີນ ເພື່ອສ້າງເງື່ອນໄຂ ແລະ ອຳນວຍຄວາມສະດວກໃຫ້ແກ່ປະຊາຊົນສອງຊາດ ໄດ້ມີໂອກາດໄປມາຫາສູ່ເຊິ່ງກັນ ແລະ ກັນ ຮຽນຮູ້ວັດທະນະທຳຂອງກັນ ແລະ ກັັນຫຼາຍຂື້ນກວ່າເກົ່າ, ໂອກາດດັ່ງກ່າວທ່ານຍັງໄດ້ຮຽກຮ້ອງໃຫ້ປວງຊົນລາວທັງຊາດ ຈົ່ງຮ່ວມໃຈກັນເປັນເຈົ້າພາບທີ່ດີໃນການຕ້ອນຮັບ ແລະ ອຳນວຍຄວາມສະດວກໃຫ້ແກ່ນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ເຂົ້າມາທ່ຽວຊົມສະຖານທີ່ທ່ອງທ່ຽວໃນ ສປປ ລາວ ໃຫ້ມີຄວາມເບີກບານມ່ວນຊື່ນ ແລະ ເຕັມໄປດ້ວຍຮອຍຍີ້ມແຫ່ງມິດຕະພາບທີ່ເປັນເອກະລັກຂອງລາວ ຈາກນັ້ນ ປອ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍການນຳພັກ-ລັດ ຂອງທັງສອງປະເທດ ໄດ້ລັ່ນຄ້ອງ 9 ບາດ ເພື່ອເປີດປີທ່ອງທ່ຽວ ລາວ-ຈີນ 2019 ຢ່າງເປັນທາງການ ພ້ອມທັງຊົມການສະແດງຮູບພາບ, ຊົມວີດີໂອການທ່ອງທ່ຽວ ແລະ ຊົມສິລະປະວັນນະຄະດີ ລາວ-ຈີນ ທີ່ເຕັມໄປດ້ວຍບັນຍາກາດເບີກບານມ່ວນຊື່ນ ແລະ ຮັກສາໄດ້ມິດຕະພາບທີ່ດີຕໍ່ກັນລະຫວ່າງສອງຊາດ ລາວ-ຈີນ.

ຂ່າວໃຫ້ຮູ້ຕື່ມອີກວ່າ:

ໃນວັນດຽວກັນ ທີ່ສຳນັກງານນາຍົກລັດຖະມົນຕ ທ່ານ ລູ ຊູ ກາງ ລັດຖະມົນຕີກະຊວງວັດທະນະທຳ ແລະ ທ່ອງທ່ຽວ ສປ ຈີນ ພອມດ້ວຍຄະນະ ໄດ້ເຂົ້າຢ້ຽມຂ່ຳນັບ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດທີ່ຄະນະຜູ້ແທນ ສປ ຈີນ ໄດ້ເດີນທາງມາຢ້ຽມຢາມເຄື່ອນໄຫວລັດຖະກິດ ຢູ່ ສປປ ລາວ ແລະ ເຂົ້າຮ່ວມພິທີ ເປີດປີທ່ອງທ່ຽວ ລາວ-ຈີນ 2019 ໃນລະຫວ່າງວັນທີ 24-27 ມັງກອນ 2019.

ທ່ານ ທອງລຸນ ສີສຸລິດ ກໍ່ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການເຄື່ອນໄຫວວຽກງານຢູ່ ສປປ ລາວ ຄັ້ງນີ້ ຂອງ ທ່ານ ລູ ຊູ ກາງ ພ້ອມດ້ວຍຄະນະ ເຊິ່ງເປັນການປະກອບສ່ວນອັນສຳຄັນເຂົ້າໃນການຮັດແໜ້ນການພົວພັນຮ່ວມມື ຂອງສອງປະເທດ ເວົ້າລວມ ເວົ້າສະເພາະ ແມ່ນການຮ່ວມມືທາງດ້ານຂົງເຂດວຽກງານຂະແໜງການທ່ອງທ່ຽວ ເປັນການເປີດໂອກາດ ແລະ ໂຄສະນາອັນໃຫ່ຍຫຼວງໃຫ້ປີທ່ອງທ່ຽວ ລາວ-ຈີນ 2019 ແລະ ສືບຕໍ່ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນໃນອານາຄົດ ແລະ ຍາວນານ.

ທ່ານ ລູ ຊູ ກາງ ໄດ້ສະແດງຄວາມຂອບໃຈຕໍ່ ທ່ານນາຍົກລັດຖະມົນຕີ ແຫ່ງ ສປປ ລາວ ຕໍ່ການຕ້ອນຮັບອັນອົບອຸ່ນໃນຄັ້ງນີ້ ພ້ອມທັງແຈ້ງຈຸດປະສົງ ແລະ ການເຄື່ອນໄຫວຢ້ຽມຢາມ ສປປ ລາວ ຄັ້ງນີ້ໃຫ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ຮັບຊາບ, ພ້ອມທັງຢັ້ງຢືນວ່າຈະສືບຕໍ່ເສີມຂະຫຍາຍການພົວພັນຮ່ວມມື ເພື່ອເປັນການປະກອບສ່ວນສົ່ງເສີມຮັດແໜ້ນສາຍພົວພັນຮ່ວມມືລະຫວ່າງສອງປະເທດ ລາວ-ຈີນ ກໍຄືສອງກະຊວງໃຫ້ນັບມື້ສູງຂື້ນ.

Off

Comments are closed.